Nobel mükafatı laureatı müvəqqəti hökumətin başçısı seçilib

Nobel Sülh Mükafatı laureatı, banqladeşli professor Məhəmməd Yunus ölkənin müvəqqəti hökumətinə rəhbərlik edəcək.

Reyting.az xatırladır ki, iqtisadçı-alim Məhəmməd Yunus 1940-cı ilin 28 iyununda Banqladeşin Çittaqonq yaxınlığındakı Batua kəndində, Böyük Britaniya imperiyasının nəzarətində olan Hindistanın ərazisində, o zaman Benqal torpaqlarına verilən müasir Banqladeşdə doğulub. Banqladeşli bankir, iqtisadiyyat üzrə professor, minimum həddən başlamaqla iqtisadi, sosial inkişaf yaratmaq səylərinə görə 2006-cı ildə Nobel Sülh Mükafatına layiq görülən Məhəmməd Yunus iş adamı kimi həm də "Grameen Bank"-ın sədri və təsisçisidir. Bu məhşur sima dünyada mikromaliyyə və mikrokreditin qabaqcıllarından biri hesab olunur.

Professor Məhəmməd Yunus 2024-cü ilin 6 avqustundan Banqladeşin müvəqqəti hökumətinin sədri seçilib.

Bu yaxınlarda Banqladeşdə parlamentin buraxılmasından, eləcə də bu ölkənin baş naziri Şeyx Hasinanın qaçmasından sonra prezident həmyerlisinə müraciət edərək onun razılığını aldığını bildirib. Az sonra Banqladeş prezidenti Nobel ödüllü alimin müvəqqəti yaradılan hökumətə rəhbərlik edəcəyini bəyan edib. Məhəmməd Yunus barədə yayılan xəbərlərdə xüsusi olaraq vurğulanır ki, 84 yaşlı iqtisadçı-professor mikromaliyyə bankı vasitəsilə milyonlarla insanı yoxsulluqdan xilas etməklə tanınır.

Öncə bu vəzifədən imtina etməsi ilə bağlı yayılmış xəbərin yalan olduğunu bildirən Məhəmməd Yunus deyib ki, o, tərəddüd etmədən çərşənbə axşamı Banqladeşin müvəqqəti hökumətinə rəhbərlik etmək dəvətini qəbul edib. Qeyd edək ki, bu barədə çərşənbə günü səhər ölkə prezidenti Məhəmməd Şahabəddin də məlumat verib.

"Məhəmməd Yunusun başçılıq etdiyi yeni müvəqqəti hökumətin yaradılması üçün aparılan müzakirə və bu barədə verilmiş qərar prezident Məhəmməd Şahabuddin, ordunun yüksək rütbəli rəsmiləri, eləcə də Tələbələr Ayrı-seçkiliyə Qarşı adlanan kollektivin liderlərinin arasında keçirilən görüşdə qəbul edilib. Bununla prezident xalqa müraciətində məqsəd olaraq ancaq böhrandan çıxmaq üçün yeganə addımın bu olduğunu bildirib. Ölkə prezidentinin fikrincə, Banqladeşin rifahı naminə məhz Məhəmməd Yunusa müraciətlə köməklik göstərilməsi xahişi yerində, həmçinin də vaxtında qəbul edilmiş bir qərardır ", - deyə Banqladeş prezidentinin adından dərc edilmiş geniş bəyanatda qeyd olunur.

Onu da xatırladaq ki, ölkə prezidenti çərşənbə axşamı etirazçı tələbələrin istəyini, üç ay ərzində ölkədə azad şəraitdə demokratik seçkilərin keçirilməsini qətiyyətlə tələb edən, əsas müxalifət partiyası Banqladeş Milliyyətçi Partiyasının (BNP) tələbini də nəzərə alıb və parlamenti buraxıb.

"Agence France-Presse"-in məlumatına görə, Banqladeşdə başlayan etiraz aksiyaları zamanı baş verən qarşıdurmalarda həlak olanların sayı 432 nəfərə çatıb.

Etiraz dalğası ancaq xalqın qəzəbindən qorxaraq ölkə paytaxtından helikopterlə Hindistana qaçan, eləcə də Britaniyadan sığınacaq istədiyi güman edilən baş nazir Şeyx Hasinanın bazar ertəsi Banqladeşi tərk etməsi ilə yekunlaşıb.

Oqtay QORÇU

Ana səhifəyə dön