Xalqımız sarsılmaz birliyin böyük zəfərini qeyd edir

Bu günlər xalqımız Qələbə bayramını qeyd edir, qürurlu Zəfər günlərini yaşayır. 44 günlük Vətən Müharibəsində erməni faşizmi üzərinə Azərbaycanın tarixi qələbəsindən iki il ötür. Dünya hərb tarixinə qızıl hərflərlə yazılacaq 44 günlük Vətən Müharibəsi məhz bu tarixdə - 2020-ci ilin 8 noyabrında Azərbaycan Silahlı Qüvvələrinin misilisiz şücaət və qəhrəmanlığı nəticəsində Şuşa şəhərinin düşməndən azad edilməsi ilə öz tarixi sonluğuna çatdı.

Reyting.az xəbər verir ki, bu sözlər Böyük Quruluş Partiyasının (BQP) Vətən Müharibəsində Zəfərin ikinci ildönümü ilə bağlı bəyanatında öz əksini tapıb.

BQP-nin bəyanatında daha sonra qeyd olunur ki, Vətən Müharibəsində Azərbaycan təkcə Ermənistanın özünə deyil, millətçi-faşist ölkəyə maddi, hərbi, siyasi, informasiya və digər sahələrdə hərtərəfli dəstək göstərən və yardımlar edən dövlətlərə və dünya erməniliyinə qalib gəlib və hüdudsuz erməni iddialarının “böyük Ermənsitan" xülyalarını məhv edərək, onlara yaddan çıxara bilməyəcəkləri dərsi verib.

BQP bəyan edir ki, xalqımıza qürurverici zəfərin yaşadılması mühüm amillərin bir arada cəmləşməsi sayəsində mümkün olub:

“Sarsılmaz Xalq-Dövlət-Ordu birliyinin reallığı, Azərbaycan Respublikasında güclü iqtisadiyyatın mövcudluğu, ölkənin müdafiə qüdrətinin artırılması, Ordu quruculuğu sahəsində həyata keçirilmiş islahatlar, hərbi büdcə xərclərinin durmadan artırılması və ondan səmərəli istifadə olunması, Azərbaycan Respublikası Müdafiə Sənayesi Nazirliyinin yaradılması, ölkəmizin beynəlxalq nüfuzunun artırılması, qardaş Türkiyə Respublikası başda olmaq şərtilə qlobal və regional miqyasda etibarlı müttəfiqlərin və tərəfdarların qazanılması bu zəfərin gerçəkləşməsinin mühüm şərtlərindən idi.

Təəssüf ki, məğlub ölkə 2020-ci il noyabrın 10-da imzalanan Üçtərəfli Bəyanatla üzərinə müəyyən öhdəliklər götürsə də, qarşıya qoyulan vəzifələri yerinə yetirməkdən müxtəlif bəhanələrlə yayınır. İrəvanda, Xankəndində reallıqları qəbul etmək istəməyən revanşist qüvvələr qisasçı çağırışlarla kütləvi aksiyalar təşkil edir, İran, Fransa, Rusiya və digər dövlətlərin təxribat xarakterli addımları sərhəddə erməni təxribatları ilə birləşərək Azərbaycana əlavə problemlər yaradır.

Bütün bunlara baxmayaraq, bu gün də Ermənistanla aparılan diplomatik danışıqlarda ölkəmiz eyni qətiyyətlə təmsil olunur və təklif etdiyimiz iki dövlət arasında münasibətlərin 5 təməl prinsipləri əsasında sülh danışıqlarını davam etdirərək yekun sülh sazişinin bağlanmasına nail olmaq üçün əlindən gələni edir. Son iki ildə Moskvada, Brüsseldə, Praqada, Soçidə keçirilən danışıqlarda Azərbaycanın marqlarının tam qorunması dövlət başçısının yüksək hazırlığı, diplmatik səriştəsi və qətiyyəti sayəsində mümkün olub.

İşğalçı ölkənin öz daxilində baş verənlərə və beynəlxalq hüququ heçə sayan bədxah qüvvələrin bütün səylərinə baxmayaraq, ümid edirik ki, Qalib Ölkənin maraqlarına tamamilə cavab verən sülh müqaviləsi tezliklə imzalanacaq və bölgəyə uzunmüddətli sabitlik və əmin-amanlıq gələcəkdir.

Böyük Quruluş Partiyası Vətən Müharibəsində şanlı qələbəmizin ikinci ildönümü günlərinə xalqımızı bir daha səmimyyətlə təbrik edir, bu tarixi qələbənin əldə olunmasında öz canlarını qurban verən qəhrəman şəhidlərimizə Uca Allahdan rəhmət diləyir, onların valideynlərinə, ailə üzvlərinə və yaxınlarına sonsuz səbrlər diləyir və istər qalib xaqlın nümayəndələri kimi, istərsə də, siyasi qüvvənin təmsilçisi olaraq olduqca mürəkkəb, həlledici və həssas dövrdə Azərbaycan dövlətinin, Silahlı Qüvvələrimizin və Azərbaycanın beynəlxalq hüquqla tanınan bütün ərazisində ölkəmizin suveren hüquqlarının bərqərar olunması naminə apardığı çətin və olduqca məsuliyyətli fəaliyyətində Ali Baş Komandanın yanında olduğumuzu bir daha bəyan edirik.

Şanlı, Müqəddəs Zəfər Bayramınız mübarək, əziz həmvətənlər, dəyərli Dünya Azərbaycanlıları!”

Ana səhifəyə dön