Merkel Rusiya ilə bağlı sirrini açıb

Son 16 ildə Almaniyanı idarə etmiş, ümumilikdə isə Avropanın güclü siyasi fiqurlarından olan Angela Merkel həm Pusiya prezidenti Vladimir Putindən danışıb, həm də Rusiya ilə bağlı şəxsinə olan ittihamlara cavab verib.

Reyting.az-ın məlumatına görə, xanım Merkel Berliner Ansambl Teatrında keçirilən sessiyadan sonra jurnalist Aleksandr Osanqın suallarını cavablandırıb. O, Ukraynadakı müharibə və Almaniyanın Kremlə qondarma tolerantlıq nümayiş etdirməsinin Putini həvəsləndirməsi məsələsinə də toxunub.

Merkel bildirib ki, hakimiyyətdə olduğu müddətdə Putin rejimi ilə münasibətləri idarə etdiyinə görə peşman deyil. Putinlə dialoqundan da danışan Merkel deyib:

“Putinlə danışmağın mənası olmadığını desəm, özümü çox pis hiss edərdim. Bunun nəticə verməməsi böyük faciədir, amma buna cəhd etdiyim üçün özümü günahlandıra bilmərəm”.

2008-ci ildə NATO sammitində Ukrayna və Gürcüstanın üzvlüyünə qarşı çıxdığına görə peşman olub-olmaması ilə bağlı suala cavabında Merkel o vaxt Ukraynanın oliqarxların nəzarətində olduğuna işarə edib:

“Ukrayna o vaxt bizim tanıdığımız Ukrayna deyildi. Ölkə Timoşenko və Yuşşenko kimi islahatçı qüvvələr arasında parçalanmış vəziyyətdə idi. Üstəlik, Rusiya tərəfdən baxanda bu qərar açıq-aşkar müharibə elanı idi. Rusiya liderinin fikrini bölüşməsəm belə, onun necə düşündüyünü bilir və Putini daha da təxribata çəkmək istəmirdim”.

Ukraynanın artıq oliqarxlar tərəfindən idarə edilmədiyini vurğulayan Merkel, Ukrayna lideri V. Zelenskinin müharibə dövründəki rəhbərliyini yüksək qiymətləndirib və onun indi yeni Ukraynanı təmsil etdiyini bildirib.

Özünə qarşı tənqidlərə gəldikdə “Ukraynaya vaxt qazandırdığını” iddia edən Merkel deyib:

“Bir gündə NATO-ya üzv ola bilməzsiniz, bu bir prosesdir və mən bilirdim ki, Putin bu ölkədə yaxşı olmayan bir iş görəcək. Biz Ukraynanın indiki ölkəyə çevrilməsini istəyirik. Bunun üçün də biz vaxt qazandırdıq”.

Sovet İttifaqının dağılmasının yaratdığı geosiyasi problemləri 16 illik hakimiyyəti dövründə hiss etdiyini deyən sabiq baş nazir “Soyuq müharibəni düzgün şəkildə bitirmək mümkün olmadı. Rus məsələsi həmişə qalıb”,- deyib.

Merkel, vəzifədə olduğu müddətdə son bir neçə həftədə qatıldığı G20 sammitində işğal ehtimalını ciddi qəbul etməyə başladığını bildirib: “Romada keçirilən G20 sammitində bəzi ipucları var idi. Biz bu haqda çox danışdıq və mən başa düşdüm ki, Putin Minsk prosesini bitirib. Baş verənlər Rusiya üçün çox böyük səhvdir. Bu, bizə Avropada dinc yaşamağımıza imkan verən beynəlxalq hüququn bütün qaydalarının obyektiv şəkildə pozulmasıdır. Mən açıq şəkildə bildirmək istərdim ki, Putinlə eyni fikri bölüşmürəm, lakin biz Ukraynada müharibənin qarşısını ala biləcək təhlükəsizlik arxitekturasını yarada bilmədik. Biz də bu barədə düşünməliyik”.

Merkel həmçinin Almaniyanın onun rəhbərliyi altında “Rusiyanın Qərblə ticarət əlaqələrini genişləndirməklə demokratikləşə biləcəyi illüziyasına malik olması” ilə bağlı tənqidləri də rədd edib. Onun sözlərinə görə, Putinin ticarət yolu ilə dəyişə biləcəyinə inanmayıb: “Siyasi əməkdaşlıq mümkün olmazsa, Moskva ilə ən azı bir qədər iqtisadi əlaqələrin olması məntiqlidir”.

Məlumat üçün qeyd edək ki, Merkel dörd müddət kansler olduqdan sonra ötən il siyasət meydanını tərk edib. Ukraynadakı müharibə onun fəaliyyətini yenidən qiymətləndirməsinə səbəb olsa da, Merkel Avropada sabitləşdirici fiqur kimi təqdim olunur.

Ana səhifəyə dön