Rusiya-Ukrayna müharibəsi nə vaxt bitəcək?

Ukraynanın cənub və şərqindəki bəzi bölgələri işğal edən Rusiya ordusu gecə yarısı Mikolayev şəhərinə raket zərbələri endirib. Raketlərdən biri hündürmərtəbəli binaya düşüb. Yerli rəsmilər azı 1 nəfərin öldüyünü və 23 şəhərin yaralandığını bildirir.

Ukrayna ordusu ruslardan geri alınan Xersonun yanındakı sahilyanı Mikolayev şəhərini vuran “Kalibr” raketinin Qara dənizdəki döyüş gəmisindən atıldığını iddia edir. Digər raketlərin “S-300” olduğu bildirilir.

Reyting.az xəbər verir ki, Qərb ölkələrindən on milyardlarla dollarlıq silah yardımı alan Ukraynanın nə vaxt əks-hücuma keçəcəyi hələlik sirr olaraq qalır.

NATO Avropa Müttəfiq Qüvvələrinin baş komandanı, ABŞ generalı Kristofer Kavoli deyib ki, ukraynalılar əks-hücumdan əvvəl lazım olan bütün silahları vaxtında alacaqlar.

Kiyev rəhbərliyinin indiyə qədər vəd olunan silahların 98 faizini aldığını bildirən general Kavolinin sözlərinə görə, Ukraynanın Odessa şəhərinə gətirilən silahlar yoxlanılıb.

Xatırladaq ki, müharibə başlayandan bəri Rusiya ilə münasibətlərini əvəlkindən daha çox dərinləşdirən Çin ilk dəfə Kiyev administrasiyası ilə birbaşa əlaqə qurub. Çin lideri Si Cinpin ukraynalı həmkarı Vladimir Zelenskiyə zəng edib.

Qeyd edək ki, Zelenskinin “uzun və mənalı” adlandırdığı telefon danışığı Pekin və Kiyev arasında işğalın başlanğıcından bəri ilk rəsmi təmasdır.

Dünyada tarazlıqları kökündən dəyişdirən və NATO-ya yeni üzvlər əlavə edən müharibənin nə qədər davam edəcəyi qeyri-müəyyəndir. ABŞ Müdafiə Nazirliyindən sızan gizli sənədlər isə müharibənin ən azı daha bir il davam edəcəyini proqnozlaşdırmağa əsas verir.

“Washington Post” qəzetinin yaydığı sənədlərə görə, Rusiya sanksiyalara baxmayaraq, Ukraynadakı müharibəni daha bir il maliyyələşdirə bilər. ABŞ kəşfiyyatı müəyyən edib ki, Rusiya misli görünməmiş sanksiyaların ağır və artan çəkisi altında müharibə üçün resurslar tapacaq.

Ən yüksək təsnifat səviyyəsi olan sənədin “tam məxfi” etiketli hissəsində deyilir ki, Moskva artan korporativ vergilərə, suveren sərvət fondlarına, artan idxala qarşı iqtisadi təzyiqləri azaltmağa kömək etmək üçün bizneslərin uyğunlaşma qabiliyyətinə güvənir.

Sənəddə yeni tətbiq edilən sanksiyaların təsiri və ya Avropada neftin qiymətinin pik həddə çatmasının uzunmüddətli ağırlıqlarına toxunulmur. Amma qeyd edilir ki, Rusiyanın neft gəlirləri dibə düşüb.

Rusiya nəzəri olaraq daha bir il müharibəni maliyyələşdirə bilsə də, sızdırılan sənəddə bu ölkənin döyüş qabiliyyətinə təsir edə biləcək digər amillər, məsələn, silah-sursat xərcləməsi, əsgər toplamaq və ya cəlb etmək zərurəti barədə məlumat verilmir.

Başqa bir sənəddə ABŞ kəşfiyyatı müəyyən edib ki, Rusiyanın yüksək kəşfiyyat orqanı olan Federal Təhlükəsizlik Xidmətinin rəsmiləri yerli Rusiya banklarının əlində kifayət qədər valyutanın olmamasından narahatdırlar. Həmin rəsmilər ABŞ-ın hələ də Rusiya ilə iş aparan Çin şirkətlərinə ikinci dərəcəli sanksiyalar tətbiq edə biləcəyi barədə xəbərdarlıq edərək, bu cür əməliyyatların gizli saxlanmasını istəyiblər.

Y. QACAR
Reyting.az

Ana səhifəyə dön