Özbəkistan hadisələri: minlərlə insan xəstəxanalardadır, etirazçılar sakitləşmir

Özbəkistanın Qaraqalpaqıstan vilayətinin səlahiyyətliləri bildiriblər ki, cümə günü baş verən zorakılıqlardan sonra minlərlə insan xəstəxanalara yerləşdirilib.

Reyting.az xəbər verir ki, regional səhiyyə naziri paytaxt Nukusda xəstəxanaların xəsarət alanlarla dolu olduğunu deyib.

Xatırladaq ki, regionun Özbəkistandan ayrılmaq hüququnu geri almaq planlarına etiraz edən insanlarla təhlükəsizlik qüvvələri arasında toqquşma baş verib.

Özbəkistan lideri Şovkət Mirziyoyev bildirib ki, referendumda Qaraqalpaq vilayətinin hüquqlarının əlindən alınması kimi məsələlər olmayacaq. O, sadəcə, bu mövzuda ictimai müzakirələrin aparıldığını deyib.

Bununla belə, regional nümayəndələrlə görüşən Özbəkistan lideri ölkədə sabitliyi pozmağa çalışan bədxah qüvvələri ittiham edib.

Mirziyoyev bildirib ki, fəallar silahlanmaq üçün yerli hökumət binalarını ələ keçirməyə cəhd göstəriblər.

Qeyd edək ki, Özbəkistan keçmiş sovet respublikalarının ən repressiv hökumətlərindən biri kimi tanınır.

32 milyon əhalisi olan Özbəkistanda iki milyona yaxın insan Aral dənizi yaxınlığında, əksəriyyəti səhra olan Qaraqalpaqıstanda yaşayır.

Bölgədə fövqəladə vəziyyət elan edildikdən sonra polis və ordunun paytaxt Nukusun küçələrində patrul təşkil etdiyi bildirilir.

Mühacirətdə olan müxalif siyasətçi Pulan Ahunov deyib ki, fövqəladə vəziyyətlə əlaqədar insanlar məlumat almaqda çətinlik çəkirlər.

Müxalifətdə olan Birlik Partiyasının lideri Ahunov bildirib ki, yaranmış vəziyyətin özbəklər və qaraqalpaqlar arasında etnik münaqişəyə çevriləcəyindən ehtiyat edir.

İsveçdə yaşayan Ahunov diqqətə çatdırıb ki, bir çox yerlərdə hələ də nümayişlər keçirilir. Onun sözlərinə görə, ümumi vəziyyət sakitləşməyə başlasa da, amma başqa təhlükə var. Qaraqalpaqlarla özbəklər arasında qarşıdurma şiddətlənə, vəziyyət tamamilə nəzarətdən çıxa bilər.

Özbəkistanda nəzərdə tutulan konstitusiya dəyişiklikləri ilə bağlı Qaraqalpaqıstan Respublikasında keçirilən etirazlardan sonra bölgədə fövqəladə vəziyyət elan edilib.

Məlumat üçün qeyd edək ki, Özbəkistanda iyunun 26-da ictimai müzakirəyə çıxarılan konstitusiya dəyişiklikləri ilə bağlı qanun layihəsi Qaraqalpaqıstanda etirazlara səbəb olub, paytaxt Nukusda yüzlərlə insan bir araya gələrək layihəyə sərt reaksiya verib. Özbəkistan prezidenti Şavkat Mirziyoyev konstitusiyaya edilməsi planlaşdırılan dəyişikliklərdən geri çəkildiyini Qaraqalpaqıstan vilayətinin muxtar orqanlarına çatdırıb.

Mirziyoyev vətəndaşların təhlükəsizliyini təmin etmək, hüquq və azadlıqlarını qorumaq məqsədilə Qaraqalpaqıstanda bu gündən avqustun 2-dək davam edəcək fövqəladə vəziyyət elan olunduğunu açıqlayıb.

Analitiklər isə bildirir ki, Özbəkistanda baş verənlərdə üçüncü qüvvənin əli var. Bunun daha çox Rusiya və ya ona bağlı qüvvələr ola biləcəyi ehtimal olunur.

Ana səhifəyə dön