Tahir Budaqov: "YAP-ın təklifi nəzərə alınmayıb"

“Qanun layihəsinin 5.3-cü və 18.6-cı bəndlərinin izah edilməsini istəyəcəkdim. Çünki yerli təşkilatlarda bəlkə minlərlə üzv var. Ona görə də bu məsələ dəqiqləşdirilməlidir”.

Reyting.az xəbər verir ki, bunu Milli Məclisdə bu gün keçirilən “Siyasi partiyalar haqqında” yeni hazırlanan qanun layihəsinin ictimai müzakirəsində Yeni Azərbaycan Partiyası (YAP) sədrinin müavini – Mərkəzi Aparatın rəhbəri Tahir Budaqov deyib.

O bildirib ki, partiya insanları əqidəyə görə qəbul edir və layihədə bu barədə maddəyə yenidən baxılmalıdır:

“Növbəti məsələ 30.1-ci maddə ilə bağlıdır. Reyestrlə bağlı məsələ günün tələbidir, aktualdır. Bütün dünyada proseslər elektronlaşma üzərində qurulub. Reyestrin təqdim edilmə forması dəqiqləşdirilməlidir. YAP 800 min insanın siyahısını çap edib təqdim etməlidir, ya necə?! Partiyaların da bir çoxunun maddi resursları o qədər deyil ki, bunu etsin. Reyestrə üzvlər elektron qaydada da daxil edilməlidir. Torpaqla bağlı məhdudiyyətin götürülməsini YAP təklif etmişdi, amma bu təklifimiz nəzərə alınmayıb. Bu məsələyə də dəqiqlik gətirilsin. Kommersiya məqsədli torpağı əkib-becərmək üçün mülkiyyətə verilməməsi ilə razıyam, amma inzibati binalarının tikilməsi üçün torpaqların partiya mülkiyyətinə verilməsinə məhdudiyyət qoyulması məntiqə uyğun deyil”.

Qeyd edək ki, qanun layihəsinin 5.3-cü maddəsinə əsasən, təsis yığıncağında siyasi partiyanın nizamnaməsi və proqramı qəbul olunur, təmsilçilik məqsədilə təsisçilər sırasından səlahiyyətli şəxs müəyyən edilir. Bu Qanunun 5.7-ci maddəsinə uyğun olaraq siyasi partiyanın nizamnaməsində və proqramında çatışmazlıqlar aşkarlanarsa təsis yığıncağında həmin sənədlərdə müvafiq dəyişikliklər edilir. Siyasi partiyanın təsis yığıncağının nəticələri protokolla rəsmiləşdirilir. Təsis yığıncağının protokolunda, o cümlədən təsisçilərin və səlahiyyətli şəxsin adı, soyadı, atasının adı, həmçinin fərdi identifikasiya nömrəsi, doğulduğu tarix, qeydiyyat ünvanı və əlaqə telefon nömrəsi göstərilir.

Layihənin 18.6-cı maddəsidə qeyd olunur ki, yerli təşkilatda yuxarı orqan ümumi yığıncağdır (konfrans və s.). Ümumi yığıncağda siyasi partiyanın yerli təşkilatında qeydiyyatda olan üzvlər iştirak edir. Ümumi yığıncağda yerli təşkilatın fəaliyyətinə dair hesabat dinlənilir, siyasi partiyada müəyyən olunmuş nümayəndəlik normasına uyğun olaraq siyasi partiyanın qurultayına nümayəndələr seçilir və siyasi partiyanın nizamnaməsinə uyğun olaraq digər məsələlər həll edilir.

Qanun layihəsinin 30.1-ci maddəsinə görə, bu Qanun qüvvəyə minənədək dövlət qeydiyyatına alınmış siyasi partiya bu Qanunun qüvvəyə mindiyi tarixdən 90 gün müddətində üzvlərinin sayının bu Qanunun 6.1-ci maddəsində nəzərdə tutulmuş saya çatdırılması üçün tədbirlər görür və bu Qanunun 20.10-cu maddəsinə uyğun olaraq üzvlərinin reyestrini tərtib edərək müvafiq icra hakimiyyəti orqanının müəyyən etdiyi orqana (quruma) təqdim edir.

Ana səhifəyə dön