Azərbaycan kommunistlərinin SSRİ “sevdası” artır

Rusiyanın Ukraynaya hərbi müdaxiləsi Azərbaycan kommunistlərinin SSRİ-nin bərpası “sevdasını” artırıb. Azərbaycan kommunistləri (istisnalarla) sosial şəbəkələrdə birmənalı olaraq Rusiyanın bu əməliyyatını dəstəkləyirlər.

Reyting.az xəbər verir ki, hazırda bir neçə partiya və qrupa bölünərək bir-birini qəbul etməyən ölkə kommunistlərinin Rusiya məsələsində mövqeləri əsasən üst-üstə düşür.

Bu prosesdə xüsusi aktivliyi ilə seçilənlərdən biri də Azərbaycan Kommunist Partiyası Mərkəzi Komitəsinin katibi Ədalət Abdinovdur. Siyasətçinin sosial şəbəkələrdə Rusiyanın Ukraynaya hücumuna haqq qazandırmasından sonra SSRİ haqqında daha bir yazısı diqqəti cəlb edir.

“Biz yeni SSRİ-yə doğru gedirik. Rusiya və Belarus tarixin sınağından uğurla çıxmış bu prosesdə nümunə göstərirlər. 28 ittifaq proqramının təsdiqindən çox əvvəl Belarus və Rusiya müəssisələri ümumi sənaye siyasətini kifayət qədər uğurla qururlar”,- kommunist Abdinov “Facebook” səhifəsində yazır.

Abdinov əlavə edir ki, ittifaqda olan hər iki ölkənin bazarı bir-birinə açıqdır: “Minsk Traktor Zavodu Rusiyanın aqrar bölməsini müvafiq texnika ilə təmin edir. Rusiya-Belarus birgə müəssisələrin sayı sürətlə artmaqdadır. Bunlardan biri də Rusiyanın Tatarıstan Respublikasındakı Yelabuqa şəhərində açılıb ki, yeni birgə müəssisədə traktor istehsal ediləcəkdir. Belə əməkdaşlıq Qərbin sanksiyalarını uğurla dəf etməyə imkan verir.

Minsk Avtomobil Zavodunun da Rusiya bazarındakı işinin nəticələri müvəffəqiyyətlidir. 2021-ci ildə onun yük maşınlarının satışları 44,5 faiz artaraq 5410 ədəd təşkil edib. Bu zavodun istesal etdiyi avtobuslar Rusiya şəhərlərinin bələdiyyələri tərəfindən keçirilən tenderlərdə bərabər şəkildə iştirak edir. Zavod Sankt-Peterburqdan təbii qaz yanacağı ilə orta və iri sərnişin tutumlu 896 avtobusun tədarükü üçün irimiqyaslı sifarişlər alıb. Artıq 300-dən çox nəqliyyat vasitəsi göndərilib. Minsk Avtomobil Zavodunun “Belkommunmaş” trolleybuslarına da Rusiyada tələbat var”.

Ə. Abdinov Rusiya və Belarusu nəzərdə tutaraq yazır ki, iki qardaş ölkənin uğurlu sənaye əməkdaşlığına misal kimi çoxmənzilli binaların əsaslı təmirində geniş istifadə olunan liftlər istehsal edən “MLM Nevski Lift” Rusiya-Belarus birgə müəssisəsini göstərir: “Yeddi il ərzində Belarus istehsalı olan 7,7 min lift quraşdırılıb ki, bu da Rusiyanın digər bölgələrində də tələb olunur. Belə ki, Başqırdıstanın “Alqa” xüsusi iqtisadi zonasında lift istehsalının başlanılması planlaşdırılır.

Yaxın və qarşılıqlı faydalı əməkdaşlıq 2024-cü ildə artıq qardaş dövlətlərin vahid iqtisadi məkanda yaşayacağına tam əminlik yaradır”.

Ana səhifəyə dön