Makronla Baydenin gizli danışığı üzə çıxıb

ABŞ prezidenti Co Bayden və Fransa prezidenti Emmanuel Makronun neft böhranı ilə bağlı ikili danışığı kameralara tuş gəlib. Baydenin milli təhlükəsizlik müşaviri Cek Sallivan liderlərə jurnalistlərlə bağlı xəbərdarlıq etsə də, Makronun sözləri eşidilib.

Reyting.az xəbər verir ki, Almaniyanın ev sahibliyi ilə dünyanın 7 ən güclü iqtisadiyyatına malik ölkə liderləri Bavariya əyalətindəki Elmau qalasında bir araya gəlib. Tədbirdə ABŞ, İngiltərə, Fransa, Almaniya, Kanada, İtaliya və Yaponiya ilə yanaşı, Avropa Şurası və Komissiyasının, Birləşmiş Millətlər Təşkilatının, Ümumdünya Səhiyyə Təşkilatının (ÜST), Ümumdünya Ticarət Təşkilatının (ÜTT), Beynəlxalq Valyuta Fondunun (BVF), Dünya Bankının, Beynəlxalq Əmək Təşkilatının (BƏT), İqtisadi Əməkdaşlıq və İnkişaf Təşkilatının (OECD) və Beynəlxalq Enerji Agentliyinin (IEA) də nümayəndələri iştirak ediblər.

İyunun 26-28-də keçirilən sammitin son günü C. Bayden və E. Makronun çıxışları ilə yadda qalıb.

Bayden və Makron jurnalistlərdən bir neçə metr aralıda neft böhranından danışmağa başlayıblar. Jurnalistlərin həmin anda səsyazma apardığını görən Baydenin milli təhlükəsizlik müşaviri C. Sallivan dərhal Makronun sözünü kəsərək, “ehtiyatlı olun, kameralar səsyazma aparır. Bəlkə içəridə davam etməlisiniz”,- deyə liderləri xəbərdar edib. Xəbərdarlıqdan sonra liderlər çıxışlarını yarımçıq kəssələr də, Makronun bəzi sözləri aydın eşidilib.

“Newyork Post” qəzetində yer alan xəbərə görə, Fransa lideri Birləşmiş Ərəb Əmirlikləri lideri Şeyx Məhəmməd bin Zayed əl-Nahyan ilə keçirdiyi görüşə toxunaraq “onunla telefonla danışdım. Mənə “Maksimum istehsal gücü”,- dedi. Səudiyyəlilər qiyməti bir az da qaldıra bilər. Amma onların böyük gücü yoxdur, heç olmasa altı aylıq müddətə…”, - ifadələrini işlədib.

Makronun dedikləri ABŞ mətbuatında “pis xəbər” kimi şərh edilib. Gələn ay Səudiyyə Ərəbistanına səfəri zamanı ABŞ prezidenti C. Baydenin ərəb rəsmiləri ilə görüşəcəyi və Ukraynaya müdaxilə ilə bağlı neft qiymətlərindəki artımın yumşaldılmasına kömək edəcək addımlar atacağı gözlənilirdi.

Qeyd edək ki, ABŞ-da artan neft qiymətləri 1981-ci ildən bəri ən pis inflyasiyaya səbəb olur, eyni zamanda C. Baydenin etimad səsini aşağı salır.

G7 sammitində liderlərin Rusiyaya qarşı yeni sanksiyalar tətbiq edəcəyi vədindən sonra neftin qiyməti qalxıb. Bu gün səhər saatlarında Brent markalı neftin bir barelinin qiyməti 1,7 faiz artaraq 112,86 dollar olub.

Xatırladaq ki, Ağ Evin dünənki bəyanatında deyilir: “G7 liderləri Rusiya silah sənayesini dəstəkləyə biləcək Qərb texnologiyalarına çıxışını daha da məhdudlaşdırmaq üçün məqsədyönlü sanksiyaları genişləndirəcək”.

Eyni bəyanatda Rusiya mallarından alınacaq gömrük rüsumlarının Ukraynaya yardım kimi istifadə edilməsinə razılıq verildiyi bildirilib.

Digər tərəfdən, ABŞ, İngiltərə, Almaniya, İtaliya, Fransa, Yaponiya və Kanadadan ibarət olan G7 liderləri inkişaf etməkdə olan ölkələrin infrastrukturunun maliyyələşdirilməsi üçün 600 milyard dollar vəsait ayırmağa qərar veriblər.

Ana səhifəyə dön