Ruslar geri çəkilir - Ukraynanın növbəti hədəfi Xersondur

Ukrayna hərbçiləri Rusiyanın işğal etdiyi əraziləri geri qaytarmaq üçün əks-hücum əməliyyatlarını davam etdirir. Son zamanlar ciddi irəliləyiş əldə edən Ukrayna ordusu cənub cəbhəsində Xerson şəhərinə yaxınlaşır.

Reyting.az xəbər verir ki, müharibənin əvvəlində Rusiyanın işğal etdiyi və “referendum”la ilhaq olunan bölgələr sırasında Xerson xüsusi əhəmiyyət kəsb edir.

Son məlumatlara görə, Ukrayna qüvvələri Xerson vilayətində “açar kənd” də daxil olmaqla bir sıra yaşayış məntəqələrini azad edib.

Müdafiə Nazirliyinin paylaşdığı videoda 35-ci Dəniz Piyadaları Briqadasının daha bir kəndə Ukrayna bayrağı sancdığı görünür. Bölgənin paytaxtı Xerson şəhəri Rusiya qüvvələrinin nəzarətində olsa da, ruslar, Dnepr çayının şimalındakı bölgəni saxlamaqda çətinlik çəkirlər.

Ukrayna prezidenti Volodimir Zelenski xalqa müraciətində deyib ki, bu həftə ərzində Ukraynanın cənubunda tez və güclə hərəkət edərək onlarla yaşayış məntəqəsini geri alıblar.

Ukrayna administrasiyası ilhaq edilmiş dörd bölgədə irəliləyiş əldə etdiklərini açıqlayıb.

Rusiya Müdafiə Nazirliyinin təqdim etdiyi son xəritələr də göstərir ki, Rusiya qüvvələri Ukraynanın əks-hücum əməliyyatına görə ciddi təzyiq altındadır, Ukraynanın şərq və cənub bölgələrindən sürətlə geri çəkilirlər. Xersonda ruslar tərəfindən təyin edilmiş yerli rəhbər Kirill Stremousov isə bildirib ki, panika üçün heç bir səbəb yoxdur.

Kremlin sözçüsü Dmitri Peskov Rusiya ordusunun geri çəkildiyi bölgələrlə Ukraynanın ilhaq etdiyi bölgələr arasında heç bir ziddiyyət olmadığını deyib. O, bu bölgələrin də geri alınacağını bildirib.

Xatırladaq ki, bir müddət əvvəl Rusiya prezidenti Vladimir Putin Ukraynanın şərqindəki Donetsk, Luqansk, Zaporojya və Xerson vilayətlərinin Rusiyaya birləşdirilməsi haqqında qanunu imzalayıb. Kreml bildirir ki, Putin 4 rayonun Rusiya ərazisinə birləşdirilməsi ilə bağlı ayrı-ayrı fərmanlar imzalayıb. Bununla da bölgələr Rusiya Federasiyasının tərkibinə daxil edilib.

Bu arada Avropa İttifaqına (Aİ) üzv ölkələr Rusiyaya qarşı 8-ci sanksiyalar paketi ilə bağlı razılığa gəliblər. Aİ-nin Xarici Əlaqələr və Təhlükəsizlik Siyasəti üzrə Ali Nümayəndəsi Josep Borrell deyib:

“Aİ vətəndaşları və cəmiyyətimiz olaraq bunun əvəzini bu gün ödəməliyik. Bu qiyməti bu gün ödəməsək, sabah daha yüksək qiymətlər ödəməli ola bilərik. Bu müqavimət ukraynalıların azadlığı və bizim azadlığımız üçündür”.

Onu da qeyd edək ki, V. Putin Zaporojye Atom Elektrik Stansiyasının mülkiyyətinin Rusiyaya verilməsi haqqında da fərman imzalayıb. Fərmanda enerji, fəaliyyət və bütün digər əmlakın da Rusiyaya bağlı olduğu və zavodun təhlükəsizliyinə cavabdehliyin də Rusiyada olduğu bildirilib. Digər tərəfdən, Beynəlxalq Atom Enerjisi Agentliyi (BAEA) həftə sonu rus əsgərləri tərəfindən qaçırılan və daha sonra sərbəst buraxılan Zaporojya AES-in baş direktoru İqor Muraşovun vəzifəsinə qayıtmayacağını açıqlayıb.

Ana səhifəyə dön