Deputat: “Milli Priventiv qrupun üzvləri 7 il müddətinə seçilməlidir”

“Müzakirə olunan məsələ ilə bağlı onu demək istəyirəm ki, hörmətli Əli Hüseynli ətraflı məlumat verdi, bizim komitədə layihə geniş müakirə olunub və plenar iclasa tövsiyə edilib. Layihə çox mütərəqqidir və mütərəqqi dəyişikliklər nəzərdə tutulub. Amma biz komitə iclasında qaldırdıq, Əli müəllim dedi ki, qanunvericilik təşəbbüsünün subyekti ilə o məsələləri müzakirə edəcək”.

Reyting.az xəbər verir ki, bunu Milli Məclisin bu gün müzakirəyə çıxarılan “Azərbaycan Respublikasının İnsan hüquqları üzrə müvəkkili (ombudsman) haqqında” Azərbaycan Respublikasının Konstitusiya Qanununda dəyişiklik edilməsi barədə Konstitusiya qanununun layihəsinin müzakirəsi zamanı deputat Qüdrət Həsənquliyev deyib.

Q. Həsənquliyev bildirib ki, Konstitusiyaya sonuncu 3-cü dəyişiklikdən sonra yaş məhdudiyyətini aradan qaldırılıb: “Amma “Ombudsman haqqında” qanunda hələ də o məhdudliyyətlər nəzərdə tutulur ki, ombudsman 30 yaşdan yuxarı olmalıdır. Ombudsman iki dəfə seçilməlidir. Amma biz prezidentlə, baş prokurorla bağlı da bu məsələni aradan qaldırmışıq. Yanaşma eyni olmalıdır. Yəni hər hansı vəzifəli şəxsi seçən xalqdırsa, xalq müəyyən eləməlidir ki, həmin şəxs vəzifədə, hakimiyyətdə nə qədər qala bilər. Yaxud onu prezident, Milli Məclis təsdiq edirsə, yenə də prezident və Milli Məclis müəyyən edə bilər ki, ona neçə müddət etibar etmək olar. Yəni yanaşma eyni olmalıdır. Hesab edirəm ki, bu məsələni hörmətli Əli müəllim müvafiq dövlət orqanları qarşısında qaldıracaq və bu, məsələ öz həllini tapmalıdır”.

Deputat əlavə edib ki, digər bir məsələ məhkumluqla bağlıdır:

“Əvvəllər məhkumluq məsələsi çıxarılır və hazrda məhkumluğu olan, xüsusilə ağır cinayətlərə görə, məhkum olan şəxs Milli Priventiv qrupun üzvü ola, eləcə də ombudsman seçilə bilməz. Yəni bu müddəa öz əksini tapır.

Yeri gəlmişkən qeyd etmək istəyirəm ki, 44 günlük müharibə dönəmimdə ombudsman çox fəal idi. Həqiqətən də ombudsman özünün beynəlxalq əlaqələrindən istifadə edərək erməni faşistlərinin törətdiyi cinayətlərin beynəlxalq ictimaiyyətə çatdırılmasında çox ciddi şəkildə iştirak etdi. Həm də müharibədən sonrakı dönəmdə də bu fəaliyyət davam etdirildi. Bunu qeyd etmək lazımdır.

Hesabatda digər pozuntularla bağlı da kifayət qədər məlumatlar var. Hesab edirəm ki, müvafiq dövlət orqanları həmin pozuntuların aradan qaldırılması istiqamətində ciddi işlər görməlidir. Mənim yanaşmam belədir ki, bir uşağın bağçaya düzəlməsi ən ciddi məsələdir. Ona görə ki, uşaqların təhsili bağçadan başlayır. Bəlkə də həmin uşaq gələcəkdə prezident, nazir, deputat, Azərbaycanı tanıdan bir alim olacaq və s. Ona görə də hər şey oradan başlamalıdır”.

Q. Həsənquliyev bildirib ki, ombudsman yanında Milli Priventiv qrupun üzvləri 3 il müddətinə təyin olunurlar: “Məncə, ombudsman kimi onlar da 7 il müddətinə seçilməlidir. Bir də onların işinə mane olmağa görə, qanunda birbaşa yazılmalıdır ki, cinayət məsuliyyəti nəzərdə tutulur. Belə ki, onların fəaliyyətinə 5-10 dəqiqə mane olmaq böyük bir cinayətin ört-basdır edilməsinə gətirib çıxara bilər. Mən hesab edirəm ki, bu məsələ də qanunda öz əksini tapmalıdır. Bütün dəyişiklikləri mütərəqqi hesab edirəm, həmkarlarımı layihəyə səs verməyə çağırıram”.

Ana səhifəyə dön