Deputat: “İlahi, ölkəmizdə nə qədər xain varmış!”

“Rusiyanın bir sıra ictimai-siyasi və media dairələrindən ölkəmizə yönəlik təxribatlara yol verilir. Biri Bakıya raket zərbələri endirməyi, biri haqq-hesab çəkməyi təklif edir, digəri hədə-qorxu gəlir. Bunlar başa düşmür ki, danışıq və ümid qapısı Türkiyə və Azərbaycandır”.

Reyting.az xəbər verir ki, bu sözləri parlamentdə deputat Razi Nurullayev deyib.

R. Nurullayev xatırladıb ki, bu ilin fevral ayında Azərbaycan və Rusiya prezidentləri arasında 43 maddədən ibarət Müttəfiqlik qarşılıqlı fəaliyyəti haqqında Bəyannamə imzalanıb. Deputat Rusiyanı nəzərdə tutaraq əlavə edib ki, bunların müttəfiqliyə münasibəti belədirsə, onlara necə güvənək:

“Rus jurnalisti təəccüblənir ki, Bakı pəncərələrində Türkiyə və Pakistan bayrağı var, niyə bir dənə də olsun Rusiya bayrağı yoxdur? Bu suala cavab hər kəsə aydındır, sualı verən rus jurnalistinə də. Biz müttəfiqlik bəyannaməsinə xələl gətirən, açıq-aşkar terrora və kütləvi insan təlafatına çağırışlar edən Rusiyanın vəzifəli, ictimai və media şəxslərinə qarşı Rusiya dövləti tərəfindən daha təsirli tədbirlərin görülməsini tələb edirik”.

R. Nurullayev ikinci vacib məsələ kimi bir çox ölkələrin hələ də “Dağlıq-Qarabağ” ifadəsini işlətdiyinə diqqət çəkib:

“Hansı ölkə olmasından asılı olmayaraq, Azərbaycanın ərazi bütövlüyünə şübhə ilə yanaşan və Azərbaycan adlarını təhrif edən ölkələrə nota verilməsini təklif edirəm.

Biz bütün ölkələrlə qarşılıqlı hörmət və əməkdaşlığın tərəfdarıyıq. Amma, bizə qarşı təhdid və hörmətsizlik yolunu tutanlara da təsirli xəbərdarlıq etməyimiz faydalıdır”.

Deputat digər bir məsələyə də diqqət yönəldib:

“İlahi, ölkəmizdə nə qədər xain varmış! Vətəndaş cəmiyyəti nümayəndələrinin Laçın-Xankəndi yolunda aksiyasını lağa qoyur, ermənilər yönündən işıqlandırır, erməni separatçılara sətiraltı, bəzən isə açıq-aydın dəstək ifadə edirlər. Bu, xainlikdir. İmkan verilsə, yüz minlərlə insan o yolu iflic edər. Kimin nə cürəti var ki, bizi qınasın? Mən bu tip ictimai çəkili şəxslərin, vətəndaşların və digərlərinin istintaqa cəlb edilməsini və barələrində araşdırmaların aparılmasını tələb edirəm”.

R. Nurullayevin sözlərinə görə, Azərbaycan Birinci Qarabağ müharibəsində 25 min, ikincidə 3100 şəhid vermədi ki, düşmən qüvvələrə satılmışlar onların ruhunu təhqir etsin:

“Çox şeydə güzəşt olar, amma vətəni, torpağı, ölkəni satmaq, onun üzərində karyera qurmaq, pul qazanmaq istəyənlərə, şəxsi incikliyinin qisasını Ermənistana qahmar çıxmaqla Azərbaycan dövlətindən almaq cəhdinə isə güzəşt olmaz. Olarsa, torpaq da, vətən də əldən gedər”.

Ana səhifəyə dön