80 yaşlı kəşfiyyatçının məhkəməsidir - 50 il əvvəlki cinayətə görə

Almaniyada 50 il əvvəl Berlin divarından Qərbə keçmək istəyən şəxsi öldürməkdə təqsirləndirilən keçmiş STASİ zabitinin məhkəməsi başlayıb.

Reyting.az xəbər verir ki, STASİ-də leytenant rütbəsində xidmət etmiş 80 yaşlı Almaniya vətəndaşı Qərbi Berlinə qaçmağa çalışan polyakı güllələmək ittihamını rədd edib.

Almaniya prokurorluğunun məlumatına görə, müttəhim Çeslav Kukuçkanın kürəyindən atəş açıb. Polşalı yanğınsöndürən və üç uşaq atası olan Kukuçka Qərbə gedərək yeni həyata başlamaq niyyətində olub.

Qeyd olunur ki, Kukuçka 1974-cü ildə Polşanı tərk edərək Şərqi Berlinə gəlib. Şərqi Berlindən əlində çanta ilə Polşa səfirliyinə daxil olub, çantada bomba olduğunu və Qərbi Berlinə keçməsinə icazə verilməsə partladacağını bildirib. Səlahiyyətlilər lazımi sənədləri hazırlayaraq ona Fridrix küçəsində yerləşən vağzaldan Qərbi Berlinə keçməyə icazə verib. Ç. Kukuçka sərhəd qapısını keçərkən planının baş tutduğunu düşünüb, amma az sonra keçid məntəqəsində kürəyindən güllə yarası alıb. O, STASİ-nin nəzarətində olan həbsxana klinikasına aparılsa da, orada dünyasını dəyişib. Şərqi Berlinə məktəb səfərindən qayıdan bir qrup Qərbi Almaniya məktəblisi trençkotlu və eynəkli bir adamın Kukuçkaya atəş açdığını gördüklərini bildiriblər. Bu, hazırda məhkəməsi başlayan şəxs olub.

Hadisədən sonra Şərqi Almaniya və Polşa səlahiyyətliləri baş verənləri gizlətməyə çalışıblar. Kukuçkanın ailəsinə bu barədə xəbər verilməyib. Ailəyə yalnız onun külünün olduğu qab verilib. 1990-cı illərdə Almaniya birləşdikdən sonra çoxsaylı araşdırmalar aparılsa da, qatil tapılmayıb. Ona görə də cinayət işi 2005-ci ildə bağlanıb.

Lakin 2016-cı ildə Polşa və Almaniyadan olan ekspertlər STASİ arxivində yeni sübutlarla rastlaşıblar. Onlar müəyyən ediblər ki, sözügedən şəxs bu hadisədəki roluna görə bürünc medala layiq görülüb. İndi prokurorlar tətiyi 80 yaşlı kişinin çəkdiyinə inanırlar, çünki onun da eyni medalı var.

Arxiv məlumatlarına görə, Kukuçkanın çantasından heç bir bomba tapılmayıb. Arxivdən tapılan eyni sənədlərə görə, Şərqi Almaniya səlahiyyətlilərinin “o, silah gəzdirib” iddiası həqiqəti əks etdirmir.

Xatırladaq ki, Berlin divarı tikildikdən sonra Şərqi Berlindən Qərbi Berlinə qaçmaq istəyərkən ən azı 140 nəfər həlak olub. Bu insanları qətlə yetirənlərin ədalət qarşısında cavab verməsi çox nadir hadisə sayılır. Bu günə qədər mühakimə olunan az sayda insan adam öldürmədə ittiham olunub. Bu dəfə 80 yaşlı Almaniya vətəndaşına qarşı irəli sürülən ittiham qəsdən və qanunsuz adamöldürmə sayılır.

V. QULİYEV

Ana səhifəyə dön