Zərdüşt Əlizadə: “Paşinyan Qarabağ məsələsindən əl çəksə, onu öldürərlər”

“Belovej razılığında xəritələr məsələsi danışılmayıb. Orada SSRİ-nin buraxılması məsələsi ilə yanaşı MDB-nin yaranması məsələsi müzakirə olunurdu”.

Reyting.az xəbər verir ki, bu sözləri Yenisabah.az-a politoloq Zərdüşt Əlizadə deyib.

Zərdüşt Əlizadə Ermənistanın Baş naziri Nikol Paşinyanın Paris səfəri çərçivəsində Ermənistan-Azərbaycan sərhədlərinin tanınması istiqamətində səsləndirdiyi fikirlərə də münasibət bildirib.

Xatırladaq ki, erməni nazir Ermənistanın Azərbaycanın ərazi bütövlüyünü tanıdığını qeyd edib və buna misal kimi 8 Dekabr 1991-ci il Belovej razılığını göstərib.

Qeyd edək ki, həmin razılaşma SSRİ-nin faktiki olaraq dağılması və MDB-nin yaranmasını özündə ehtiva edir.

Z. Əlizadə mövzu ilə bağlı deyib ki, oradakı üç slavyan ölkəsi – Rusiya, Belarus və Ukrayna mövcud sərhədlər daxilində bir-birinin ərazi bütövlüyünü tanıyıb və nəzərdə tutublar ki, SSRİ dövründəki inzibati sərhədlər bundan sonra dövlət sərhədi sayılmalıdır: “Lakin MDB-nin yaranması barəsində olan və Boris Yeltsin, Ayaz Mütəllibov, Leonid Kravçuk, Nursultan Nazarbayev və digərlərinin iştirakı ilə keçirilən görüşdə deyilib ki, SSRİ-nin inzibati əraziləri dövlət sərhədləridir”.

Politoloq əlavə edib ki, Ermənistanla Azərbaycan BMT üzvlüyünə qəbul olunub və BMT nizamnaməsinə görə, dövlətlər bir-birinin ərazilərinə iddia edə bilməzlər: “Onlar da dolayısı yolla ərazi bütövlüyümüzü tanıyıblar. Bu barədə Ermənistanın ilk prezidenti Levon Ter-Petrosyan da dəfələrlə deyib ki, Ermənistan MDB və BMT-yə girəndə Azərbaycanın ərazi bütövlüyünü tanıyıb”.

Z. Əlizadənin sözlərinə görə, burada bir incəlik var: “O da ondan ibarətdir ki, Ermənistan həyasızcasına deyir ki, biz Azərbaycanın ərazi bütövlüyünü tanımışıq, amma Qarabağsız. Çünki Qarabağ 1991-ci ilin sentyabrında artıq öz “müqəddərat”ını təyin etmiş, “referendum” keçirib Azərbaycandan ayrılmışdı.

Lakin bu, riyakarlıqdır, çünki bu “referendum”u dünyada heç kəs tanımayıb, o cümlədən də Ermənistan.

İkincisi, referendum keçirəndə azad, demokratik şərait olmalıdır, nəinki əlisilahlı banditlər dinc camaata qarşı terror etsinlər. Qarabağda isə “referendum” məhz azərbaycanlılara qarşı terror şəraitində keçirilmişdi və məhz buna görə də dünyada onu heç kəs tanımayıb. Yəni tanınmamış bir şeyi həqiqət kimi sırımaq cəhdi yalnız ondan ibarətdir ki, bunların əllərində başqa sübut yoxdur”.

Z. Əlizadə N. Paşinyanın destruktiv ifadələrindən də söz açıb: “O ki qaldı Paşinyanın Qarabağ məsələsini ortaya qoymasına, o, çox gözəl bilir ki, əgər Qarabağ məsələsindən əl çəksə, ordu da, fəal mütəşəkkil cinayətkar müxalifət də onu bir dəqiqəyə devirib öldürər. Bu səbəbdən Paşinyan Rusiyadan və Ermənistan müxalifətindən çəkinir, Qarabağın Azərbaycana məxsus olduğunu etiraf etməyə cəsarəti çatmır”.

Bəs o, niyə Belovej razılığına istinad edib, axı orada sərhədlər və xəritələr barəsində bir şey yox idi,- sualına Z. Əlizadə belə cavab verib:

“Sözdür, deyir də... Siz Paşinyanın sözlərində hansısa bir məntiq tapmısınızmı? Şuşada hoppanıb yallı gedəndə, deyəndə ki, “Qarabağ Ermənistandır”, o gələcəyi düşünürdü? Yox! Yaxud düşünürdüsə belə, qəsdən elə edirdi ki, vəziyyət gərginləşsin. Yəni burada 2 ehtimal var: ya bilirdi, ya da bilmirdi. Bilmirdisə, demək ki, o qeyri-ciddi adamdır, amma o, əgər Ermənistanın Baş naziridirsə, deməli, nə isə bilir. Bilirsə də, o, işləri elə qururdu ki, hakimiyyətini saxlasın, lakin Ermənistan “Qarabağ yükü”ndən xilas olsun. Çünki “Qarabağ yükü” Ermənistanın bir dövlət kimi inkişafına ciddi şəkildə mane olur”.

Ana səhifəyə dön