ABŞ-da gərginlik: Tramp tərəfdarları etiraza başlayır, polis həyəcan təbili çalır

ABŞ-ın keçmiş prezidenti Donald Tramp Stormi Danielsə susmaq müqabilində 130 min ABŞ dolları ödəməsi ilə bağlı məhkəmə qarşısına çıxarılacaq. Tramp ABŞ tarixində mühakimə olunan ilk eks-prezident olduğu üçün polis “fövqəladə iğtişaşlar” üçün həyəcan təbili çalır. Digər tərəfdən, artıq Tramp tərəfdarlarının gözlənilən etirazları başlayıb.

Reyting.az xəbər verir ki, D. Trampın həbs ediləcəyini deməsi tərəfdarlarının narahatlığını daha da artırıb.

Tərəfdarlarını etiraza çağıran Tramp ona qarşı irəli sürülən ittihamlarla razılaşmır, prokurorları korrupsiyada və siyasiləməkdə ittiham edir.

Xatırladaq ki, həm ABŞ-da, həm də dünyada gözlər Trampa bağlı qərar verəcək böyük münsiflər heyətində idi. Nyu-York Böyük Münsiflər Heyəti bu gün çoxdan gözlənilən hökmünü açıqlayıb və Donald Trampın Stormi Danielsə 130 min dollar ödəməsi ilə bağlı ittihamları araşdırmaq və buna görə də məhkəməyə müraciət etmək qərarına gəlib.

Bununla da Tramp ABŞ tarixində mühakimə edilən ilk eks-prezident olacaq.

Floridada yaşayan Tramp Nyu-Yorkda məhkəmə qarşısına çıxmalıdır. Hələlik isə Nyu-York prokurorluğu ödənişin saxta qeydinin olub-olmadığını araşdırır.

Diqqətə çatdıraq ki, ABŞ-da cinayətin mahiyyətindən asılı olmayaraq onu ört-basdır etməyə çalışmaq daha ciddi hüquqi prosesə gətirib çıxara bilər.

Cinayət işi üzrə şikayət verib-verməmək qərarı Nyu-York şəhərinin prokuroru Alvin Bragg-ə tapşırılıb. Bragg, istintaqın kifayət qədər sübutunun olub-olmadığını yoxlamaq üçün böyük bir münsiflər heyəti yaradıb.

Münsiflər heyətinin qərarının "seçkilərə müdaxilə" olduğunu iddia edən Tramp deyib ki, bu, tarixin ən yüksək siyasi təqibi, seçki müdaxiləsidir və Manhetten dairəsinin prokuroru Co Baydenin çirkin işini görür.

Demokratlar təqib iddialarına cavablarında deyiblər ki,Tramp qanunu pozarsa, o, hər bir amerikalı kimi hakim qarşısına çıxmalıdır.

Trampın yaxın günlərdə məhkəmə qarşısına çıxmazdan əvvəl səlahiyyətlilərə təslim olacağı, barmaq izlərinin götürüləcəyi və fotosunun çəkiləcəyi gözlənilir.

Britaniya mediası Trampın yəqin ki, girov müqabilində azadlığa buraxılmasının gözlənildiyini yazsa da, "Guardian" qəzeti keçmiş prezidentin qandallı olub-olmayacağının hələ dəqiq bilinmədiyini qeyd edib.

Fırtınalı Daniels işi Trampın yenidən prezident seçilmək istədiyi anda onu problemə sala bilər. Lakin ABŞ qanunlarına görə, hətta təqsirli bilinən şəxsin də prezidentliyə namizəd olması mümkündür.

Qeyd edək ki, artıq Florida ştatının Palm Beach şəhərində etirazlar başlayıb.

Keçmiş prezidentin həbs olunma ehtimalı ABŞ-ı təşvişə saldığından, Nyu-York polisinə “fövqəladə iğtişaş”a hazır olmaq təlimatı verilib.

Bu gün məhkəmənin qarşısında çoxlu sayda polisin olduğu və yüksək səviyyədə təhlükəsizlik tədbirlərinin görüldüyü bildirilir.

Böyük münsiflər heyəti qərarını elan etdikdən sonra Tramp tərəfdarları etiraz etmək üçün ABŞ-ın bir çox yerində küçələrə axışıblar.

Əsl adı Stefani Klifford olan Stormi Daniels Trampla münasibətlərinə susmaqdan ötrü 2016-cı ildə 130 min dollar ödəmək üçün müqavilə imzaladığını iddia edib. Daniels Trampla münasibətdə olduğunu bildirsə də, keçmiş prezidentin vəkili bu ittihamı rədd edir.

E. KAMAL
Reyting.az

Ana səhifəyə dön