Azərbaycanlıların soyqırımı ilə bağlı bəyanat qəbul edilib

Böyük Quruluş Partiyası (BQP) 31 Mart - Azərbaycanlıların soyqırımı ilə bağlı bəyanat qəbul edib.

Reyting.az-ın xəbərinə görə, BQP-nin bəyanatında deyilir ki, xalqımıza qarşı ermənilərin əsrlər boyu davam etdirdiyi nifrət siyasəti nəticəsində zaman-zaman on minlərlə dinc soydaşımız etnik və dini mənsubiyyətinə görə kütləvi şəkildə, xüsusi amansızlıqla qətlə yetirilib:

“Bu günlər həmin hadisələrdən biri - tariximizdə ən faciəvi və qanlı qırğınlardan olan 1918-ci ilin Mart Soyqırımının 104-cü ildönümü tamam olur.

1918-ci ilin 30 mart və 3 aprel tarixləri arasında daşnak erməni silahlı dəstələri bolşeviklərlə birgə Bakı şəhərində və quberniyanın müxtəlif ərazilərində, eləcə də Şamaxı, Quba, Xaçmaz, Lənkəran, Hacıqabul, Salyan, Zəngəzur, Qarabağ, Naxçıvan və digər yerlərdə azərbaycanlılara qarşı kütləvi qırğınlar törədiblər. 31 Mart Soyqırımı öz miqyasına görə sadəcə xalqımızın tarixində deyil, insanlıq tarixində də ən böyük faciələrdən və kütləvi terror aktlarından biridir.

Həmin vaxtlar silahlı erməni birləşmələri azərbaycanlıları köçə məruz qoymaq üçün əhalisinin mütləq əksəriyyəti soydaşlarımızdan ibarət olan İrəvanın bütün mahallarında da qırğınlar törədiblər. “Qaçaqaç” hadisəsi kimi tarixə düşən həmin olaylar zamanı, təkcə Zəngəzur qəzasında erməni silahlı dəstələri tərəfindən 115 türk kəndi məhv edilərək, tarix səhnəsindən silinib. Tarixi qaynaqlar təsdiq edir ki, Zəngəzurda da Xocalı soyqırımına bənzər hadisələr törədilib. Bir neçə gün içərisində 3257 kişi, 2276 qadın, 2196 uşaq amansızcasına öldürülub. Ümumiyyətlə, Zəngəzur qəzası üzrə 10068 nəfər öldürülüb, 50 min insan öz dədə-baba yurdunu tərk etməyə məcbur olub. Pəmbək nahiyəsinin 9 kəndində 1000-dən çox soydaşımız vəhşicəsinə qətlə yetirilib. Nahiyənin bütün azərbaycanlı kəndləri qarət edilib və yandırılıb. 1918-ci il aprelin 29-da Gümrü yaxınlığında əsasən qadınlardan, uşaqlardan və yaşlılardan ibarət 3 min nəfərlik köçə basqın edilərək onların hamısı son nəfərinədək öldürülüb. Təkcə Arcut kəndində 60 nəfər qətlə yetirilib, onlardan 12 nəfərinin başı kəsilib... Bütün bunlar xalqımıza qarşı erməni vəhşiliyinin yalnız bir qismidir. Mənfur qonşular tərəfindən xalqımıza qarşı zorakılıq aktları sonrakı tarixlərdə də amansızlıqla davam edib. Bu vəhşətin cəzasızlığı sonralar tariximizin ən böyük faciəsi olan Xocalı soyqırımının törədilməsi ilə nəticələndi”.

Bəyanatda vurğulanır ki, rəsmi məlumatlarda Birinci Qarabağ müharibəsi zamanı 4000-ə yaxın azərbaycanlının itkin düşdüyü qeyd edilir: “İtkin düşmüş şəxslər haqqında qarşı tərəfin bu günədək hər hansı məlumat verməməsi və azad edilmiş ərazilərdə aşkar olunan insan qalıqları, onlardan bəzilərinin amansızcasına qətlə yetirilərək kütləvi məzarlıqlarda basdırıldığını deməyə əsas verir. Bu günlərdə Xocalı rayonunun Fərrux kəndi ərazisində aşkarlanan insan qalıqlarının da Birinci Qarabağ müharibəsində şəhid olmuş şəxslərə aid olduğu ehtimal edilir. Aşkar olunan kütləvi məzarlıqlar bir daha sübut edir ki, ermənilər vəhşi vərdişlərindən və müharibə cinayətlərindən bu gün də əl çəkməyiblər. Ona görə də, tarixi yaddaşımızı hər zaman canlı tutmalı və heç nəyi yaddan çıxarmamalıyıq”.

BQP daha sonra bəyan edir: “Beynəlxalq hüquqla soyqırım hadisələri sülh və insanlıq əleyhinə yönəlmiş əməl olmaqla ən ağır cinayət hadisəsi hesab edilməsinə baxmayaraq, təəssüflə qeyd etmək lazımdır ki, kifayət qədər əsaslı sübut və dəlillər olmasına baxmayaraq, ermənilər tərəfindən azərbaycanlılara qarşı törədilmiş, nə 1918-ci ilin Mart Soyqırımı, nədə ki, sonralar baş vermiş digər vəhşi cinayət aktlarına adekvat reaksiya verilməyib, Azərbaycana münasibətdə ikili standartlar nümayiş etdirilib və bu gün də həmin münasibət davam etməkədədir.

Böyük Quruluş Partiyası olaraq, bir daha soyqırım qurbanlarının xatirəsini dərin hüzn və sayğı ilə yad edir, onlara Allahdan rəhmət diləyir. Eyni zamanda, böyük dövlətləri və beynəlxalq təşkilatları azərbaycanlılara qarşı ermənilər tərəfindən qəsdən törədilmiş, müharibə cinayətlərini - sülh və insanlıq əleyinə olan cinayətləri beynəlxalq hüquq normalarına uyğun şəkildə tanımağa və onlara müvafiq qiymət verməyə çağırırıq".

Ana səhifəyə dön