Rusiya-Ukrayna danışıqlarının növbəti raundu başa çatıb, müsbət irəliləyiş var

Bu gün Belarusda Ukrayna ilə Rusiya nümayəndə heyəti arasında keçirilən üçüncü görüş başa çatıb.

Reyting.az RTRT-yə istinadla xəbər verir ki, görüşdə müzakirə olunan məsələlərlə bağlı açıqlama verən Ukrayna heyəti bildirib ki, fundamental məsələlərlə bağlı irəliləyiş olmayıb: "Görüşdə çox ciddi nəticə olmadı. Ancaq humanitar dəhlizlərin davam etdirilməsinə razılıq verildi".

Ukrayna Prezident Aparatı rəhbərinin müşaviri Mixail Podolyak isə bildirib ki, danışıqların üçüncü raundu başa çatıb: "Humanitar dəhlizlərin maddi-texniki təminatının yaxşılaşdırılmasında bəzi müsbət irəliləyişlər var. Atəşkəs və təhlükəsizlik zəmanətləri ilə yanaşı, nizamlamanın əsas siyasi bloku üzrə intensiv məsləhətləşmələr davam etdirilib".

Rusiya nümayəndə heyətinin üzvü, Dövlət Dumasının Beynəlxalq Əlaqələr Komitəsinin rəhbəri Leonid Slutski isə deyib ki, bu gün nəyinsə imzalanacağını güman etmək sadəlövhlük olardı: "Təbii ki, bu sənədlər üzərində iş çox yaxın vaxtlarda davam etdiriləcək. Növbəti, dördüncü raund Belarus ərazisində keçiriləcək. Dəqiq tarix isə bilinmir. Danışıqlar ciddi şəkildə gedir və ən qısa müddətdə davam etdiriləcək".

Rusiya nümayəndə heyətinin rəhbəri Vladimir Medinski isə bildirib ki, müzakirələr siyasi və hərbi aspektlər üzrə davam edib: "Lakin müsbət nəsə haqqında danışmaq hələ tezdir. Biz böyük sənədlər toplusu ilə gəldik, konkret razılaşmalar, layihələr və təkliflər irəli sürdük. Ukrayna tərəfi bütün bu sənədləri öyrənmək üçün özü ilə aparıb. Ümid edirik, gələn görüşdə hansısa sənəd imzalana bilər".

Xatırladaq ki, bu gün Rusiya tərəfi atəşin dayandırlması üçün görüşdən əvvəl öz şərtlərini açıqlayıb.

Bu barədə “Röyters” agentliyinə Rusiya prezidentinin sözçüsü Dmitri Peskov deyib.

O bildirib ki, Ukrayna Krımı Rusiya ərazisi kimi qəbul etməli, eyni zamanda, neytral dövlət statusuna keməlidir: "Bununla bəbabər, Kiyev rəmsi olaraq Donetsk və Luqanskın müstəqilliyini tanımalıdır. Bu halda, əməliyyat anındaca dayanacaq".

Ukrayna tərəfi isə israrla Rus ordusunun Krım daxil bütün bölgələrdən geri çəklməsini tələb edir.

***

Bu gün Belarusda Ukrayna ilə Rusiya nümayəndə heyətləri üçüncü dəfə görüşüblər.

Reyting.az Rusiya mətbuatına istinadla xəbər verir ki, görüş Bakı vaxtı ilə saat 18.50-də başlayıb.

Məlumata görə, hazırda müzakirələr davam edir.

***

Bu gün Belarusda Ukrayna ilə Rusiya nümayəndə heyətləri üçüncü dəfə görüşəcək.

Reyting.az Rusiya mətbuatına istinadla xəbər verir ki, görüş Bakı vaxtı ilə saat 18-da başlayacaq.

Məlumata görə, artıq Ukrayna tərəfi də görüş yerinə yollanıb.

Rusiya nümayəndə heyəti isə günortadan Belarusun Belovejskaya Puşçadadakı görüş yerinə çatıb: "Tezliklə danışıqlar başlayacaq".

***

Bu gün Rusiya-Ukrayna danışıqlarının növbəti raundu keçiriləcək.

“Strana” nəşrinin məlumatına görə, Ukrayna nümayəndə heyətinin üzvü, hakim “Xalqın xidmətçisi” partiyasının parlament fraksiyasının rəhbəri David Araxamia deyib ki, danışıqlar Polşa-Belarus sərhədində aparılacaq.

Görüş Bakı vaxtı ilə saat 16:00-da başlayacaq.

Rusiya nümayəndə heyətinin üzvü, Dövlət Dumasının Beynəlxalq Əlaqələr Komitəsinin rəhbəri Leonid Slutski YouTube-da “Solovyev live” proqramında qarşıdan gələn danışıqlarla bağlı məlumatı təsdiqləyib.

Rusiya ilə danışıqlarda Ukrayna nümayəndə heyətinin üzvü, Ali Radada hakim olan “Xalqın xidmətçisi” fraksiyasının rəhbəri David Araxamia Moskvanın şərtləri ilə Kiyevin razılaşa bilməyəcəyini deyib.

Onun sözlərinə görə, razılaşmağın demək olar ki, mümkün olmadığı yeganə iki hissə Krım və iki qondarma respublikadır: “Rusiya israrla onların müstəqilliyini tanıyır. Bu, Ukraynanın bir hissəsidir. Təbii ki, bu mövqe Ukrayna cəmiyyəti üçün qəbuledilməzdir”.(TASS)

Ana səhifəyə dön