Rusiyada daha 400 min nəfəri orduya cəlb etmək istəyirlər

Ukraynada ciddi müqavimətlə üzləşən Rusiya müqaviləli hərbi xidmətlə gəncləri orduya cəlb etməyə çalışır.

Reyting.az xəbər verir ki, hər il olduğu kimi, bu il aprelin 1-dən hərbi xidmət keçməli olan Rusiya vətəndaşları orduya çağrılır.

Xatırladaq ki, prezident Vladimir Putin bundan əvvəl hərbi xidmət keçməli olan 147 min rusiyalı gəncin orduya çağırılması haqqında fərman imzalamışdı. Bu rəqəm əvvəlki illərin orta göstəricisindən təxminən 8 faiz çoxdur. Məsələn, 2022-ci ilin yazında hərbi xidmətə çağırılanların sayı 134,5 min nəfər olub.

Bu baharın əsgər çağırışı reklam kampaniyası ilə müşayiət olunur. Rusiyada bu kampaniya gənc kişi vətəndaşları orduya getməyə razı salmağa hədəflənir. "Bloomberg"in etibarlı mənbələrinə görə, Rusiya Baş Qərargahı bu kampaniya ilə Ukraynaya qarşı daha 400 min yeni əsgər cəlb etmək istəyir. Amma Rusiya Müdafiə Nazirliyi yeni səfərbərliyin elan ediləcəyi ilə bağlı məlumatları təkzib edir. Rusiya Baş Qərargahında səfərbərliyə cavabdeh idarənin rəsmisi Vladimir Zimliyanski deyib ki, Baş Qərargah ikinci səfərbərliyi planlaşdırmır. Onun sözlərinə görə, hərbi xidmətə çağırılan və könüllü olaraq xüsusi əməliyyatda iştirak edənlər kifayətdir.

Sergey Çerniskov Novosibirskdə özəl təhsil müəssisəsinin direktorudur. Sözügedən qurum Rusiya hərbi qüvvələrinin tərkibində müqaviləli hərbi xidmət üçün reklam verməli olduğunu bildirir. Novokollege özəl müəssisəsinin direktoru Çerniskov deyib ki, materiallar bələdiyyə qurumları tərəfindən reklam kampaniyası aparmaq üçün göndərilib. Bundan əlavə, Çerniskov sosial mediada gənclərin Rusiya hərbi qüvvələrinə qoşulduqda üstünlüklərə necə nail ola biləcəkləri barədə reklam flayerini paylaşır.

"Belə bir şeyi internetdə yerləşdirmək üçün insan dəli olmalıdır. Düşünürəm ki, dövlət qurumları bu reklam üçün səhv hədəf auditoriyası seçiblər. Çünki tələbələrin hələ də hərbi xidmətə getməyə vaxtı var. Onlardan məktəbi atıb, nəsə etmələrini tələb etmək dəlilikdir. Ordu tam axmaq axtarırmı? Digər tərəfdən, təhsili siyasətdən ayırmaq bizim dəyərlərimizə ziddir", - Çerniskov deyib.

Taiga.İnfo portalı da Novosibirsk bələdiyyəsinin mənzil administrasiyalarına oxşar broşürlər göndərildiyini bildirib. Müvafiq qurumlara rəhbərlik edənlər bildiriblər ki, əsgərliyə getmə ilə bağlı reklam broşürlərin “mənzillərin qapılarına və pilləkənlərə” asılması istənilib.

Qeyd edək ki, Rusiyanın müdafiə naziri Sergey Şoyqu 2023-cü ilin yanvarında orduda islahatlar aparılacağını açıqlamışdı. Bu kontekstdə 2026-cı ilə qədər silahlı qüvvələrin sayının 1,15 milyondan 1,5 milyon əsgərə çatdırılması hədəflənir. Lakin ekspertlər bu qədər qısa müddətdə əsgər tapmaq məqsədinin real olmadığını deyirlər.

Digər tərəfdən, Kreml hazırda 18-27 yaş arasında olan hərbi xidmət yaşının 21-30 yaşa qaldırılmasını təklif edib. Rusiya parlamentinin aşağı palatası deputatları ilk mərhələdə yalnız yuxarı həddi qaldırmağı, daha sonra isə aşağı həddə dəyişiklik etməyi hədəfləyir. Bu dəyişiklik zamanı orduya çağırılanların sayının artacağı bildirilir. Lakin bu islahatın yazda qoşun toplamaqla heç bir əlaqəsi yoxdur.

“Çağırışçılar Məktəbi” adlanan hüquq müdafiə təşkilatının direktoru Aleksey Tabalov icbari hərbi xidmətin “köhnə qaydalara uyğun” aparılacağının doğru olduğunu deyir. “Vətəndaş-Ordu-Qanun”un direktoru Sergey Krivenko da bu fikirlə razılaşır.

Krivenko deyib: "Bu yaz hərbi xidmətə qəbul yalnız 27 yaşdan kiçiklərin işə götürüldüyü sonuncu və ya sondan əvvəlki dövr olacaq".

Rusiya Müdafiə Nazirliyi yaz çağırışının başlamasına az qalmış müqaviləli hərbi xidmətlə bağlı kampaniyaya başlayıb. Hüquq müdafiəçilərinin bildirdiyinə görə, zərfdəki hərbi xidmətə çağırış vərəqəsinin göndərildiyi mart ayında müqavilə də qoyulub. Rusiya rəsmiləri bu vərəqələri dövlət qurumlarında, kitabxanalarda və idman məktəblərində divarlardan asaraq reklam yerləşdirirlər.

Rusiya hakimiyyəti isə çağırışçıların hələlik Ukraynadakı müharibəyə göndərilməyəcəyini bildirir. Lakin buna baxmayaraq, qohumları yeni çağırışçılardan bəzilərinin döyüş bölgəsinə göndərildiyini deyirlər.

Altay bölgəsindən olan Qalinanın sözlərinə görə, hazırda Novosibirsk vilayətində məcburi hərbi xidmət keçən oğlunu Ukraynaya yaxın olan Belqorod vilayətinə göndərmək istəyirlər. "3 aydır hərbi xidmətdə olan oğlum niyə Ukrayna sərhədinə getsin? Prezident əmr vermişdi ki, çağırışçılar döyüş bölgəsinə göndərilməyəcək", - deyə Qalina sual verib.

2022-ci ilin martında Putin Ukraynadakı müharibəyə çağırışçıların göndərilməyəcəyini açıqlamışdı. Lakin bundan bir qədər sonra Müdafiə Nazirliyi öz səhvini etiraf edib və bu şəxslərin həqiqətən də döyüş bölgəsinə göndərildiyini bildirib.

Son aylar məlum olub ki, məcburi hərbi xidmət keçən rusiyalı gənclərə bunker tikmək, səngər qazmaq tapşırılıb.

Hüquq müdafiəçisi Tabalov deyir ki, Müdafiə Nazirliyinin səfərbərlik elanı əvəzinə vətəndaşları müqavilə ilə hərbi xidmətə cəlb etmək istəməsi onu göstərir ki, hərbi xidmətdə olan insanlar böyük ehtimalla bu reklam kampaniyasının ən mühüm hədəf auditoriyasıdır.

Tabalov proqnozlaşdırır ki, gələcəkdə çağırışçıların hərbi xidməti başa çatdıqdan sonra da orduda xidmətə davam etmək məcburiyyətində qalması halları çox olacaq.

E. KAMAL

Ana səhifəyə dön