Qərb bölgəsinin dindarları: “İran xəyanət yolunu seçib”

Azərbaycan müstəqillik əldə etdikdən sonra İran bizə qarşı münasibətdə çox dəyişib. Bilərəkdən uzun illər bizi bir-birimizə bağlayan bütün dəyərlərin üstündən xətt çəkib. Birinci Qarabağ müharibəsindən bu günə kimi gah gizli, gah da aşkar formada düşmənlərimizin yanında olub, onlara hər cür kömək göstərib.

Reyting.az xəbər verir ki, bu fikirlər Azərbaycanın Qərb bölgəsində yaşayan dindarların bəyanatında əks olunub.

Bəyanatda qeyd olunur ki, dəfələrlə irad bildirilməyinə baxmayaraq, İran Azərbaycana qarşı ədalətsiz münasibətini dayandırmayıb, əksinə, bu ədalətsizliyini daha açıq şəkildə davam etdirib:

“Demək yerinə düşər ki, Azərbaycan dünya miqyasında tolerantlıq ənənələrinin qorunmasında nümunə olacaq ölkə kimi qiymətləndirilib. Biz Qərb bölgəsinin dindarları real faktlara söykənərək bildiririk ki, vətənimizdə dini və etnik zənginlik həmişə diqqətdə saxlanılıb, xalqımız tolerantlıq ənənələrini tarix boyu yaşadıb və inkişaf etdirib. Amma “din qardaşı” adlandırdığımız İran hansısa səbəbdən hər an bizə zərbə vurmağa, erməniləri hər vəchlə müdafiə etməyə can atıb və bunu edib. Ermənilər Azərbaycanın işğal altında olan ərazilərindəki dini dəyərlərimizi təhqir edəndə, məcsidlərimizdə donuz saxlayanda, onları uçurub xarabalığa çevirəndə İran səsini çıxarmayıb. Bu az imiş kimi, İran daim erməni terroçularını silahlandırıb, qələbəmizə nifrətlə yanaşıb, beləcə də əllərini Azərbaycanın şəhid oğullarının qanına batırıb”.

Dindarlar bəyan edir ki, İran bu gün də Azərbaycana haqsız nifrətini davam etdirir, ədalətli qələbəsini qəbul edə bilmir, hətta Zəngəzur dəhlizinin açılmasını özünün “qırmızı xətti” hesab edir:

“Vətən müharibəsi zamanı dinindən, irqindən asılı olmayaraq, bütün vətəndaşlarımızın haqq işində birlik nümayiş etdirməsi çox qürurverici hal kimi tarixin səhifələrinə həkk olundu. Lakin qələbəmizi qəbul etməyən İran düşmən xislətlini gizlətmədi, özünü müsəlman adlandırsa da, İslam dinini siyasiləşdirərək bədnam qonşumuz kimi iç üzünü göstərdi. Bu, qəbul edilməzdir və islami dəyərlərə ziddir. Birbaşa dinimizin dəyərlərinə hörmətsizlikdir.

Ermənilər dünyada hər zaman xristian təəssübkeşliyindən yararlandığı halda İran daim xəyanət yolunu seçdi, Azərbaycanın ərazi bütövlüyünün bərpasını qəbul etmədi, bütün gücü ilə işğalçı Ermənistanın yanında oldu. Azərbaycana qarşı işğalçılıq siyasəti həyata keçirən Ermənistana hərtərəfli dəstək göstərdi, onları silahlandırdı, təxribatlarından əl çəkmədi. Təbii ki, biz bölgə dindarları olaraq bunu dəyərlərimizə və suverenliyimizə qarşı hörmətsizlik kimi qiymətləndiririk və İranın çirkin niyyətli olmasını qınayırıq”.

Dindarlar xatırladır ki, İran 67 məscidin 65-ni dağıdan, təhqir edən Ermənistanla bütün sahələrdə əməkdaşlığını daha da dərinləşdirib: “Bu, islami birlik və məzhəb yaxınlığı amalları ilə bir araya sığmayan münasibətdir. Biz bölgənin din xadimləri özünü İslam Respublikası adlandıran İranın bölgədə dini dəyərlərlə bir araya sığmayan haqsız siyasətinə və Azərbaycana qarşı səsləndirdiyi təhdidedici yersiz bəyanatlarına, xüsusilə də sərhəd boyunca həyata keçirdiyi hərbi təlimlərə görə öz narahatlığımızı bildirir və İranın bu hərəkətlərinin müqəddəs İslam dininin qardaşlıq ruhuna uyğun olmadığını bəyan edirik”.