Vatikan Papası Ukraynanı təslim olmağa çağırıb?

Vatikanın sözçüsü Matteo Bruni Roma Papası Fransiskin dediklərinə, “Ən güclü xalqı düşünən, özündə cəsarət taparaq ağ bayraq qaldırıb danışıqlar aparan tərəfdir”,- sözlərinə münasibət bildirənlərə Vatikan Papasının söylədiklərinin izahını verib.

Reyting.az-ın məlumatına görə, Matteo Bruni deyib ki, Papa müsahibə zamanı bu ifadələri işlədərkən çoxlarının düşündüyü kimi Ukraynanın Rusiyaya təslim olmasını nəzərdə tutmayıb.

Baş verən qalmaqalın səbəbi isə İsveçrənin RSI yayım şirkəti tərəfindən Vatikan Papası Fransisklə müsahibədən bir fraqmenti dərc etməsindən sonra yaranan hay-küy olub.

Müsahibə zamanı jurnalist soruşub:

- Ukraynanın özündə təslim olmağa və ağ bayraq qaldırmağı cəsarətlə tələb edənlər var. Digərləri isə bu addımın daha çox gücə malik olana legitimlik verəcəyini deyir. Siz bu barədə nə düşünürsünüz?.

Papanın cavabı belə olub:

- Bu, təfsirdir. Amma mən inanıram ki, vəziyyəti qiymətləndirənlər və insanları düşünənlər, hətta yeri gələndə ağ bayraq qaldırıb sülh danışıqları aparmağa cəsarət göstərənlər daha güclüdür. Bu gün beynəlxalq güclərin köməyi ilə və istənilən zaman danışıqlar aparmaq mümkündür. “Danışıqlar" sözü cəsarətli ifadədir. Məğlub olduğunuzu və yaxud da işlərinizin yaxşı getmədiyini görəndə danışıqlar aparmağa cəsarətiniz olmalıdır. Ayıb olsun, amma bu nə vaxta kimi davam edəcək, axı nə qədər ölümlə nəticələnəcək? Vaxtında razılaşın, vasitəçi kimi çıxış edəcək ölkə axtarın. Bu günün özündə belə Ukrayna müharibəsini dayandırıb bu münaqişədə vasitəçi olmaq istəyənlər çoxdur. Bu məqsədlə Türkiyə də öz vasitəçiliyini təklif etdi. Vəziyyətin daha pisləşdiyini gözləməyin və təcili danışıqlar aparmaqdan utanmayın.

Söylənilən fikirlərin yanlış izah edildiyini görən Vatikan nümayəndəsi M. Bruni deyilənləri şərh edib. Onun sözlərinə görə, əslində Papa Fransisk Ukraynanın təslim olmasını nəzərdə tutmayıb.

Vatikan sözçüsü qeyd edib ki, Papa tərəfləri atəşkəsə, danışıqlara çağırıb. M. Brunini xatırladıb ki, Vatikan Papası “ağ bayraq” ifadəsini ona Ukrayna ilə bağlı sual verən bir jurnalist tərəfindən istifadə edildiyi üçün həmin kəlməni işlədib. Papanın nümayəndəsi bildirib ki, o, bundan "döyüşlərin dayandırılmasını və danışıqların cəsarəti ilə əldə edilən barışığı ifadə etmək üçün" istifadə edib.

Qeyd edək ki, Roma Papası Fransisk dəfələrlə çıxışlarında Ukrayna müharibəsinin əleyhinə çıxdığını bəyan edib və daima tərəfləri sülhə səsləyib. Vatikan Papası Fransisk dönə-dönə bəyan edib ki, müharibənin dayandırılması məqsədi ilə istənilən vaxt Rusiya və Ukrayna arasındakı danışıqlarda vasitəçilik etməyə hazırdır.

Oqtay QORÇU

Ana səhifəyə dön