Rəsul Quliyev: “...İran Azərbaycanla yaxınlaşmağa üstünlük verəcək”

“Praqa görüşündə razılıq əldə edilmiş maddələr əsasında müqavilə bağlanarsa, bu müqaviləni cəsarətlə Azərbaycanın tarixi müqaviləsi adlandırmaq olar. Eyni zamanda hesab edirəm ki, bu görüşləri təkcə iki ölkə arasında səmərəli görüş adlandırmaq olmaz. Çünki bu görüş faktiki olaraq, çox böyük bir ərazidə Qafqaz-Türkiyə-İran (təqribən 180 milyon insanın yaşadığı bir ərazi) uzunmüddətli, bəlkə də əbədi sülh və əmin-amanlığın bərqərar olması deməkdir. Azərbaycanlılar bu görüşlər və əldə edilmiş nəticələrlə fəxr etməlidir, çünki Azərbaycan bu görüşlərin keçirilməsinin təşkilatçısı, əsas təşəbbüskarıdır. Bu müqavilə bağlanarsa, heç şübhəsiz ki, bütün dövlətlər və onların xalqları udacaq. İlk növbədə də Ermənistan”.

Reyting.az xəbər verir ki, bunu Milli Məclisin sabiq sədri Rəsul Quliyev deyib.

Onun sözlərinə görə, Paşinyan bu müqavilənin bağlanmasının əsas düşməni olan, Ermənistanda Azərbaycana qarşı sərhəddə təxribatlar yaradan Köçəryan, Sarkisyan və o tipli bir çoxlarını qızışdıran, maliyyələşdirən Rusiya Federasiyasından nəhayət yaxasını qurtara bilər: “Ermənistan Türkiyənin investisiya və digər proyektlərindən istifadə edə, dünyanın sivil ölkələri ilə ticarət-investisiya əlaqələrini gücləndirə bilər”.

R. Quliyev əlavə edib ki, regionda marağı olan ölkələrin kəşfiyyat idarələri Paşinyanı dəstəkləyən ermənilərin əksəriyyətinin müharibə istəmədiyini, Türkiyə ilə əlaqələrin yaradılmasında və inkişafında maraqlı olduğunu bilir və bunları öz hesabatlarında göstərirlər.

Sabiq spiker bildirib ki, ermənilərin əksəriyyəti Dağlıq Qarabağ məsələsinin müzakirəyə çıxarılmasını istəmir, Azərbaycan ərazilərində yaşayan ermənilərin Azərbaycan vətəndaşı kimi yaşamasını düzgün sayırlar: “Paşinyan erməni xalqı ilə birlikdə bu normal gələcəyi seçmək əzmindədirsə, ən geci bu ilin sonunadək Azərbaycan hökumətinin verdiyi 5 təklifin əsasında yaradılıcaq hüquqi müqaviləyə imza atmalı və həm də bu müqavilə ilə yanaşı qonşu Azərbaycan-Türkiyə ilə diplomatik əlaqələr yaratmalıdır. Sözsüz ki, Rusiya Federasiyası bu müqavilənin bağlanmaması üçün əlindən gələni edəcək. Ancaq yenidən Sovet İttifaqını bərpa etmək niyyəti ilə Ukraynanı işğal etmək istəyən Rusiya bütün dünyadan izoliyasiya edilib. Hətta özünə yaxın hesab etdiyi Çinin də Putin Rusiyası ilə məsafə saxladığı açıq-aşkar görünür. Rusiyanın nüvə silahı ilə dünyanı hədələməsi isə Putinin həddindən artıq cılızlığını göstərir. Sovet vaxtından qalmış silahları ilə vuruşan rusların tam iflasa uğraması nüvə silahlarının da bərbad vəziyyətdə olmasında xəbər verir. Paşinyan nə Rusiyadan, nə də onların maliyyələşdirdiyi daxili ekstremstlərdən qorxmamalı, müqaviləni imzalamaqla daxili naratlığını ləğv etməli və ölkəsinin quruculuğuna başlamalıdır”.

Sabiq spiker diqqətə çatdırıb ki, belə bir müqavilənin bağlanmasının təşəbbüskarı olan Azərbaycan Respublikasının Prezidentinə Praqada göstərilən münasibət - bu münasibətlərin tamamilə başqa bir səviyyəyə qalxmasından xəbər verir: “Əslində Avropa İttifaqı, hətta Fransanın prezidenti Azərbaycanın təşəbbüs və təkliflərini qəbul etdilər və Paşinyanın bu məramnaməyə HƏ deməmək imkanı praktiki qalmayıb. Düzdür, Paşinyan özü bu sənədə imza atmağa maraqlı idi. Bu sənəd imzalandıqdan sonra Rusiya qoşunları, daha doğrusu, orada olan 300-ə yaxın əsgər və zabitin qalmasına ehtiyac olmayacaq. Hesab edirəm ki, ən geci 2023-cü ilin aprelinə qədər sülhməramlılar Azərbaycanımızı tərk etməlidir. Hələ bilmək olmaz ki, Rusiyada proseslər necə inkişaf edəcək. O qüvvələr ya Putini müdafiəsinə, ya da onu devirməyə cəlb edilə bilər”.

Quliyevin fikrincə, Azərbaycanın dünya siyasətində özünə fundamental yer tutması ilə xalqımız fəxr etməlidir: “Heç şübhəsiz ki, bu müqavilədən sonra İran Azərbaycanla yaxınlaşmağa üstünlük verəcək. İran daxildən dağıla bilər. Son 100 ildə İranın daxildən dağılma prosesi artıq 3 dəfə baş verib. İndi dördüncü inqilabın astanasındadırlar. İranın Ermənistana kömək proqramı ölkədə iğtişaşların güclənməsi və siyasi inqilabla nəticələnməsi ilə qurtara bilər. Hesab edirəm ki, Azərbaycanla bağlı xarici siyasətdə İranın səhv etmək şansı da artıq qalmayıb. Azərbaycanın Türkiyə ilə birlikdə Orta Asiya və Pakistanla bağlı strateji siyasi proqramları var, bunlar artıq ortadadır”.

Ana səhifəyə dön