Deputat: “Xarici dövlətlərə kiçiklik edənlər bu xalqa böyüklük etmək arzusundadır”

“Prezident İlham Əliyevin sədrliyi ilə keçirilən bu ilin birinci rübünün yekunlarına həsr olunan müşavirə siyasi və iqtisadi əhəmiyyəti ilə yanaşı, həm də hazırkı mürəkkəb situasiyada xalqla kommunikasiyanın zəruri mərhələsi oldu. Bildiyiniz kimi, pandemiya və münaqişələr fonunda iqtisadi təlatümlərin Azərbaycana təsirləri qaçılmazdır və bu mənada real vəziyyət barədə insanların birbaşa ölkə başçısı tərəfindən məlumatlandırılması bəzi dairələrin şəraitdən sui-istifadə etmək perspektivlərini heçə endirdi. Ümumiyyətlə, bütün fəaliyyəti dövründə prezident İlham Əliyev siyasi mədəniyyət nümunəsi ortaya qoyub. Elə götürək 2018-ci il prezident seçkilərini, ölkənin rəhbəri ciddi bir iradə ortaya qoyaraq, islahatlara, yeniləşməyə bir başa prezidentlik institutundan başladı. Daha sonra rəhbəri olduğu partiyanın çoxluğuna baxmayaraq islahat naminə yeni parlament seçkiləri keçirildi. Yəni, cənab İlham Əliyev dəyişikliyə hakimiyyətin ən yüksək pillələrindən başladı və bu prosesdə də yeganə güvənci xalq oldu”.

Reyting.az xəbər verir ki, bunu Milli Məclisdə çıxışı zamanı deputat Bəhruz Məhərrəmov deyib.

Deputat bildirib ki, indi müqayisə üçün bu gün “islahat” və “dəyişim” istəyən digər cəbhəyə baxın: “Adamlar iqtidardan islahat tələb edir, dəyişiklik istəyir, amma 30 ildir ki, özləri dəyişmir. Eyni adam, eyni vəd, eyni kurs, eyni cılız məqsəd. Dəyişiklik arzu edirsənsə, özündən başla, baxırsan, xırda radikal bir dərnəyi diktaturaya çevirib, səsini çıxaranı da ya partiyadan qovur, ya linç etdirir. Yaxşı, sən xırda bir partiyanı avtoritar struktura çevirmisən, sənə dövlət etibar etmək olar?

Bu gün Azərbaycanda əlində 20 min şəhidin qanı olan qaragüruh özündə İlham Əliyev siyasəti ilə bağlı mühakimə yürütmək cəsarəti tapırsa, bu onların bədbəxtliyidir. Ailəsini idarə edə bilməyən adamlar İlham Əliyevə dövlət idarə etməyi öyrətmək istəyir. Xarici dövlətlərə, əcnəbi təşkilatlara kiçiklik edənlər bu xalqa böyüklük arzusuna düşüb, Bu qədər də olmaz ki!? Danışanda bir müqayisə aparın, Sizin yarıtmazlığınız ucbatından 20 mindən artıq şəhidə rəğmən itirilən torpaqları İlham Əliyev 8 dəfə az itki hesabına işğaldan azad etdi. Xəyanətkarcasına satdığınız Şuşanı, Azərbaycana İlham Əliyev qaytardı. Nəinki qaytardı, hətta Şuşa artıq parlamentin komitə iclaslarına ev sahibliyi edir. Sizə qalsaydı, indi Şuşada separatçıların parlamentinin iclası idi.

İndi yeni hədəf tapıblar. Taleh Kazımovun təyinatından sonra Əli Kərimli və trolları ölkənin ən iri biznes strukturlarından biri olan “PAŞA Holdinq”ə hücuma keçiblər. Başa düşmürlər ki, “PAŞA Holdinq” və ona daxil şirkətlər Azərbaycan biznes mühitinə yeni mədəniyyət, yeni ruh gətirib.

Biznesin yalnız vergi öhdəliyi yox, həm də cəmiyyət qarşısındakı mənəvi sosial öhdəliyi ənənəsini biz “PAŞA Holdinq”in nümunəsində görmüşük. İstər COVİD-19 pandemiyası ilə mübarizədə, istər müharibə dövründə “PAŞA Holdinq” və ora daxil şirkətlər sözün əsl mənasında milli həmrəylik nümunəsi göstərdi. Bu gün də “PAŞA Holdinq” ailəsi işğaldan azad olunmuş ərazilərdə bərpa-quruculuq prosesində vicdanla çalışırlar. İndi nədir sizi narahat edən? Təsəvvür edin, bu təfəkkürlü adamlar hakimiyyətə iddialıdır. Özləri bilər, amma nə qədər ki, bu xalqın həmrəylik ruhu var, Azərbaycançılıq ideyası yaşayayacaq və bu xalq həmin qüvvələri Ağ Evə buraxmayacaq”.

Ana səhifəyə dön