Kremlpərəst prankerlər Fransanın keçmiş prezidentini aldadıblar

Fransua Olland

Özlərini Ukraynanın keçmiş prezidenti Pyotr Poroşenko kimi təqdim edən iki Kremlpərəst rus pranker - Vovan və Lexus Fransanın keçmiş prezidenti Fransua Ollandı aldadıblar. Reyting.az xarici KİV-lərə istinadla bildirir ki, təxminən 15 dəqiqə davam edən danışıq fevralın 6-da olsa da, cəmi bir neçə gün əvvəl sosial şəbəkələrdə yayımlanıb.

Söhbət zamanı rusiyalı şəxslər Fransanın keçmiş prezidentinə Minsk razılaşması ilə bağlı suallar verməyə başlayır və Fransua Ollandın cavabı belə olur:
"Belə bir fikir var idi ki, Putin vaxt udmaq istəyir, lakin Ukraynanın bərpasına imkan vermək, hərbi resurslarını gücləndirmək üçün vaxt udmaq istəyən bizik (Fransa və Almaniya). Ona görə də biz Minsk razılaşmalarını müdafiə etməliyik. Siz [Poroşenko] çox mühüm rol oynadınız. Çünki məhz bu 7 il ərzində Ukraynanın özünü gücləndirmək imkanları oldu və Putin burada səhv etdi: o, ukraynalıların imkanlarını və onların müqavimətini lazımi səviyyədə qiymətləndirmədi”.

Bundan sonra bir çox “Twitter” istifadəçiləri bildiriblər ki, Fransanın sabiq prezidentinin dediklərindən belə anlaşılır ki, Minsk razılaşmaları regionda sülhə zəmanət vermək üçün yox, Ukraynanı NATO ilə hərbiləşdirmək, Rusiyaya hücuma və müharibəyə başlamaq üçün imzalanıb.
Hətta “Twitter”in rəhbəri Elon Musk bu fraqmentə reaksiya verərək, bunun gerçək olub-olmadığını soruşub.

Fransanın “Liberation” qəzetinin əlaqə saxladığı keçmiş prezident izah edib ki, prankerlər səslərini Pyotr Poroşenkonun səsinə bənzətmək üçün dərin saxta texnologiyadan istifadə ediblər.

Olland “Liberation”a deyib ki, zəng vuran şəxs özünü Poroşenkonun baş qərargah rəisi kimi təqdim edib: “Biz yoxladıq və şübhələnməyə əsasımız olmadı”.

Keçmiş prezident etiraf edib ki, Minsk razılaşmaları və münaqişədə Rusiyanın məsuliyyəti ilə bağlı sözləri özü deyib.

Xatırladaq ki, 2015-ci ildə imzalanan, sonra isə çox tez pozulan Minsk razılaşmalarının məqsədi Ukraynanın şərqində, Donbassda müharibəyə son qoymaq idi. Onun vasitəçiləri Fransua Olland, Almaniya kansleri Angela Merkel, Petro Poroşenko və Rusiya prezidenti Vladimir Putin olub.

Lakin “Liberation”un izah etdiyi kimi, Fransa prezidenti başqa bir müsahibəsində belə deyib: "Bu, [Ukraynanın] sabitliyi, tarazlığı bərpa etməsi və hücum zamanı hərbi vasitələrini gücləndirməsi üçün edilib. Biz Ukraynanı [işğaldan] qorumaq istəyirdik...”.

Onu da qeyd edək ki, rusiyalı prankerlər əvvəllər Fransa prezidenti Emmanuel Makron, Polşa prezidenti Anjey Dudu və Böyük Britaniyanın keçmiş baş naziri Boris Conson da daxil olmaqla digər Avropa siyasətçilərinə qarşı zarafatlar ediblər.

E. KAMAL
Reyting.az

Ana səhifəyə dön