Kəşfiyyat: “Ukrayna əsas məqsədinə çatmayacaq”

Əks-hücum əməliyyatları zamanı Ukrayna əsas məqsədə - Zaporojye vilayətinin Melitopol şəhərinə nail ola bilməyəcək.

Reyting.az xəbər verir ki, bunu “The Washington Post”a ABŞ kəşfiyyatının məxfi proqnozu ilə tanış olan mənbələr deyiblər.

Amerika kəşfiyyatının təhlili Rusiya işğalçı qüvvələrinin bölgədə şiddətli müqavimət göstərməsi, geniş minalanmış sahələr və səngərlər sistemi ilə müdafiə etməsinə əsaslanır.

ABŞ nəşrinin iddiasına görə, silah və hərbi texnikasına on milyardlarla dollar xərclənən hücumun öz məqsədlərinə çatmaması Kiyev və Qərb paytaxtlarını qarşılıqlı ittihamlara sövq edəcək.

ABŞ rəsmiləri bildiriblər ki, Rabotinodan Melitopol istiqamətində irəliləyən Ukrayna qoşunları şəhərdən təxminən 80 kilometr aralıda qalacaq.

Nəşr qeyd edir ki, döyüşlərin ilk həftəsində Ukrayna Rusiyanın yaxşı hazırlanmış müdafiəsinə qarşı xeyli itki verib, indi isə Ukrayna Silahlı Qüvvələri cəbhənin müxtəlif sektorlarında kiçik hissələrdə irəliləmə taktikasına keçmək qərarına gəlib. Buna səbəb kimi itkiləri minimuma endirmək göstərilir.

Materialda həmçinin qeyd olunur ki, Ukrayna Donetsk vilayətində Baxmut uğrunda gedən döyüşlərdə böyük resurs itirib, bu səbəbdən Bayden administrasiyası şərqdəki öhdəliklərin cənubda əks-hücum potensialını sarsıda biləcəyindən narahatdır.

Yeni kəşfiyyat təxminləri ABŞ-ın fevral ayı üçün gizli proqnozuna uyğundur ki, bu da texnika və qoşun çatışmazlığının əks-hücumun Ukraynanın avqusta qədər Krıma quru körpüsünü kəsmək məqsədinə çatmaqdan “çox uzaq” olacağı anlamına gələ bilər. Bu qiymətləndirmə Amerika əsgəri Aleks Teyşeyranın Discord sosial şəbəkəsində yerləşdirdiyi gizli sənəddə də öz əksini tapıb.

ABŞ rəsmiləri bildiriblər ki, Vaşinqton hələ də Kiyevin skeptikləri təəccübləndirəcək və çətinliklərin öhdəsindən gələcəyinə qərarlıdır. Pentaqon rəsmilərindən biri deyib ki, Ukrayna qışda əks-hücum əməliyyatını davam etdirə bilər, amma həmin vaxt əsgərləri istilik, yemək və sursatla təmin etmək daha çətinləşir.

Müdafiə rəsmisi bildirib ki, bu, onların əllərində nə qədər soyuq hava üçün xüsusi avadanlıq və geyim olduğundan asılıdır. Lakin Moskva qış hərbi əməliyyatları zamanı da rəqiblərini geridə qoya bilər, çünki “ruslar soyuq havada döyüşmək iqtidarındadırlar”, - rəsmi əlavə edib.

Xatırladaq ki, xarici işlər naziri Dmitri Kuleba daha əvvəl bildirmişdi ki, Ukrayna əks-hücum zamanı Qərbdən təzyiq hiss etmir.

Daha əvvəl Pentaqon bəyan etmişdi ki, Ukrayna Silahlı Qüvvələri rusları müdafiəyə çəkməklə möcüzə göstərib.

Bundan əlavə, ABŞ Müdafiə Nazirliyi əks-hücum zamanı Ukrayna Silahlı Qüvvələrinin irəliləyişini qeyd edir, lakin bunun çətin və uzunmüddətli mübarizə olacağını proqnozlaşdırır.

E. KAMAL
Reyting.az

Ana səhifəyə dön