Rusiya “Maydan-3” əməliyyatını yeniləmək istəyir

Rusiyanın Ukraynaya qarşı “Maydan-3” adlı əməliyyatı davam etsə də, onun müəyyən mərhələləri artıq iflasa uğrayıb.

Reyting.az xəbər verir ki, bunu Ukrayna Müdafiə Nazirliyinin Baş Kəşfiyyat İdarəsinin nümayəndəsi Andrey Yusov deyib.

A. Yusov xatırladıb ki, fevralın 27-də Ukrayna Prezidenti yanında Kəşfiyyat Komitəsinin birgə bəyanatı yayılıb: “Bu, düşmənin xüsusi əməliyyatını və Rusiyanın Ukrayna daxilində sabitliyi pozmağa, dünyada dövlətimizə dəstəyi zəiflətməyə yönəlmiş fəaliyyətini ifşa etməyə həsr olunmuşdu. Bəli, ilk mərhələlərə əsasən iddia edilə bilər ki, fiasko idi, lakin indi yeni düzəliş edilmiş planlar və yeni tarixlər var. Və kulminasiya nöqtəsi artıq başqa tarixlərə köçürülüb - biz aprel və may aylarından danışırıq. Eyni informasiya-psixoloji əməliyyatlar, dezinformasiya əməliyyatları, təsir agentlərindən istifadə, ictimai rəy liderləri, sosial şəbəkələrdə işləmək üçün böyük investisiyalar...”.

Kəşfiyyat nümayəndəsi qeyd edib ki, Rusiyanın “Maydan-3” əməliyyatının uğursuz mərhələlərində Ukraynada daxili qeyri-sabitlik səbəbindən cəbhənin dağılmasının qarşısını almaq mümkün olub. “Bu əməliyyatlar hələ də davam edir. Biz daxili qeyri-sabitliyə görə cəmiyyətdə parçalanmanın və cəbhənin dağılmasının qarşısını ala bildik. Düşmən bunu əldə etmək istəyir. O, başa düşür ki, arxa cəbhədə birlik olduqda, dövlətin hərəkətlərinə dəstək verildikdə, cəmiyyət kimin düşmən, kimin dost olduğunu bildikdə, effektiv müqavimət göstərə, öz torpaqlarını müdafiə edə və təcavüzkara qarşı mübarizə aparmağə bacarır”, - Yusov vurğulayıb.

Yusov xəbərdarlıq edib ki, ruslar “Maydan-3” əməliyyatının növbəti mərhələlərini davam etdirmək cəhdlərindən əl çəkməyəcək. Onun sözlərinə görə, bu cür əməliyyatlar nə qədər bahalı olsa da, bu, Moskva üçün öz resurslarını, iqtisadiyyatını səfərbər etməkdən və Ukrayna ərazisində kontingentini saxlamaqdan daha sərfəlidir.

“Bütün zəruri məlumatlar Baş Kəşfiyyat İdarəsi tərəfindən Baş Qərargah və Ukraynanın hərbi-siyasi rəhbərliyinə ötürülür və lazımi tədbirlər görülür. Müəyyən ərazilərdə və istiqamətlərdə hücuma cəhdlərdən danışsaq, hazırda onlar davam edir”,- Ukrayna kəşfiyyatının nümayəndəsi bildirib.

Onun fikrincə, Rusiyada bir çox qərarlar Putinin seçkilərinin nəticələrindən asılı olaraq veriləcək: “O cümlədən, bu dövlətin ərazisində əlavə səfərbərlik fəaliyyəti ilə bağlı qərar. Bu, həm də Rusiya cəmiyyətinin üzləşə biləcəyi yeni reallıqdır”.

Xatırladaq ki, Ukrayna Prezidenti yanında Kəşfiyyat Komitəsinin yaydığı bəyanata görə, Rusiya xüsusi xidmət orqanları “Maydan-3” əməliyyatı vasitəsilə bu ilin iyununda Ukrayna Silahlı Qüvvələrinin məğlubiyyəti üçün zəmin hazırlamaq niyyətindədir.

Onu da qeyd edək ki, bir neçə gün əvvəl Ukrayna Müdafiə Nazirliyinin Baş Kəşfiyyat İdarəsinin rəisi Kirill Budanov bildirmişdi ki, ruslar tarixlərinin ən bahalı informasiya və psixoloji xüsusi əməliyyatı olan “Maydan-3”-ü hazırlayırlar.

ELÇİN

Ana səhifəyə dön