Rəsmi Bakının növbəti diplomatik uğuru

2023-cü il ərəfəsində ölkəmiz diplomatiya tarixində növbəti qələbəyə imza atdı. Dekabrın 20-21-də Fransa və Ermənistanın Laçın yolundakı vəziyyətlə bağlı BMT TŞ-na təqdim etdiyi ermənipərəst bəyanatın qəbulunun qarşısı alındı.

Xatırladaq ki, Böyük Britaniya, BƏƏ, Rusiya və Albaniya Fransanın təşəbbüsünün əleyhinə çıxış ediblər.

Nə baş verir?

Azərbaycanın Qarabağ iqtisadi rayonunda faydalı yataqların qanunsuz istismarı əleyhinə Xankəndi-Laçın yolunda keçirilən etiraz aksiyası 20 gündür davam edir. 20 gündür Laçın yolundan qanunsuz məqsədlər üçün istifadə edə bilməyən Ermənistan guya Laçın dəhlizinin blokadada olmasını iddia edərək BMT-nin Beynəlxalq Ədalət Məhkəməsinə müraciət etdi.

Dekabrın 20-21-də isə BMT TŞ-nın daimi üzvü və hazırda TŞ-nın sədri kimi Fransa strateji tərəfdaşı və müttəfiqi Ermənistana dəstək olmaq məqsədi ilə Laçın-Xankəndi yolundakı vəziyyəti “humanitar fəlakət” kimi təqdim edən riyakar və tam ermənipərəst mətn hazırlayıb BMT TŞ-nın iclasını çağırdı.

Müqayisə üçün qeyd edib ki, bu, ilk belə hal deyil. 2022-ci ilin sentyabr hadisələrindən sonra da Ermənistanın müraciəti əsasında BMT TŞ-nın gündəliyinə “Ermənistanın BMT yanında Daimi nümayəndəsinin məktubu” adlı bənd daxil edilmişdi. Aydın məsələdir ki, sözügedən müraciət əsasında TŞ-nın gündəliyinə bəndin daxil edilməsi Fransanın dəstəyi olmadan baş verə bilməzdi.

BMT TŞ-nın 4 qətnaməsi ola-ola 30 il ərzində BMT TŞ Ermənistanın Azərbaycana təcavüzünə qarşı bir dəfə də olsun toplantı keçirməməsi də diqqət çəkir. Mümkündür ki, bu illər ərzində bənzər toplantının keçirilməsinin qarşısını alan ölkələrdən biri, hətta birincisi məhz Fransa olub.

Paris və İrəvanın diplomatik fiaskosu

Fransa-Ermənistan cütlüyünün 2022-ci ilin sentyabrında baş vermiş hadisələrlə bağlı BMT TŞ-da qəbul etmək istədiyi sənəd kimi, dekabrın 20-21-də Laçın-Xankəndi yolundakı vəziyyəti “humanitar fəlakət” kimi təqdim edən riyakar və tam ermənipərəst mətndə BMT TŞ-nın iclasında qəbul edilmədi.

Halbuki tərəflər 10 gündür mətn üzərində çalışır, onun qəbulu üçün bütün vasitələrə əl atırdı. Rəsmi Paris bəyanatın qəbul ediləcəyinə əmin idi. Çünki prosesləri bilavasitə Fransa Prezident Administrasiyası və prezident E. Makronun xarici siyasət məsələləri üzrə müşavirləri aparırdı. Bu bəyanat qəbul etdiləcəyi təqdirdə növbəti addım kimi qətnaməyə çevirməsi mümkün idi.

Lakin nə Ermənistanın, nə də Fransanın məkrli planı baş tutmadı. Azərbaycan ustaca qurulmuş xarici siyasət və diplomatiya sayəsində Böyük Britaniya, BƏƏ, Rusiya və Albaniyanı tərəfinə çəkərək Fransanın məkrli planını iflasa uğratdı.

Prezidentin uğurlu xarici siyasəti

Əldə edilən diplomatik qələbədə Azərbaycan prezidenti İlham Əliyevin misilsiz xidməti var. Prezidentin Fransa və Ermənistanın atacağı addımı öncədən hesablaması və bunun qarşısını alacaq addımlar atması diqqət çəkir.

Misal üçün, prezident İlham Əliyev Qərbi Azərbaycan İcmasının üzvləri ilə görüşdə bir sıra beynəlxalq təsisatlarda Azərbaycana qarşı məkrli işlərin aparıldığına eyham vurmuşdu. Bundan başqa, Frankofoniya və bəzi başqa beynəlxalq təşkilatlarda Azərbaycan əleyhinə olan fəaliyyətlərin təəssüf doğurduğunu bəyan etmişdi.

Bütün bunlar ondan xəbər verir ki, ölkə başçısı öncədən Fransa və Ermənistanın Azərbaycana qarşı məkrli plan qurduğunu bilirdi və bunun anonsunu vermişdi.

Məsələ ondadır ki, Fransa belə geosiyasi oyunlarla Cənubi Qafqaza soxulmaq istəyir. Bunun üçün isə BMT TŞ-nın daimi və qeyri-daimi üzvlərini də öz çirkin xarici siyasətinə alət etməkdən çəkinmir.

Nəticə etibarilə, prezident İlham Əliyev üstün diplomatik göstəriciləri ilə Fransanı öz oyununda məğlub edərək, doğum günündə Qərbi Azərbaycan İcması ilə görüşdə işlətdiyi “Hətta səndən güclü olan qüvvə qarşısında heç vaxt geri addım atmamalısan, hər zaman öz hüququnu qorumalısan, xüsusilə doğma torpağını qorumalısan”,- ifadəsini hədər yerə işlətmədiyini göstərdi.

Turan Rzayev

Ana səhifəyə dön