İrandakı etiraz aksiyalarında güllələnənlərin cəsədləri oğurlanır

İranda Məhsa Əmininin ölümünə etiraz edərkən dünyasını dəyişən 16 yaşlı Nika Şəkərəminin cəsədinin İran rəsmiləri tərəfindən oğurlanaraq gizli şəkildə basdırılması ölkədə müzakirələrə səbəb olub.

Reyting.az xatırladır ki, hicabı düzün taxmadığı üçün keçən ay polis tərəfindən saxlanılan və Tehranda dünyasını dəyişən 22 yaşlı M. Əmininin ölümü ölkədə etirazlara səbəb olub. Nümayişlərdə çoxsaylı insan həyatını itirib və aksiyanın minlərlə iştirakçısı saxlanılıb.

Məlumata görə, Nika sentyabrın 20-də Tehranda iştirak etdiyi etiraz aksiyaları zamanı yoxa çıxıb. Onun cəsədinin xeyli müddət “morq”da qaldığı bildirilir. “BBC Farsian”ın xəbərinə görə, İran təhlükəsizlik işçiləri sonradan gənc qızın cəsədini oğurlayıblar.

Mənbələrin radiostansiyaya verdiyi məlumata görə, ailəsinin bazar ertəsi dəfn etməyi planlaşdırdığı Nikanın cəsədini qaçıran İran səlahiyyətliləri gənc qızı gizli şəkildə başqa bir kənddə dəfn ediblər.

Gənc qızı doğulduğu Huramabadda dəfn etmək qərarına gələn ailə sonradan meyitin oğurlandığını öyrənib. Məlum olub ki, təhlükəsizlik qüvvələri qızın cəsədini qaçıraraq Vesiyan kəndində, gizli şəkildə dəfn ediblər.

Hadisə sosial mediada böyük əks-səda doğurub, yüzlərlə insan gənc qızın cəsədinin qaçırılmasına görə hökumət əleyhinə şüarlar səsləndirib. Nümayiş zamanı İranın ali dini lideri Ayətullah Əli Xamenəiyə qarşı “Diktatora ölüm!” şüarları da eşidilib.

Sosial şəbəkələrdə yayılan mesajlarda bildirilir ki, gənc qızın bibisi də saxlanılaraq ölümlə hədələnib.

Sentyabrın 21-də Tehran yaxınlığındakı nümayişdə güllələnən 22 yaşlı Hədis Nəcəfinin də cəsədi ailəsinə verilməyib. Polis gənc qadının ailəsini “ürək krizindən öldüyünü” deməyə məcbur edib.

Bildirilir ki, İranda etiraz aksiyaları artıq orta məktəbləri də əhatə edir. Kerac şəhərindəki orta məktəbdə dərsləri boykot edən şagirdlər İranın keçmiş və indiki ali dini liderlərinin sinif otaqlarında asılmış şəkillərini sosial şəbəkələrdə paylaşaraq “Mollalar yoxa çıxmalıdır!” şüarını səsləndiriblər.

Şiraz şəhərində onlarla orta məktəb şagirdi olan qızlar əsas yolu nəqliyyatın hərəkətinə bağlayaraq “Diktatora ölüm!” şüarları səsləndirib, hicablarını çıxarıblar.

Bəzi lisey şagirdləri isə Xomeyni və Xamnəinin sinif otaqlarında olan fotoları qarşısında başları açıq vəziyyətdə dayanaraq fotolarını paylaşıblar.

Norveç mərkəzli İran insan haqları təşkilatı dünənki açıqlamasında bildirib ki, təhlükəsizlik qüvvələri tərəfindən indiyədək ən azı 154 etirazçı öldürülüb. İranın dövlət televiziyası isə ölkədə baş verən etirazlarda polis zabitləri və İnqilab Keşikçiləri Korpusunun əsas milislərinin üzvləri də daxil olmaqla, azı 41 nəfərin öldürüldüyünü iddia edir.

Ana səhifəyə dön