Vardanyan Azərbaycana müharibə elan edib - Rəsmi Bakının cavabı necə olmalıdır?

Ruben Vardanyan

Erməni separatçılarının 10 gündür çalışdıqları mitinq dünən Xankəndi şəhərinin mərkəzində baş tutub. Erməni milyarder Ruben Vardanyan 30 oktyabr aksiyasında olduğu kimi, mitinqdə kütləviliyi təmin etmək üçün yenə pul kisəsinin ağzını açıb.

Vardanyan Xankəndi ətrafından gələnlərin nəqliyyat xərclərini də yenə üzərinə götürüb. Bundan başqa o, iştirakçıların hər birinə gəldikləri məsafədən asılı olmayaraq 30-40 dollar paylayıb.

Diqqətçəkən bir məqam Xankəndi şəərində məskunlaşan sadə ermənilərin mitinqə gəlməyə məcbur edilməsidir. Separatçılar aksiyada iştirak etmək istəməyənləri işdən qovulacaqları ilə hədələyib. Bu da azmış kimi, Xankəndi sakinlərinin sosial şəbəkə hesabları izlənilir, təftiş edilir. Hətta aksiya əleyhdarı olan bir çox erməninin döyüb işgəncə verilməsinə dair faktlar var.

Vardanyanın məhz ötən gün Xankəndidə aksiya keçirməsi təsadüfi deyil. Dekabrın 26-27-də Müstəqil Dövlətlər Birliyi (MDB) liderlərinin Rusiyanın Sankt-Peterburq şəhərində Yeni il ərəfəsində ənənəvi qeyri-rəsmi sammiti keçiriləcək. Sammit öncəsi Vardanyan aksiya keçirərək aşağıda qeyd etdiklərimə nail olmaq istəyir:

Birincisi, bu, Vardanyanın ikinci cəhdidir. Məsələ ondadır ki, oktyabrın 30-da Soçidə Azərbaycan prezidenti İlham Əliyev, Rusiya prezidenti Vladimir Putin və Ermənistan baş naziri Nikol Paşinyan arasında baş tutan görüş ərəfəsində Vardanyan Xankəndidə mitinq təşkil etdi. Vardanyan bu iki cəhdlə faktiki olaraq separatçı-terrorçu rejimin danışıqlar prosesində “tərəf” olaraq qəbul etdirilməsinə çalışır.

İkincisi, Vardanyan yaxşı bilir ki, separatçılar mövzusunda həm Qərb ölkələri, həm də Rusiya ortaq mövqeyə malikdir. Buna görə də mühüm görüşlər öncəsi aksiya təşkil edərək “Qarabağ əhalisi Bakını istəmir”,- mesajını verir.

Üçüncüsü, Vardanyan mitinqdə çıxışı zamanı bildirib ki, “Birincisi – Azərbaycana inteqrasiya olunuruq, ikincisi, burdan köçüb gedirik, üçüncüsü, savaşırıq. Mən 2 sentyabrda qərar vermişəm ki, Azərbaycana tabe olmayacam, buradan getməyəcəm, mübarizə aparacam. Hər şeyimi müstəqilliyə qurban verəcəm. Möcüzə gözləməyin, möcüzə olmayacaq, qarşıda bizi olduqca çətin yol gözləyir”.

Bu, Bakıya qarşı müharibə elanı etməkdir. Yəni Vardanyan son sözünü dedi.

Rəsmi Bakı indiki məqamda həm Ermənistana, həm separatçılara, həm də digər üçüncü tərəf sayılacaq qüvvələrə layiqli cavab verməli, ən yaxşı halda Şuşa-Laçın yolundakı aksiyaların miqyasını artırmalıdır. Konkret desək, aksiyalara dövlət dəstəyi verilməli, mövcud aksiyaçı sayı 5-10 misli artırılmalıdır. Beləcə, Laçın yolunda aksiyanın davamlılığı və nəzarət müəyyən qədər artırıla bilər.

Turan Rzayev

Ana səhifəyə dön