Əli Şamxani ətrafında hay-küy: onu kimlər istefaya göndərmək istəyir?

Əli Şamxani

İranın Ali Milli Təhlükəsizlik Şurasının katibi Əli Şamxaninin vəzifəsindən azad edilməsi və ya istefaya göndəriləcəyi xəbəri iki həftədir ki, dolaşır. Xüsusən, Əlireza Əkbəri həbs və İngiltərənin nəfinə casusluq ittihamı ilə edam edildikdən sonra. Amma Şamxaniyə qarşı şifahi hücumlar rəsmi kanallardan deyil, “Telegram” və “Twitter” də daxil olmaqla, kiberməkanda bəzi istifadəçi hesablarından təşkil olunur.

Reyting.az xəbər verir ki, bu barədə “Entexab” yazıb.

İran nəşrinin təhlilində qeyd olunur:

Başqa bir təhlükəsizlik qurumunun ali məmuru Şamxaniyə edilən hücumlara reaksiya verib və bunu ədalətsiz adlandırıb: “Doktor Şamxaniyə qarşı son hücum ədalətsizdir, çünki o, milli təhlükəsizlik sahəsində xüsusi səylər göstərib”.

İbrahim Rəisi hökumətinin informasiya naziri İsmayıl Xətib deyib ki, Əkbərinin həbsi zamanı yalnız üç təşkilat əməkdaşlıq edib: Ali Məhkəmə, Ali Milli Təhlükəsizlik Şurasının Katibliyi və Müdafiə Nazirliyi.

Nazir bildirib ki, İnformasiya (Kəşfiyyat) Nazirliyinin məlumatına görə, Müdafiə Nazirliyi, Şamxani orada vəzifə tutarkən, Ə. Əkbərinin nazir müavini postuna namizədliyini rədd edib və MI6 casusu heç vaxt nazir müavini olmayıb.

Şamxaniyə hücumlar bəzi “Twitter” hesabları və “Telegram” kanalları "super casus" kimi təsvir etdikləri şəxsin həbs olunması elanından sonra başlayıb. Bir neçə gün sonra həmin hesablar “super casus”un 2018-ci ildə həbs olunan Əlirza Əkbəri olduğunu açıqladı. O, Britaniyanın nəfinə casusluqda ittiham olunurdu. Sonra rəsmən məlum oldu ki, Əkbəri artıq “bıçaq altında”dır və bu günlərdə boynuna kəndir salacaqlar və ayağının altındakı klapan açılacaq və o, asılmış olacaq.

Ə. Əkbərinin cəzasının icra olunduğu açıqlanıb. Məhkəmə hökmün nə vaxt icra ediləcəyini açıqlamasa da, “Saberin News” adlı teleqram kanalı Əkbərinin edam edildiyini bildirib. Nə məhkəmə, nə də başqa qurumlar bu xəbəri təkzib etməyib.

Admiral Şamxaninin “vurulması” həmin hesablarda Ə. Əkbərinin təhlükəsizlik xadiminə yaxın olması və Müdafiə Nazirliyində müavini işlədiyi iddiası ilə intişar edib. Bu hesablarda qeyd olunurdu ki, Ali Milli Təhlükəsizlik Şurasının katibi Əli Şamxani Məhəmməd Xatəmi hökumətində müdafiə naziri olub. Bəzi KİV-lər isə Əkbəri müdafiə nazirinin müavini rütbəsi ilə yanaşı, keçmiş müdafiə nazirinin müşaviri kimi də qeyd edirdilər. Lakin Müdafiə Nazirliyi bildirib ki, Əkbəri heç vaxt müdafiə nazirinin müavini olmayıb və o, 2013-cü ildə Müdafiə Araşdırmaları İdarəsinin rəisi kimi təqaüdə çıxıb. Halbuki media arxivinin xəbərlərində o, bir neçə dəfə keçmiş müdafiə nazirinin müavini, “general” adlandırılır.

Ə. Əkbərinin bəzi qohumları kiberməkanda onun Şamxani ilə əlaqəli olduğunu iddia edib. Bu, görməməzliyə vurulası iddia deyil. Hər halda, Əli Şamxani “Sepah”ın komandanlığı, Müdafiə Nazirliyinin keçmiş rəsmisi və Ali Milli Təhlükəsizlik Şurasının katibidir.

"İstefa" və ya Şamxaninin işdən çıxarılmasına inamlı çevrələr onun varisi olacaq namizədlərin adlarını da açıqlayırdı.

Şamxaniyə yaxın media buna nəhayət reaksiya göstərdi. Ali Milli Təhlükəsizlik Şurasının katibliyinə məhrəm sayılan “Noor News” təkzibləri nəşr etdi. Bununla belə, bəzi siyasətçilər, o cümlədən Misbah Yəzdinin ofisinin rəhbəri olmuş Hüseyn Cəlali çıxışında şifahi hücumları davam etdirib: “Niyə Milli Təhlükəsizlik Şurasının katibi ittihamları açıq şəkildə qəbul etmir?!” O, çıxışında 8 il İslam Respublikasının prezidenti olan Məhəmməd Xatəmini də "korrupsioner” adlandırıb.

Bu sözlər Şamxaniyə qarşı fəallıq edən cəbhənin kimlərdən təşkil olunduğunu göstərir.

Şamxaninin başçılıq etdiyi Ali Milli Təhlükəsizlik Şurasının Katibliyi Ruhani hökuməti dövründə JCPOA-nı (nüvə sazişi) canlandırmaq üçün aparılan danışıqlara qarşı çıxmışdı. O zaman prezident aparatının rəhbəri katibliyi sərt tənqid etmişdi.

Üstəlik, son aylarda, Məhsa Əminin ölümündən sonra Əli Şəmxani islahat hərəkatının bəzi əsas simaları ilə görüşüb. Hətta deyilənə görə, son iğtişaşlar zamanı Ali Milli Təhlükəsizlik Şurasının katibi bəzi xüsusi sərəncamların verilməsinin qarşısını alıb. İğtişaşların lap əvvəlində İnqilab Rəhbərinin dəftərxana müdirinin imzası ilə Ali Milli Təhlükəsizlik Şurasının katibi Əli Şamxaniyə ünvanlanmış və iğtişaşlara qarşı rəftarın gücləndirilməsi ilə bağlı məktubun səbəbi də bu idi. Həmin məktub kiberməkanda nəşr olundu. Təbii ki, Ali Milli Təhlükəsizlik Şurasına yaxın KİV-lər bu məktubu saxta adlandırıblar.

E. KAMAL
Reyting.az

Ana səhifəyə dön