Rusiyanın müdafiə xətti 800 kilometrə çatıb - Əks-hücuma qarşı əlavə tədbirlər görülür

Ötən ilin yayından Ukraynada işğal zonalarına “əjdaha dişləri” və minalar basdıran Rusiya xüsusilə tank və zirehli texnikanın keçidinin qarşısını almağı hədəfləyir.

Reyting.az xəbər verir ki, bu barədə İspaniyanın populyar “El Pais” nəşri yazıb.

Bildirilir ki, Ukraynada Rusiyanın işğal etdiyi bölgələrdə müdafiə xətti 800 kilometrə çaıb.

Rusiyanın yaydan bəri qurduğu müdafiə xəttinin şimal-şərqdəki Luqansk şəhərindən başladığı, Donetsk və Zaporojyadan keçərək Dnepr çayını izləyərək Krım yarımadasına qədər uzandığı qeyd edilib.

ABŞ-ın “American Entrepreneurship Institute” beyin mərkəzinin məlumatına görə, Rusiya ordusu müdafiə xəttinin inşası üçün ən az 2 min 580 nöqtədə fərqli işlər görüb. Bunlara tikanlı məftillərlə əhatə olunmuş ərazilər, xəndəklər, bunkerlər, həmçinin zirehli texnikanı dayandırmaq üçün tikilmiş “əjdaha dişlər”i və mina zonaları daxildir.

Rusiya ordusu müdafiə xəttini Ukraynanın başlaya biləcəyi genişmiqyaslı əks-hücuma hazırlıq məqsədilə qurur.

“El Pais”ə danışan İspaniyanın Qranada Universitetindən Javier Jordan və ABŞ-ın Kolumbiya Universitetindən Stiven Biddl belə bir xəttin İkinci Dünya Müharibəsində də olduğunu deyib və bildiriblər ki, hazırkı xətt İkinci Dünya Müharibəsindəkindən fərqlənmir.

Ruslar tərəfindən qurulan müdafiə xəttinə yerləşdirilmiş “əjdaha dişlər”i ilk dəfə İkinci Dünya Müharibəsində istifadə edilib. Dəmir-beton bloklardan hazırlanan bu konstruksiyalar tankların və mexanikləşdirilmiş piyada hissələrinin keçidini bağlayır.

Xəbərlərdə rusların müdafiə xəttinin Birinci və İkinci Dünya müharibələrində Şərqi Almaniyada tikilən Gothic Line və Ziegfried xətlərindən sonra ən uzun müdafiə xətti olduğu qeyd edilib.

Xatırladaq ki, Zeigfried xətti Birinci Dünya Müharibəsində Almaniya tərəfindən Şimali Fransada inşa edilmişdi. İkinci Dünya Müharibəsində isə nasistlər tərəfindən Şərqə doğru uzadılıb.

Gothic xətti İkinci Dünya Müharibəsi zamanı nasist Almaniyası tərəfindən məhv edilib. Bu, II Dünya Müharibəsində İtaliya cəbhəsində inşa edilmişdi. Müdafiə xətti Alp dağlarının şimalındakı əraziləri əhatə edirdi.

Finlandiyalı tarixçi və hərbi analitik Con Helin iddia edir ki, ruslar tərəfindən qurulan müdafiə xətti Ukraynanın mümkün əks-hücum planlarını çətinləşdirə bilər. Rusların müdafiə məqsədi ilə şəhər və qəsəbələri də gücləndirdiyinə diqqət çəkən Helin deyib ki, Ukrayna əsgərləri təhlükəsiz irəliləmək üçün onları bir-bir ələ keçirməlidirlər.

İngiltərə kəşfiyyatının aprelin 12-də paylaşdığı məlumatda isə qeyd olunur ki, xüsusilə Zaporojyadakı Rusiya müdafiə xətti davamlıdır. Kreml qüvvələri burada müxtəlif istehkamlardan ibarət ümumilikdə 120 kilometrlik müdafiə xətti təşkil edib.

İordaniyalı mütəxəssislər isə bildiriblər ki, Ukraynanın müdafiə xəttini keçməsi üçün çoxkoordinasiyalı hərəkət və strateji nöqtələrə hücum vacibdir.

Eyni zamanda qeyd olunur ki, müdafiə xəttində uğur qazanmaq üçün ordu bu ərazilərə artilleriya ilə güclü dəstək verməlidir. Amma Pentaqondan sızan məxfi sənədlərə görə, Ukraynanın raket ehtiyatları tezliklə tükənə bilər. Belə bir vəziyyətin isə Kiyev qüvvələrinin müdafiə və hücum qabiliyyətinə mənfi təsir göstərəcəyi danılmazdır.

E. KAMAL

Ana səhifəyə dön