Rəsul Quliyev: “İlham Əliyev Azərbaycan tarixində Milli Qəhrəman kimi qalacaq”

“Azərbaycanın son 10 ildə, xüsusilə 44 günlük Vətən müharibəsi və bu günə qədər davam edən siyasəti ilə bağlı bəzi fikirlərimi söyləmək istəyirəm. Amma mənim son müsahibələrimdən sonra bəzi şəxslərin sayaqlamalarına fikir verməyin lazım olmadığını bilirəm. Ancaq heç bir məntiqi olmayan həmin şəxslərin əvəzinə xəcalət çəkirəm”.

Reyting.az xəbər verir ki, bu sözləri hazırda ABŞ-da yaşayan Milli Məclisin sabiq sədri Rəsul Quliyev deyib.

Rəsul Quliyev əlavə edib ki, həmin şəxsləri hələ 1993-cü ildən tanıyır: “Bu adamların kloun hərəkətlərinin şahidi olmuşam. Xüsusilə, Pənah Hüseynovla (keçmiş baş nazir Pənah Hüseyni nəzərdə tutur-red.) bir aya yaxın bir yerdə işləmişik. Onunla London və Sürixdə səfərdə olmuşuq”.

R. Quliyev bildirib ki, açıqlamasında P. Hüseynin nisbətən normal insan olduğunu qeyd edib: “Onun səviyyəsi sıfıra bərabər idi. İndi bu normal ilə müqayisədə o birilərin səviyyəsinin necə olduğunu özünüz düşünün. Əgər Pənah Hüseynovun etirazı varsa, mən qısa müddətli tanışlığımızda onun “kolxoz” olduğunu göstərən 10-larla fakt söyləyə bilərəm. Adətən mən belə metodlardan istifadə etməyi sevmirəm. Ancaq qanacaqsıza yerini göstərmək lazım gələndə, bunu edirəm”.

Milli Məclisin keçmiş sədri P. Hüseyni və müxalif düşərgənin digər təmsilçilərini nəzərdə tutaraq qeyd edib ki, 2013-cü ildə bu adamlar prezident seçkisində “evcik-evcik” oynayıb:

“Vaxtı ilə sovetlərin siyasətinin şərhini verən, bunu da həyatının məqsədi hesab edən birini atdılar ortaya, o da biabırcasına uduzandan sonra “Mən prezidentəm”,- dedi. Bu yazıqlar - həmin pənahlar, əlilər, ariflər 3-4 ay bu yazıq şəxsə “Cənb prezident!” - deyə müraciət etdilər. Bir sözlə, mən, 2013-cü ildən bu adamlar barəsində həmişə ikrahla danışmışam. 10 il sonra kimlərsə özünü ortaya atıb ki, mən də varam”.

R. Quliyevin fikrincə, son 10-15 ildə Azərbaycanı beynəlxalq aləmdə tanıtdırmaq çox böyük uğurlu işlər görülüb:

“Avropa Olimpiya oyunlarının, “Avroviziya”, “Formula-1” yarışlarının Bakıda keçirilməsi artıq Azərbaycanı tək neft ölkəsi kimi deyil, həm də qədim tarixi, gözəl arxitekturası, qədim və təsirli musiqisi və fərqli mətbəxi olan bir ölkə kimi xüsusilə avropalı və amerikalılara tanıdıb. Ən əsası, Azərbaycanın sivil ölkə olması barədə fikiri formalaşdırıb”.

R. Quliyev 44 günlük Vətən müharibəsindən də söz açıb və deyib ki, Azərbaycanın Putinlə necə dil tapdığını da bilir. Onun sözlərinə görə, Putinin Paşinyanı devirmək istəyi olsa da, ancaq bu, Qarabağ məsələsi üçün kifayət etməyib. Türkiyə və prezident Ərdoğan faktoru da bu iş kifayət qədə olmayıb:

“O dövrdə Rusiya ordusu Suriyanın bir hissəsini darmadağın etmişdi və Putin özünü dünyanın ən böyük şəxslərindən biri hesab edirdi. Ona görə də Türkiyə faktoru əsas ola bilməzdi.

Bir sözlə, prezident Əliyev müharibəyə başladı. Mən əminəm ki, bir neçə rayon azad edildikdən sonra ermənilər Paşinyanı kreslosundan atsaydılar Putin Azərbaycana “Müharibəni dayandır!” - tələbini irəli sürəcəkdi. Ancaq tarix göstərdi ki, Putin 2014-ci ildə Ukraynada olduğu kimi, yenə səhvə yol verdi və Paşinyan yerini daha da möhkəmləndirdi”.

R. Quliyev əlavə edib ki, Azərbaycanın NATO təlimi görmüş, fədakar, qəhrəman əsgər və zabitləri, generalları müharibəni böyük əzm və sürətlə başa çatdırmaq istəyirdi:

“Bu 44 gün ərzində ölkənin prezident İlham Əliyev dünyanın 50-dən çox populyar KİV-lərinə müsahibələr verdi. Bu müsahibələr dünyanı Azərbaycanın haqq-ədalət müharibəsi apardığına inandırırdı. Fransa prezidenti Makronun sayaqlamasından başqa bütün dövlətlərin hökumətləri Azərbaycana haqq qazandırdılar.

Ordunun formalaşmasında əsas rolu müdafiə naziri yox, prezident oynayır. Ordunun NATO standartlarına uyğun hazırlanması, hər gün xalqa müharibə zonasında baş verənlərin çatdırılması və ordunun müasir silahlar və dronlarla təchiz edilməsi əsgərlərin ruh yüksəkliyi ilə vuruşması ilə nəticələnmişdi. Bu səbəbdən ordumuz 44 günə 18 faiz ərazimizi, başqa sözlə, az qala Ermənistanın ərazisinə bərabər olan bir ərazini geri qaytardı.

Birinci vitse-prezidentin rəhbərliyi altında Şuşa şəhərində musiqi festivalı keçirmək prezidentin “Qarabağ Azərbaycandır!” məşur kəlamını təsdiqlədi.

2.5 min kvadrat kilometirlik bir sahədə Paşinyan və Arutyunyanın yalvarışlarını nəzərə alıb Putin müharibəni saxlatdırdı. Putin bu ərazidə qoşunlarını saxlamaqla Azərbaycan və Ermənistana ağalığını davam etdirmək istəyir. Ancaq Azərbaycanın apardığı siyasət rusları bu ərazilərdən çıxarmaqdır və əminəm ki, bu, baş verəcək. Bu müharibə ilə əlaqədar prezident Əliyevin böyük rolunu daima qeyd edirəm. Kimlərin istəyib-istəməməsindən asılı olmayaraq, prezident Əliyev Azərbaycan tarixində Milli Qəhrəman kimi qalacaq”.

ELÇİN

Ana səhifəyə dön