Avropa Komissiyasının sədri Ursula fon der Lyayen bazar ertəsi Litva prezidenti Gitanas Nauseda ilə danışığından sonra Belarusla bağlı yeni sanksiyaların hazırlanacağını elan edib.

Reyting.az xəbər verir ki, o, bunu “X” sosial şəbəkəsində yazıb.

Nauseda ilə danışıqdan sonra Ursula fon der Lyayen bildirib ki, Belarusla sərhəddə vəziyyət pisləşir və Litvanın hava məkanına daxil olan qaçaqmal daşıyan hava şarlarının sayı artır.

“Lukaşenko rejiminin bu cür hibrid hücumları tamamilə qəbuledilməzdir. Biz Litva ilə tam həmrəy olmağa davam edirik. Sanksiya rejimimiz çərçivəsində əlavə tədbirlər hazırlayırıq”,- deyə o əlavə edib.

Xatırladaq ki, Litvanın xarici işlər naziri Kyastutis Budris ölkənin hava məkanının Belarusdan qaçaqmal daşıyan meteoroloji zondlarla sistemli şəkildə pozulması fonunda sərt sanksiyaların bu cür hərəkətlərə zəruri cavab olduğunu bildirib.

Onun bu şərhləri 30 noyabr, bazar günü, saat 18:09-da Vilnüs hava limanı üzərində hava məkanına müvəqqəti məhdudiyyətlərin tətbiq edilməsi və 11 saat sonra açılması fonunda səslənib.

Xatırladaq ki, oktyabr ayında Litva hava şarlarının uçuşlarına cavab olaraq Belarusla sərhəddəki hər iki keçid məntəqəsini bağlamışdı, lakin hava hərəkətindəki fasilələr dayanmış kimi göründüyündən onları yenidən açdı.

E. KAMAL