Bloklanmaq növbəsi “Sputnik Azərbaycan”a çatır

Bir neçə gün öncə Rusiyanın dövlət informasiya agentliyi - "RİA Novosti"yə giriş ölkəmizdə bloklanıb. Buna səbəb özünü Azərbaycan ərazilərindəki qanunsuz qurumun qondarma naziri kimi təqdim edən Artak Beqlaryanın sözügedən agentliyə müsahibəsidir.

“RİA Novosti” son vaxtlar Azərbaycanın Qarabağ iqtisadi zonasının bir hissəsində müvəqqəti məskunlaşan rus sülhməramlılarının nəzarət etdiyi ərazidə fəaliyyət göstərməyə çalışan erməni separatçılarının yalan və böhtan dolu təbliğatını aparmaqla məşğul idi. Agentliyin özünü qondarma nazir kimi təqdim edən Artak Beqlaryandan müsahibə alması isə rəsmi Bakının səbr kasasını daşırıb.

Ümumiyyətlə, rəsmi Bakının bu qərarı təkcə “RİA Novosti” və ya Rusiya ilə bağlı deyil. Azərbaycanda “İnformasiya, informasiyalaşdırma və informasiyanın mühafizəsi haqqında” qanuna görə yayılması qanunla qadağan edilən informasiyanın yerləşdirilməsi halları ilə bağlı internet informasiya resurslarına giriş məhdudlaşdırıla bilər.

Bloklanma Kremllə münasibətlərə təsir edəcək?

"RİA Novosti"yə girişin Azərbaycanda bloklanması Azərbaycan-Rusiya münaisbətlərini pozacağını düşünmürəm:

Birincisi, “RİA Novosti” Rusiyanın dövlət agentliyidir və agentliyin bu addımı hər şeydən öncə Azərbaycan və Rusiya arasında dostluq, təhlükəsizlik və strateji tərəfdaşlıq haqqında 1997-ci il tarixli Saziş və Müttəfiqlik qarşılıqlı fəaliyyəti haqqında 2022-ci il tarixli Bəyannamənin, eyni zamnda “BMT Nizamnaməsinin prinsiplərinə və bir-birlərinin suverenliyi və ərazi bütövlüyünə qarşı yönəlmiş istənilən fəaliyyətdən çəkinmək”, habelə “separatçılıq təhdidlərinə qarşı mübarizə” müddəalarının pozulması deməkdir.

İkincisi, Azərbaycandan fərqli olaraq Rusiya bir müddət öncə "Roskomnadzor”un (Rusiyanın Rabitə, İnformasiya Texnologiyaları və Kütləvi İnformasiya Vasitələrinə Nəzarət Federal Xidməti) qərarı ilə Azərbaycanda fəaliyyət göstərən “oxu.az”, "haqqın.az”, "minval.az”, "baku.ws" kimi yerli media subyektlərinin Rusiya ərazisində girişinə blok qoyub. Adları çəkilən saytlar Rusiya-Ukrayna müharibəsində obyektiv mövqe tutduqları və işğala məruz qalanın yanında olduqları üçün bloklanıb.

Üçüncüsü, rəsmi Bakı bu günə qədər Rusiyanın terrorçu və separatçı saydığı Çeçen İçkeriya Respublikasının Rusiyadan kənarda yaşayan nümayəndələri ilə heç vaxt “RİA Novosti”nin etdiyi kimi müsahibə almayıb. Belə bir müsahibə Kremli necə narahat edərdisə, hazırda “RİA Novosti”nin Artak Beqlaryandan aldığı müsahibə Azərbaycanı elə narahat edir.

“Sputnik Azərbaycan” da “RİA Novosti”nin aqibəti ilə üzləşə bilərmi?

Hazırda Azərbaycanda onlarla akkreditasiya olunmuş xarici jurnalist və media orqanları fəaliyyət göstərir. Onların hüquqi statusu və peşə fəaliyyəti Azərbaycan Respublikasının normativ hüquqi aktları və tərəfdar çıxdığı beynəlxalq müqavilələrlə tənzimlənir. Bir çox xarici media orqanının uğurlu fəaliyyətinin də şahidi oluruq. Bununla belə bəzi xarici media orqanlarının fəaliyyəti ciddi şəkildə araşdırılmalıdır. Daha dəqiqi, “RİA Novosti”nin ardınca “Sputnik Azərbaycan”nın da ölkəmizdə fəaliyyətinə son qoyulmalıdır.

Məsələ ondadır ki, “Sputnik Azərbaycan”nın ölkədəki fəaliyyətini şübhə altına alan və bağlanmasını zəruri edən başlıca səbəb Rusiyanın RT kanalının baş redaktoru, erməni əsilli Marqarita Simonyandır. Simonyan bundan öncə dəfərlərlə ölkəmiz əleyhinə əks-təbliğat aparıb. Onun bir müddət öncə paylaşımlarından birində “Qarabağ Rusiyaya birləşdirilməlidir”,- deməsi isə bu şəxs qədər onun rəhbəri olduğu qurumun da ölkəmiz üçün potensial təhdid olduğunu sübut edir.

Turan RZAYEV

Ana səhifəyə dön