Qərb Ukraynaya hərbi təchizatı pik həddə çatdırıb, amma...

“Bir ildən artıqdır ki, ABŞ başda olmaqla Qərb dövlətləri Ukraynanı silah-sursatla təmin edir, Rusiya qüvvələrini geri çəkmək üçün iqtisadi yardım göstərirlər. Lakin Qərbin bu qarşıdurmada konkret hansı məqsədlər güddüyü hələ də qaranlıq olaraq qalır”.

Bunu Reyting.az-a Azərbaycan Kommunist Partiyasının rəhbəri Ədalət Abdinov deyib.

Ə. Abdinovun iddiasına görə, Rusiya Qərbi məğlub etmək üçün “Ukrayna vakuumundan” istifadə edə bilər.

Partiya rəhbəri xatırladıb ki, 2003-cü ildə ABŞ İraqı işğal edəndə prezident Corc Buş qələbəni vaxtından əvvəl elan etməklə səhvə yol verib. Nəticədə, ABŞ 8 ildən sonra demək olar ki, bütün qoşunlarını geri çəkib. Bu isə qələbədən çox məğlubiyyətə bənzəyir.

Ə. Abdinov qeyd edib ki, 20 ildən sonra, Ukraynada ən böyük risk qələbənin vaxtından əvvəl elan edilməsində deyil, qətiyyən müəyyən edilməməsindədir:

"Ukraynanın əsas tərəfdarları arzu olunan son nəticə haqqında danışmaqdan çəkinirlər. Münaqişənin başlanğıcında bunu vəziyyətin qeyri-müəyyən qalması ilə izah etmək olardı. Ancaq indi bütün tərəflərin döyüş meydanındakı imkanları barədə təxmini təsəvvürləri var, lakin Qərb susmaqda davam edir. Münaqişədə qələbənin nədən ibarət olduğunu isə məhz Kiyev özü müəyyən etməlidir, amma reallıqda belə deyil”.

Müsahibimiz bildirib ki, Ukrayna hakimiyyəti 1991-ci il sərhədlərinə qayıtmaq və Krımın zəbt edilməsini istədiklərini açıq şəkildə bildirəndə ABŞ və Qərbi Avropa ölkələri bu planı dəstəkləməkdən imtina edib. Onun fikrincə, bu, Moskvanı gözlənilməz reaksiyaya təhrik etmək qorxusu ilə əlaqəlidir.

Ə. Abdinov deyib ki, əgər Ukrayna tərəfdarları qələbəni müəyyən edə bilməsələr, Rusiya bunu edəcək:

“Bu il Qərb Ukrayna Silahlı Qüvvələri üçün hərbi təchizatı pik həddə çatdırıb. Bu o deməkdir ki, gələcəkdə silahların daşınması azalacaq. Bundan əlavə, yanacağın yüksək qiymətləri ilə Avropanı daha bir qış gözləyir. Eyni zamanda ABŞ-da prezident seçkiləri və Konqres mübahisələri, o cümlədən Kiyevə dəstək məsələsi var. Belə bir şəraitdə 2023-cü il üçün ən azı aralıq hədəfi müəyyən etmək lazım idi ki, Ukrayna Silahlı Qüvvələri buna nail olmalıdır. Əks halda Rusiya Qərbin qeyri-müəyyənliyindən istifadə edəcək və qələbənin şərtlərini özü diktə edəcək”.

Ə. Abdinovun sözlərinə görə, qələbənin nə demək olduğu sualına birmənalı cavab vermək əvəzinə, Qərb liderləri açıq şəkildə bəyan etməlidirlər ki, onların bu yaz və yay üçün hədəfləri ən azı 2022-ci il mərhələlərinə qayıtmaqdır və Ukraynanı bu məqsədə çatmaq üçün lazım olan hər şeylə təmin edəcəklər. “Təbii ki, Ukrayna hakimiyyəti belə bir məqsəddən narazı qalacaq və “Rusiyanın tam hərbi məğlubiyyətində” israr etməkdə davam edəcək. Bununla belə Qərb Kiyevə əhəmiyyət verməməli və ortaya Qərb cəmiyyəti üçün başadüşülən daha real məqsədlər qoymalıdır",- deyə partiya rəhbəri sonda əlavə edib.

ELÇİN

Ana səhifəyə dön