Şuşa-Xankəndi yolunda aksiya davam edir - (Yenilənib)

Bu gün, yəni 14 dekabr 2022-ci il tarixində də azərbaycanlı QHT rəhbərləri və könüllülərinin Rusiya sülhməramlılarının müvəqqəti nəzarətində olan Şuşa-Xankəndi yolunda etiraz aksiyası davam edir.

Reyting.az xəbər verir ki, iki gündür gecə-gündüz davam edən aksiyaya qoşulanların sayı durmadan artır.

Aksiya iştirakçıları Azərbaycanın ərazi bütövlüyünün müdafiəsi ilə bağlı, ölkəmizin təbii sərvətlərinin qanunsuz istismarına qarşı şüarlar səsləndirirlər.

İştirakçılar Qarabağ iqtisadi rayonunun bəzi ərazilərində müvəqqəti yerləşdirilmiş Rusiya sülhməramlı qüvvələrinin komandanı general-mayor Andrey Volkov əraziyə gələnə qədər etirazlarını davam etdirəcəklərini bildirirlər.

Qeyd edək ki, Şuşa ərazisində Rusiya sülhməramlılarının nəzarətində olan yolun bir hissəsində etiraz aksiyası azərbaycanlı aktivistlər və ekologiya üzrə qeyri-hökumət təşkilatlarının (QHT) üzvləri tərəfindən Qarabağ iqtisadi rayonunda ekoloji terrora son qoyulması tələbi ilə keçirilir.

Xatırladaq ki, 2022-ci il dekabrın 3-də və 7-də Rusiya sülhməramlı kontingentinin komandanlığı ilə aparılmış müzakirələrin nəticəsi olaraq İqtisadiyyat Nazirliyi, Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət heyət Rusiya sülhməramlı kontingentinin müvəqqəti yerləşdiyi Azərbaycan ərazilərində faydalı qazıntı yataqlarının qanunsuz istismarı, bundan irəli gələn ekoloji və digər fəsadlarla bağlı ilkin monitorinq aparmalı idi. Lakin sülhməramlıların hərəkətsizliyi ucbatından monitorinq baş tutmayıb.

***

13.12.2022.Rusiya sülhməramlılarının müvəqqəti nəzarətində olan Şuşa-Xankəndi yolunda QHT nümayəndələri, ekofəallar və könüllülərin iştirakı ilə keçirilən etiraz aksiyası ikinci gündür davam edir.

Reyting.az “Report”a istinadla xəbər verir ki, vaxt ötdükcə aksiya iştirakçılarının sayı artır.

Aksiya iştirakçıları arasında olan Azərbaycan Kyokuşin Karate Federasiyasının baş katibi Əbülfət Hacızadə deyib ki, tədbir barədə sosial media vasitəsilə xəbər tutub:

“Əminik ki, aksiya bizim istəklərimizin yerinə yetirilməsi ilə nəticələnəcək”.

Ötən gün KİV-lər və sosial media vasitəsilə azərbaycanlı aktivistlərin keçirdiyi aksiyanı yaxından izlədiklərini deyən Ə. Hacızadə əraziyə vətəndaşlıq borcunu yerinə yetirmək üçün gəldiyini vurğulayıb:

“Vətən öz övladlarını çağırırdı və biz də o çağırışa gəlmişik. Bura gəlməyi, həmvətənlərimizlə birgə aksiyalara qoşulmağı özümüzə borc bildik.

Hazırda federasiyanın üzvləri, rəhbərliyi və digər idman cameəsi ilə birlikdə Xankəndi-Laçın yolundayıq. Biz bu aksiyada cəmiyyətdə tutduğu mövqeyindən asılı olmayaraq hər kəsin vətən üçün birləşdiyinin, həmrəy olduğunun şahidi olduq”, - Ə. Hacızadə vurğulayıb.

