Zahid Oruc ittihamlarla razılaşmır

“Ünvanıma yazılan böhtanın - 36 ildir həyatda olmayan atamın adını da qarışdırıb 25 ildir sədaqətlə və şərəflə gəldiyimiz yola - Ulu öndər Heydər Əliyev və qalib lider İlham Əliyev kursuna, ideallarına xidmətə böhtan və şər yaxılması bizi dövlətimizə, xalqımıza, nəhayət, Qələbəmizə dönmədən, usanmadan, son nəfəsimizədək xidmətdən çəkindirə bilməz”.

Reyting.az xəbər verir ki, bunu Milli Məclisin komitə sədri Zahid Oruc adının Cinayət Məcəlləsinin üç maddəsi ilə ittiham olunan Prezident Administarsiyanın sabiq rəhbəri Ramiz Mehdiyevlə hallanmasına münasibət bildirərkən yazıb.

Zahid Oruc sosial şəbəkə hesabında bildirib ki, 1993-cü ildən bu günədək bir əqidədə olması çoxlarını narahat edir:

“Üstəlik, bəzən, qələm fəhləliyimizi də çoxları hansısa maraqlarına təhlükə sayıblar. Lakin indi Ramiz Mehdiyevin ağır dövləti cinayətləri və ondan bəhs edən məqalədə bizə atılan böhtanı görəndə susa bilmərik”.

Komitə sədri qeyd edib ki, kimliyindən asılı olmayaraq, hakimiyyət çevrilişinə cəhd və dövlətə xəyanət ən sərt cəzaya layiqdir: “Lakin hər kəs əməlinə özü cavab verməlidir və verəcək. Dövlətə və cənab Prezidentə xəyanət bağışlana bilməz. Ona görə də iki gün əvvəl söylədik: xəyanətin siyasi mənsubiyyəti və yaşı olmur. Xüsusilə xarici kəşfiyyatla əlaqəli baş verən bir qəsdin bəraəti yoxdur”.

Deputat yazır ki, 2003-cü ildə dövlətə daş atanlar indi o silahları sədaqət və ləyaqətlə Azərbaycan dövlətinə xidmət edən Zahid Orucun adını ləkələmək üçün atırlar:

“Bilin və agah olun - alnım o qədər açıqdır ki, heç bir gizli layihədə, görüşdə, xarici kəşfiyyat mərkəzləri ilə əlaqədə, yaxud dövlətimizin əleyhinə planda iştirakımız olmayıb, kimisə “ata”lıqda görməmişik, heç bir şəxsin kölgəsinə sığınıb klan, tayfa, qrup və ya siyasi birlikdə iştirak etməmişik, nəhayət, kiməsə saxta obraz düzəldib onun xəstə planlarına xidmət etməmişik. Heç vaxt ola bilməz… Qanımız və canımızla hamını əmin edirik.

Dövlətimizin etimad göstərdiyi sahələrdə fəhlə kimi çalışmışıq: gecə-gündüz, yalnız bir amalla yorulmadan işləmişik.

Bir siyasi əqidədə yol gələrkən, hər zaman möhtərəm cənab Prezidentdən yüksək ehtiram görmüşük. Yüksək ideallarla xidmət üçün bundan böyük dayağımız olmayıb.

Qoy kər kəs bilsin - zərrə qədər şübhəsi ola varsa da inansın - mən Zahid Oruc, o böhtanlara əsas verəcək bircə əməlin sahibi deyiləm. Tam əksinə, bir beyin mərkəzinin təmsilçisi və siyasət adamının görə biləcəyi nə varsa, onu etmişik - Prezidentə və Dövlətə ləyaqətlə xidmət”.

Z. Oruc əmin edir ki, onu şər-böhtanla dövlət başçısının gözündən sala bilməyəcəklər.

Ana səhifəyə dön