Türkiyə, Rusiya və Ukrayna XİN başçılarının görüşü başa çatıb: "Atəşkəs razılaşması mümkün olmayb"

“Bu görüş üçün türkiyəli həmkarım Mövlud Çavuşoğluna təşəkkür edirəm”.

Reyting.az xəbər verir ki, bunu Ukrayna xarici işlər naziri Dmitri Kuleba Antalyada Türkiyə və Rusiya xarici işlər nazirləri Mövlud Çavuşoğlu və Sergey Lavrovla üçtərəfli görüşdən sonra keçirdiyi mətbuat konfransında deyib: “Bu, müharibədən sonra Ukrayna və Rusiya XİN başçılarının ilk görüşü idi. Görüş həm çətin, həm də asan oldu. Əlimdən gələnin ən yaxşısını etməyə çalışdım. Rusiyanın xarici işlər naziri Sergey Lavrov təxliyə məsələsində öhdəlik götürmədi. Ukrayna hakimiyyətindəki hər kəs humanitar dəhlizlərin təhlükəsizliyi ilə bağlı zəmanət verə bilər. Bunu ruslar edə bilərmi? Lavrov bura ancaq dinləmək üçün gəlmişdi. Mən isə müzakirələr üçün gəlmişdim. Görünür, mövqelərimiz fərqlidir. Lavrov mənim təkliflərimi qəbul etmədi. Bu görüşdə 24 saatlıq atəşkəs məsələsi əsas müzakirə olundu. Ancaq atəşkəslə bağlı razılıq əldə olunmadı. Buna baxmayaraq, bu formatda danışıqların davam etdirilməsi vacibdir. Yenə belə bir formatda görüşməyə razıyıq. Həll yolunu axtarmaq istəyiriksə, bunu məqsədəuyğun hesab edirəm. Ruslar müzakirələrə hazır olsa, mən də buna hazıram. Lavrovun bizdən tələbləri kapitulyasiya siyahısına oxşayır. Bu müharibəni dayandırmalıyıq”.

Rusiyanın xarici işlər naziri Sergey Lavrov isə deyib ki, Rusiyanln digər ölkələrə hücum etmək fikri yoxdur:

"Heç Ukraynaya da hücum etməmişik. Sadəcə xəbərdarlıq edirik. Bütün əməliyyatlar plan üzrə gedir. Bizim Qərb həmkarlarımız bütün prinsipləri tapdalayaraq Ukraynaya ölümcül silah göndərirlər. Hazırda Ukraynada hərbi əməliyyatlar plan üzrə davam edir. Biz bütün məsələlərin həllinə dair danışıqlara hazırıq. Ukrayna tərəfi onların təkliflərini alıb, bunun üzərində çalışıb bir nəticə deyəcəklər".

Lavrov daha sonra deyib ki, Belarus ərazisi danışıqlar üçün alternativsizdir.

O, görüşdə humanitar məsələlərin müzakirə edildiyini bildirib: “Biz Ukraynanın militariziyasını istəmirik. İstər NATO ilə, istərsə də NATO-suz. Biz Ukraynada neonasist ənənənin formalaşmasını istəmirik. Biz Ukraynanın neytral qalmasını istəyirik”.

Lavrov deyib ki, görüşdə Putin və Zelenskinin mümkün görüşünü də müzakirə ediblər: “Lakin prezidentlər arasında danışıqlar sadəcə danışıqlar xətrinə olmalı deyil. Biz sonadək məsələni diplomatik yolla həll etmək istəyirdik. Lakin bizə deyildi ki, Ukrayna bizimdir, necə istəsək, elə də edəcəyik. Biz dostyana Ukraynanı istəyirik. Biz rus dilinin, rus mədəniyyətinin qadağan olunmadığı Ukraynanı istəyirik. Qərb Ukraynadan onun daim Rusiyaya qarşı, bütün rusluğa qarşı fəaliyyət göstərməsini istəyir. Amerikalılar Türkiyədən, Hindistandan, Misirdən, Cənub-Şərq Asiya ölkələrindən, hətta Çindən belə sanksiyalara riayət etməyi tələb edir.Belə böyük ölkələrə, belə böyük sivilizasiyalara hörmətsizliyi təsəvvür edə bilmirəm. Amerikalılar öz rusofobiyalarını apofeoza çatdırmaq üçün hər şey edərlər”.

Lavrovun sözlərinə görə, Kulebanın görüşdən sonrakı “Atəşkəs razılaşması” alınmadı bəyanatına təəccüblənib: "Burada onsuz da heç kimin atəşkəs barədə razılığa gəlmək fikri yox idi. Əgər görüşlərin məqsədi Rusiyanın təkliflərini rədd edib öz istədikləri kimi etmək və daha sonra jurnalistlərə “Bizim xoşməramlı təkliflərimiz rədd edildi” deməkdirsə, o zaman bu Ukrayna diplomatiyasının məntiqinə uyğun gəlir”.

Lavrov daha sonra sərt açıqlama verib: "Ukraynadakı vəziyyət Rusiyanın dünyanın siyasi xəritəsində qalmaq uğrunda verdiyi həyati vacib də yox, ölümünə döyüşdür”.

***

Türkiyə, Rusiya və Ukrayna xarici işlər nazirləri Mövlud Çavuşoğlu, Sergey Lavrov və Dmitro Kulebanın üçtərəfli görüşü başlayıb.

Reyting.az xəbər verir ki, danışıqlar Antalya şəhərinin Belek rayonundakı “Regnum Carya” hotelində keçirilir.

Üçtərəfli görüşdən sonra mətbuat konfransı keçiriləcək.

***

“Ukrayna və Türkiyə xarici işlər nazirləri Dmitro Kuleba və Mövlud Çavuşoğlu Rusiyanın hücumlarını dayandırmaq üçün atılacaq addımları müzakirə ediblər”.

Bu barədə Ukrayna XİN məlumat yayıb: “Ukrayna XİN rəhbəri siyasi və humanitar yardıma görə türkiyəli həmkarına təşəkkür edib. O, həmçinin mövcud vəziyyət barədə Mövlud Çavuşoğlununa məlumat verib”.

XİN-dən bildirilib ki, ikitərəfli görüş zamanı D.Kuleba Ukraynanın tələblərini M.Çavuşoğlunun diqqətinə çatdırıb. O qeyd edib ki, dərhal atəşkəs elan edilməlidir: "Bundan başqa, Rusiya qoşunları Ukraynadan çıxmalı, Mariupol, Xarkov, Sumı, Volnovaxa və Ukraynanın digər şəhərlərində humanitar vəziyyət yaxşılaşdırılmalıdır".