Qeyd edək ki, Şuşa ərazisində Rusiya sülhməramlılarının nəzarətində olan yolun bir hissəsində etiraz aksiyası azərbaycanlı aktivistlər və ekologiya üzrə qeyri-hökumət təşkilatlarının üzvləri tərəfindən Qarabağ iqtisadi rayonunda ekoloji terrora son qoyulması tələbi ilə keçirilir.

Xatırladaq ki, 2022-ci il dekabrın 3-də və 7-də Rusiya sülhməramlı kontingentinin komandanlığı ilə aparılmış müzakirələrin nəticəsi olaraq İqtisadiyyat Nazirliyi, Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət heyət Rusiya sülhməramlı kontingentinin müvəqqəti yerləşdiyi Azərbaycan ərazilərində faydalı qazıntı yataqlarının qanunsuz istismarı, bundan irəli gələn ekoloji və digər fəsadlarla bağlı ilkin monitorinq aparmalı idi. Lakin sülhməramlıların hərəkətsizliyi ucbatından monitorinq baş tutmayıb.

***

Rusiya sülhməramlılarının müvəqqəti nəzarətində olan Azərbaycan ərazilərində faydalı qazıntı yataqları, xüsusilə Qızılbulaq qızıl və Dəmirli mis-molibden yataqlarının qanunsuz istismarına etiraz olaraq eko-fəallar və QHT təmsilçiləri Laçın yolunda aksiyanı davam etdirir.

Reyting.az APA-ya istinadla xəbər verir ki, aksiyaya könüllülər də qoşulub.

Aksiya iştirakçıları faydalı qazıntı yataqlarının qanunsuz talanmasını dayandırmağı, Rusiya sülhməramlı qüvvələrinin komandanı, general-mayor Andrey Volkovun əraziyə gələrək, onların tələblərini dinləməsini tələb edirlər.

Qeyd edək ki, aksiya dünən səhərdən başlayıb. Eko-fəallar və QHT təmsilçilərin görüş tələbinə baxmayaraq, general Volkov əraziyə gəlmir. Rusiya sülhməramlı qüvvələrinin hərbçiləri yolda maneələr qurub, aksiya iştirakçıları qarşısında sədd çəkiblər. Bu səbəbdən yol bağlanıb.

***

Rusiya sülhməramlılarının müvəqqəti nəzarətində olan Şuşa-Xankəndi yolunda QHT nümayəndələri, ekofəallar və könüllülərin iştirakı ilə keçirilən etiraz aksiyası davam edir.

Reyting.az xəbər verir ki, aksiya iştirakçılarının təhlükəsizliyini təmin etmək üçün əraziyə Azərbaycan Daxili İşlər Nazirliyi Daxili Qoşunlarının (DQ) hərbçiləri ilə yanaşı, polislər də cəlb edilib.

İştirakçılar polislərin əraziyə gəlişini alqışlarla qarşılayıblar.

Aksiya hazırda “Azərbaycan oyaqdır, sərvətinə dayaqdır!”, “Yaşasın Azərbaycan!” şüarları ilə davam edir.

***

Rusiya sülhməramlıları Qarabağda faydalı qazıntı yataqlarının qanunsuz istismarı əleyhinə Şuşa-Xankəndi yolunda etiraz aksiyasının keçirildiyi əraziyə əlavə canlı qüvvə cəlb edib.

Reyting.az xəbər verir ki, havanın soyuq olmasına baxmayaraq, aksiya iştirakçıları ərazidə qalmaqda qərarlıdırlar.

***

Hava şəraitinin soyuq olmasına baxmayaraq, Şuşa-Xankəndi yolunda keçirilən etiraz aksiyası gecə saatlarında da davam edir.

Reyting.az xəbər verir ki, etiraz aksiyasının iştirakçıları bu axşam da orada gecələməyə qərar veriblər.

Etiraz aksiyasında səsgücləndiricilər vasitəsilə vətənpərvərlik ruhunda mahnılar səsləndirilir.