Rusiya-Ukrayna cəbhəsində nə baş verir?

“Ukraynada döyüşlər şiddətlənib, lakin əməliyyatlarla bağlı gündəlik xəbərlərdən çox böyük nəticə çıxarmaq olmaz”.

Reyting.az xəbər verir ki, bunu ABŞ Silahlı Qüvvələrinin Birləşmiş Qərargah Rəisləri Komitəsinin rəhbəri, general Mark Milli deyib.

“Ukraynanın Rusiya Federasiyası tərəfindən işğal olunmuş bütün ərazisində aktivlik var və döyüşlər bir qədər intensivləşib”, - general bildirib.

M. Milli əlavə edib ki, əks-hücumun rəsmi başlandığını elan etmək Ukraynanın işidir: “Bizim hesablamalarımıza görə isə, Ukrayna hərbçiləri istənilən hərəkətə - həm hücuma, həm də müdafiəyə yaxşı hazırlaşıblar”.

General diqqətə çatdırıb ki, müttəfiqlərin qışda verdiyi təlim və silahlara əsaslanaraq Ukraynanın qarşıdakı döyüşlərə hazır olduğuna inanır: “Çoxlu təlim keçilib, çoxlu tədarüklər var. Digər ölkələr, o cümlədən ABŞ Ukraynaya çoxlu sursat tədarük edib. Onlar hansı əməliyyat növündən asılı olmayaraq buna hazırdırlar”.

Amerikalı general döyüşün təbiətinin zamanla dəyişəcəyini də proqnozlaşdırıb:

“Hər hansı digər böyük döyüş kimi, müharibə də uğur və uğursuzluqlarla bağlıdır. Yüksək fəallıq və aşağı aktivlik günləri, hücum və müdafiə hərəkətləri olacaq. Beləliklə, kifayət qədər uzun müddət davam edəcək”.

Keçmişdə baş verənləri dəyərləndirən general bildirib ki, Ukrayna Silahlı Qüvvələri fevralda işğalın əvvəlindən yayın ortalarına qədər ölkəni yaxşı müdafiə edib, daha sonra Xarkov və Xerson vilayətlərində iki uğurlu hücum əməliyyatı keçirib.

Qeyd edək ki, Qərb müttəfiqləri, xüsusən də ABŞ artıq Ukrayna Silahlı Qüvvələrini əks hücuma hazırlamaq üçün mümkün olan hər şeyi etdiklərini bildiriblər. İyunun 7-də isə Milli Təhlükəsizlik və Müdafiə Şurasının katibi Aleksey Danilov deyib ki, Ukrayna Silahlı Qüvvələri hələlik əks-hücuma keçməyib, onun başlanğıcı hər kəsə aydın olacaq.

Amma bu gün məlum olub ki, Luqanskda silsilə partlayışlar baş verir. Bu barədə rusiyalı təbliğatçılar məlumat yayıb. Rusların “hava hücumundan müdafiənin uğurlu işinə” əmin olmasına baxmayaraq, şəhərə bomba yağdığını hadisə yerindən çəkilmiş foto və videolar da təsdiqləyir.

Separatçı “LPR” polkovniki Vitali Kiselevin sözlərinə görə, çox güman ki, Ukrayna qoşunları Luqanska uzaqmənzilli “Storm Shadow” raketləri ilə hücum edib. Yerli ictimaiyyət Luqanska ən azı 4 raketin uçduğunu bildirir.

“Washington Post” isə yazır ki, Ukrayna ordusunun yay əks-hücum əməliyyatı payızla müqayisədə asan olmayacaq. Nəşr qeyd edir ki, Ukrayna ordusunun ötənilki qələbələrini izah etmək asandır. Xarkov vilayətindəki əks-hücum ruslar üçün tamamilə gözlənilməz olub, çünki onlar cənubda müdafiəyə hazırlaşırdılar. Xersonda isə ruslar Dnepr vasitəsilə qoşunların tədarükü ilə bağlı çoxdankı çətinliklərlə üzləşdilər. Amma indi müharibənin ümumi mənzərəsi kökündən dəyişib.

Bildirilir ki, əks-hücumun gedişatına təsir edəcək üç əsas amil var:

Birincisi, yeni cəbhə xətti konfiqurasiyası. İndi Rusiya cəbhəsinin Qərb cinahı xüsusilə Kaxovka bəndinin yarılmasından sonra keçmək çətin olan Dnepr çayı ilə qorunur. Zaporojye çölü hücumun açıq istiqamətidir, lakin ruslar geniş sahə istehkamları və minalanmış sahələr şəbəkəsi quraraq bu varianta hazırlaşıblar. Onların aradan qaldırılması Ukrayna Silahlı Qüvvələri üçün çətin iş olacaq və vaxt tələb edəcək, bu müddət ərzində təcavüzkar ehtiyatları təhlükə altında olan ərazilərə çıxarmağa vaxt tapacaq.

İkincisi, döyüş meydanında yeni silahlar. Ukrayna Silahlı Qüvvələri bir çox yeni Qərb silahları alıb, bu da Ukrayna ordusunda silahlarla bağlı vəziyyəti əhəmiyyətli dərəcədə dəyişib. Bundan əlavə, Qərbdə bütöv briqadalar hücum əməliyyatlarına hazırlaşırdılar, Ukrayna ordusunun öyrəşdiyindən daha yeni və daha mürəkkəb döyüş üsulu öyrənib.

Üçüncüsü, mənəvi ruhdur.

Nəşr qeyd edir ki, Rusiya ordusunda müharibənin lap əvvəlindən mənəvi-psixoloji problemlər yaranıb və Baxmutda pirr qələbəsi ilə başa çatan qış hücumundan sonra vəziyyət heç də yaxşılaşmayıb. Ukraynanın mənəviyyatındakı çatlar kiçikdir, lakin Ukrayna cəmiyyəti bu əks-hücuma çox böyük ümidlər bəsləyir və böyük uğur əldə olunmasa, “emosional məyusluq” başlaya bilər.

Ukrayna Baş Qərargahı hələlik böyük əks-hücumun başlandığını təsdiqləməyib, lakin Ukrayna Silahlı Qüvvələrinin Baxmut istiqamətində taktiki irəliləyişini elan edir.

ELÇİN

Ana səhifəyə dön