Liviyanın keçmiş lideri Müəmmər Qəddafinin Əz-Zintan şəhərində öldürülən oğlu Seyf əl-İslamın dəfn mərasimi yalnız ailəsinin və iki yerli qəbilə nümayəndələrinin iştirakı ilə keçiriləcək.

Reyting.az bildirir ki, bu barədə Seyf əl-İslamın cənazəsinin gətirildiyi Bəni Vəlid şəhərindəki təhlükəsizlik rəsmisi məlumat verib.

“Əl-Hədət” TV-nin məlumatına görə, rəsmi bildirib ki, dəfn mərasimində yalnız onun ailəsi və iki Liviya qəbilə şurasının üzvü iştirak edəcək.

O əlavə edib ki, bu, ən böyük yerli qəbilələrdən biri olan Varfalla və həm Seyf əl-İslamın, həm də atası Müəmmər Qəddafinin mənsub olduğu Əl-Qəddafa qəbiləsinə aiddir.

“Əl-Hədət” bildirir ki, hazırda Liviyada Qəddafi ailəsinə əsas dəstək mərkəzlərindən biri olan Bəni Vəliddə Seyf əl-İslama dəfn namazı üçün hazırlıqlar gedir. Öldürülən şəxsin qohumlarının əvvəllər bildirdiyi kimi, Qəddafinin oğlu babası və 2011-ci ildə vəfat etmiş kiçik qardaşı Xamisin dəfn olunduğu qəbiristanlıqda torpağa tapşırılacaq.

Cəmahiriyyə liderinin ikinci oğlu Seyf əl-İslam 3 fevralda 53 yaşında evində öldürülüb. O, heç bir dövlət vəzifəsi tutmayıb, lakin 2011-ci ildə Müəmmər Qəddafi rejiminin süqutuna qədər xarici siyasət danışıqlarında mühüm rol oynayıb. Atasının ölümündən sonra Seyf əl-İslam Liviyada edam cəzasına məhkum edilsə də, sonradan hökm ləğv olunub. Qəddafinin oğlu 2021-ci ildə ölkə ümumi seçkilər keçirməyə cəhd edərkən prezidentliyə namizədliyini irəli sürüb. İndiyə qədər Liviyada nə parlament, nə də prezident seçkiləri keçirilməyib.

V. QULİYEV