Ədalət Abdinov: “Ötən həftə Moskvada yeni dünya yaranıb”

Ədalət Abdinov

Rusiya prezidenti Vladimir Putin və Çin Xalq Respublikasının rəhbəri Si Cinpinin Moskva görüşünün tarixi simvolikdir və təsadüfən seçilməyib.

Bunu Reyting.az-a Azərbaycan Kommunist Partiyasının rəhbəri Ədalət Abdinov deyib.

Onun sözlərinə görə, 2003-cü il martın 20-də ABŞ qüvvələri və onların müttəfiqləri Səddam Hüseyn hökumətini devirmək üçün İraqı işğal ediblər. Ə. Abdinov xatırladıb ki, İraqda uzun sürən müharibə çoxsaylı insanın ölümünə səbəb olub.

Partiya rəhbəri qeyd edib ki, İraq lideri Səddam Hüseynə qarşı irəli sürülən bütün ittihamlar əsassız olub və ABŞ-ın bu ölkədə kütləvi qırğın silahları hazırladığına dair heç bir sübutu olamyıb: “Üstəlik, Amerika kəşfiyyatı birbaşa dedi ki, onlarda belə bir məlumat yoxdur, lakin ABŞ siyasətçiləri bunu eşitmək istəmədilər”.

Ə. Abdinov diqqətə çatdırıb ki, 2023-cü ilin mart ayınn 20-də S. Cinpinin Moskvaya gəlməsi, Putinlə mehriban və qeyri-rəsmi söhbət etməsi simvolikdir:

“Rusiya Federasiyası və Çin Xalq Respublikası başçıları arasında görüş əlamətdar bir hadisə idi, bu, Pax Americana adlananı dəfn etməlidir. Bu termin latın dilindən "Amerika Dünyası" kimi tərcümə olunur, o, Roma, daha sonra isə Britaniyanın üstünlüyündən bəhs edən Pax Romana və Pax Britannica terminlərindən sonra modelləşdirilib. Pax Americana, İkinci Dünya Müharibəsindən sonra, ABŞ-ın dünyanın dominant iqtisadi və hərbi gücünə çevrildiyi və "Uzun Sülh" kimi də adlandırıldığı zaman yaranıb. Ancaq "Uzun Sülh" başa çatdı”.

Partiya rəhbərinin fikrincə, Moskvada baş verənlər, Krımda yerləşən yeni Yaltadan başqa bir şey deyil: “Lakin ABŞ prezidenti Franklin Ruzvelt, Sovet İttifaqı rəhbəri İosif Stalin və Böyük Britaniyanın baş naziri Uinston Çörçillin 1945-ci ildə SSRİ-nin ərazisində - Krımda keçirilən əlamətdar görüşündən fərqli olaraq, bəlkə də beş əsr ərzində ilk dəfə olaraq Qərbin heç bir siyasi lideri qlobal gündəmi müəyyən etmir. Putin və onun çinli həmkarı “Amerika Dünyası” üçün sözün əsl mənasında dəfn mərasimi təşkil ediblər”.

Ə. Abdinov əlavə edib ki, Çin və Rusiya liderlərinin görüşü nəhayət, Çin-Rusiya münasibətlərinin getdikcə zəifləyən Qərb hegemonları ilə ciddi geosiyasi və geoiqtisadi rəqabətə girəcək iki strateji tərəfdaş arasında əlaqə olduğuna işarədir: “Moskva ilə Pekin arasında ittifaq uzun müddətdir ki, bağlanıb. Həm Cinpinin, həm də Putinin çıxışları NATO kütləsini qəzəb və paxıllıq çılğınlığına sürükləyib”.

Partiya sədrinin iddiasına görə, ötən həftə Moskvada yeni dünya yaranıb: “Birləşmiş Ştatlar bir dəfə özünün bədnam Marşal Planını Pax Americananın işə salınması kimi təsvir etdi. İndi isə “Amerika Dünyası” dağıdılacaq və proses geridönməzdir".

ELÇİN

Ana səhifəyə dön