Çin və Flippin arasında qarşıdurma: əsgərlər yaralanıb, qayıqlara zərər yetirilib

Cənubi Çin dənizindəki mübahisəli adaların yeganə hökmdarı olduğunu iddia edən Çin bu yaxınlarda Filippin sahil mühafizəsi ilə yeni münaqişəyə başlayıb. Manila administrasiyası, Çin sahil mühafizə gəmilərinin İkinci Tomas Rifində Filippin qayıqlarını vurduğunu və zədələdiyini açıqlayıb. Qarşıdurma zamanı Filippin əsgərləri yaralanıb, xəstəxanaya çatdırılan əsgərlərdən birinin vəziyyəti ağırdır.

Reyting.az xatırladır ki, Qərbi Filippinin Palavan adasından 200 kilometr aralıda yerləşən İkinci Tomas Rif Filippin əsgərlərinin qarnizonuna ev sahibliyi edir.

Filippin qeyd edib ki, Çin donanmasına təhlükəli manevrlər həyata keçirib.

Yerli mətbuatda Çin əsgərlərinin filippinli dənizçilərin silahlarını müsadirə etdiyi barədə də məlumat yayılıb.

Rəsmi açıqlamada Pekin rəhbərliyi Filippin təchizat gəmisinin Çin sahil mühafizə qruplarının ciddi xəbərdarlıqlarına məhəl qoymadığını və lazımi tədbirlər görüldüyünü bildirib. Rəsmi açıqlamada toqquşmaya Filippin gəmisinin səbəb olduğu iddia edilib.

Manila administrasiyası Çinin Qərbi Filippin dənizindəki təhlükəli və ehtiyatsız hərəkətlərinə qarşı ölkənin suverenliyini müdafiə edəcəyini bildirib.

Görüntülərdə Çin əsgərlərinin hücum edərək Filippin qayıqlarına çırpıldığı əks olunub. Çinli dənizçilərin əllərində balta və bıçaqla Filippin qayıqlarını vurduğu da görünür.

Çinlilər ələ keçirdikləri Filippin qayığının demək olar ki, bütün elektron sistemlərini məhv ediblər. Səsyazmalarda diqqət çəkən digər məqam isə Filippin və Çin əsgərlərinin davamlı olaraq qışqıraraq bir-birini təhdid etmələridir. Görüntüləri yayan Manila administrasiyası Çin əsgərlərinin quldurlar kimi davrandığını bildirib.

Filippinin müttəfiqi olan ABŞ da gərginliyə müdaxilə edib. Vaşinqton Çini qınayıb və Manila rəhbərliyinə dəstəyini bildirib.

Vaşinqtonun fikrincə, Çinin İkinci Tomas Rifi ətrafında hərəkətləri təxribat xarakterlidir və daha böyük münaqişələrə səbəb ola bilər.

ABŞ Dövlət Departamentinin sözçüsü Çinə açıq şəkildə xəbərdarlıq edib: “Vaşinqton və Manila arasında müdafiə sazişi Cənubi Çin dənizində sahil mühafizə gəmilərinə silahlı hücumları əhatə edir”.

Cənubi Çin dənizi son illərdə Çin və ABŞ arasında güc mübarizəsinə səhnə olub. Pekin administrasiyası mübahisəli sularda inşa etdiyi süni adalarda bir çox hərbi baza və infrastruktur obyektləri yerləşdirib, lakin Tayvan, Vyetnam, Filippin, Malayziya və Bruney kimi ölkələr də adalar üzərində hüquqlarını iddia edir.

Filippin dünyanın ən mühüm dəniz yollarından biri olan və zəngin karbohidrogen ehtiyatlarına malik Cənubi Çin dənizini “Qərbi Filippin dənizi” adlandırır.

ABŞ fevral ayında Filippinlə imzaladığı hərbi baza müqaviləsi sayəsində Çini mühasirəyə almağı bacarıb. Amerika ordusuna dörd yeni bazanın açılması ilə Vaşinqtonun Cənubi Çin dənizi ətrafında müdafiə qalxanı qurulub. Cənubda Avstraliya, şimalda Yaponiya və Cənubi Koreyanın yer aldığı xətt Filippinin iştirakı ilə tamamlanıb.

Bundan başqa, Amerika ordusu Filippin ordusu ilə “Balikatan” adlı nəhəng təlimlər həyata keçirir. Cənubi Çin dənizində bəzi gəmilərin batırılması ssenarisi əsasında keçirilən təlimlərdə 10 mindən çox ABŞ əsgəri iştirak edib.

E. KAMAL

Ana səhifəyə dön