Azərbaycanda xidmət etmiş Bəxtiyar Ersaya general-leytenant rütbəsi verilib

Ötən ilin avqustunda Türkiyə Ali Hərbi Şurasının qərarı ilə Azərbaycan Xidmət Qrupu Komandanlığına təyinat alan Türkiyə Quru Qoşunlarının əməliyyat üzrə rəisi, general-mayor Bəxtiyar Ersay bu ilin avqustundan Türkiyə Silahlı Qüvvələrinin Quru Qoşunlarının 7-ci korpusuna komandan təyin edilib.

Reyting.az xəbər verir ki, Türk ordusunda “əfsanəvi komandir” kimi tanınan general Bəxtiyar Ersay illər əvvəl Balyoz cinayəti üzrə həbs edilib və 31 ay cəzaçəkmə müəssiəsində saxlanılıb. Daha sonra barəsində 16 il həbs qərarı verilib. Balyoz əməliyyatında məqsəd Türk ordusunda xüsusi imici olan milli zabitlər haqqında mənfi reputasiya yaratmaq olub. Həmin dövrdə Ersay polkovnik rütbəsi daşıyıb.

Bir neçə gün əvvəl Türkiyə Ali Hərbi Şurasının qərarı ilə Bəxtiyar Ersay general-leytenant rütbəsinə layiq görülüb və Diyarbəkrdə Quru Qoşunlarının yeddinci korpusuna komandan təyin edilib.

Polkovnik rütbəsində 31 ay həbsdə yatan Ersay, Hasdal və Hadımköy həbsxanasında saxlandıqdan sonra saxta və uydurma sübutlarla 16 il həbs cəzasına məhkum edilib. Balyoz və Ergenekon olmaqla bir çox sui-qəsd işlərinə baxılan Ali Apellyasiya Məhkəməsinin 9-cu Cəza Kollegiyasının nümayəndə heyəti ləğv edilərək hərbçilərin işləri 16-cı Cəza Kollegiyasına təhvil verilib. Cinayət işləri yeni yaradılan komissiya tərəfindən diqqətlə araşdırılıb və Ersay başda olmaqla millətçi zabitlər bəraət alıb.

Bəraət alan Ersaya general-mayor rütbəsi verilib və Hakkarinin Çukurca 2-ci Sərhəd Briqadası komandanlığına təyin edilib. Bəxtiyar Paşa bu vəzifəni yerinə yetirərkən iyulun 15-də FETÖ tərəfindən çevriliş cəhdi olub. Lakin o, öz qoşunları ilə PKK terrorçularına qarşı əməliyyatlara rəhbərlik edib. “Sərhəd Qartalları” kimi tanınan bölmənin rəisi Bəhtiyar Ersay Kaletəpəni terrorçulardan təmizləyib.

207 terrorçunu zərərsizləşdirən Bəxtiyar Paşa Kaletəpə və Dağbaşı təpələrində sərhəd təhlükəsizliyini təmin edib. O, terrorçuların sızmaq üçün yeddi cəhdini dəf edib.

Qeyd edək ki, İşıqlar Hərbi Liseyini və Hərbi Akademiyanı bitirən Bəxtiyar Paşa son olaraq Bakıda Azərbaycan Əməliyyat Qrupu komandanı kimi xidmət edirdi. Bugünkü təyinat qərarı ilə Malatya 2-ci Ordu Komandanlığının 7-ci korpusuna komandan təyin edilib.

İraq və Suriya sərhədində sərhəd təhlükəsizliyi və buradan gələn təhdidlərin önünü kəsməkdə məsuliyyət daşıyan 7-ci ordu korpusunun tərkibində 3-cü taktiki piyada diviziyası, 34-cü sərhəd briqadası, 16-cı mexanikləşdirilmiş briqada, 20-ci zirehli briqada, 70-ci mexanikləşdirilmiş piyada briqadası, 172-ci zirehli briqada, 2-ci və 6-cı motoatıcı briqada, 3-cü komando briqadası və 107-ci komando briqadası var.

Onu da qeyd edək ki, Azərbaycan cəmiyyəti general Bəxtiyar Ersayın adını daha çox 44 günlük vətən müharibəsi və ondan sonrakı dövrlərdə eşidib. Bu cəsur türk generalına Azərbaycandakı xidmət qrupunda təmsilçilikdən sonra həm general-leytenant hərbi rütbəsi verilib, həm də Türkiyə Respublikasının İraq və Suriya ilə sərhədlərinin qorunması ona həvalə olunub.

Ana səhifəyə dön