Ukraynadan xəbərdarlıq: Donbass döyüşləri dəhşətli ola bilər

Rəsmi Kiyev NATO-nu Ukraynaya lazımı hərbi yardım verməyəcəyi təqdirdə Donbass döyüşlərinin İkinci Dünya Müharibəsindən də qanlı olacağına dair xəbərdarlıq edib. Ukrayna rəsmiləri belə bir halda Qərb dövlətlərinin qəbul etdikləri və gələcəkdə qəbul edəcəkləri sanksiya qərarlarının heç bir mənasının olmayacağını bildiriblər.

Reyting.az bildirir ki, bu xəbərdarlığı Ukrayna xarici işlər naziri Dmitri Kuleba edib.

“Ya indi bizə kömək edə bilərsiniz, ya da bütün yardımlar üçün çox gec olacaq. Mən həftələrdən yox, günlərdən danışıram. Rus qoşunları Donbassa toplaşana qədər bizə lazım olan hava hücumundan müdafiə sistemləri, döyüş sursatı, zirehli texnika və reaktiv təyyarələr verilməsə, daha çox insan həyatını itirəcək”,- Ukrayna baş diplomatı NATO xarici işlər nazirlərinin toplantısında deyib.

Kuleba ümid edir ki, Ukrayna lazım olan silahları alacaq: “Sual onları nə vaxt almaqdır. Donbassdakı müharibə NATO-ya İkinci Dünya Müharibəsini xatırladacaq. Buna heç bir şübhə yoxdur”.

Dmitri Kulebanın xəbərdarlığından sonra NATO-nun baş katibi Yens Stoltenberq də təşkilatın Ukraynaya irimiqyaslı silah yardımını davam etdirəcəyini və bununla kifayətlənməyəcəyini, həm də kiberhücumlar, kimyəvi və bioloji silah təhdidləri ilə bağlı yardım edəcəyini açıqlayıb.

Stoltenberq Putinin geri çəkilmə planının olmadığının başa düşüldüyünü və son məqsədinin Ukraynanı tamamilə idarə etmək və cəbhədə uğur qazanaraq işğalçılıq məqsədinə çatmaq olduğunu bildirib.

“Gördüyümüz kimi, Rusiya qoşunlarını yenidən qruplaşdırır və mövqelərini dəyişir. Biz Donbassda çox böyük münaqişə gözləyirik. Biz bu uzun müharibəyə hazır olmalıyıq. Müharibə həftələr, aylar və hətta illərlə davam edə bilər. Ona görə də biz daha çox hazırlaşmalı və buna uyğun hərəkət etməliyik”,- Stoltenberq hər sahədə Ukraynanın yanında olmağa davam edəcəklərini vurğulayıb.

Böyük Britaniyanın quru müharibələr üzrə təhlilçisi Nik Reynolds Ukraynanın xarici işlər naziri Dimitro Kulebanın “regiondakı münaqişələrin İkinci Dünya Müharibəsinə bənzəyəcəyi” proqnozunu real hesab edir.

“Ukraynanın şimalından bura göndəriləcək qoşunlarla Avropada nəsillər boyu görünməyən şiddətli qarşıdurmaların şahidi olacağıq”, - Reynolds bildirib.

O vurğulayır ki, Ukraynanın regionda artıq Rusiyanın nəzarəti altında olan ərazilərini geri qaytara bilməsi birdən çox amildən asılıdır: “Əksər ukraynalılar rus qoşunlarının Kiyevin şimalından çıxarılmasını alqışlasalar da, bu qoşunlar Donbassa çatana qədər Rusiyanın bölgədə irəliləməsi yavaş-yavaş davam edir. Qərbin göndərdiyi silahların bu prosesdə necə faydalı olacağını soruşduğumuzda, Qərb ölkələrinin Ukraynaya göndərdiyi silahlar müharibənin gedişatını dəyişdi”.

Bildirilir ki, yaxın həftələrdə bölgəyə yeni yüklərin çatdırılmasında da çətinliklər yarana bilər. Ukraynaya verilən “Javelin”, “Stinger” və NLAW kimi qabaqcıl silahların istehsal prosesinin asan olmadığını və kompleks tədarük zəncirlərinə sahib olduğunu vurğulayan Reynolds bildirir ki, Qərb ölkələri tələbi qarşılamaqda çətinlik çəkir.

Qərb hərbi analitikləri Rusiyanın Ukrayna müharibəsində nəzərəçarpacaq qələbə nümayiş etdirmək üçün bütün gücünü Donbass bölgəsinə qoyacağını proqnozlaşdırırlar.

Qəribədir ki, Ukrayna rəsmiləri, konkret Kuleba gündəm məsələnin “silah, silah, silah” olduğunu bildirsə də, NATO-nun baş katibi və Kuleba hansı silahların göndəriləcəyi ilə bağlı konkret açıqlama verməməyə üstünlük verirlər. Beləcə, NATO Rusiyanın göndərilən silahlardan xəbərsiz olmasını istəyir.

Reyting.az

Ana səhifəyə dön