Almaniya silah şirkəti “Rheinmetall” və peyk istehsalçısı OHB amerikalı iş adamı İlon Maskın “Starlink” internet xidmətinin analoqunu Alman ordusuna yaratmaq üçün birgə danışıqlar aparırlar.

Reyting.az xəbər verir ki, bu barədə “Financial Times” nəşri məsələ ilə tanış olan üç nəfərə istinadla yazıb.

Nəşrin mənbələri bildiriblər ki, Almaniyanın hərbi kosmik texnologiyalar üçün 35 milyard avroluq büdcəsinin bir hissəsini təmin edəcək tərəfdaşlıqla bağlı danışıqlar ilkin mərhələdədir.

Məqalədə izah edilir ki, təklif olunan birgə müəssisə, Almaniya Silahlı Qüvvələri olan Bundesverə aşağı Yer orbitində (LEO) təhlükəsiz, hərbi dərəcəli peyk rabitə şəbəkəsi yaratmaq üçün çoxmilyardlıq avroluq müqavilə təklif edəcək. Rəsmilər şəbəkəni hərbi “Bundesver üçün Starlink” ilə müqayisə edirlər.

Qeyd olunur ki, bu danışıqlar Berlinin keçən il hərbi kosmik texnologiyaları üçün 35 milyard avro vəd etməsindən sonra Avropa müdafiə və kosmik şirkətləri arasında gəlirli müqavilələr uğrunda rəqabət şəraitində keçirilir. Beləliklə, Almaniya hərbi imkanlarını sürətlə genişləndirməyi və ABŞ-dan asılılığını azaltmağı hədəfləyir.

Xatırladaq ki, “Starlink” dünyanın ən böyük kosmik genişzolaqlı internet provayderidir və 9000-dən çox peyki Yer kürəsindən təxminən 2000 kilometr yüksəklikdə yerləşən LEO bölgəsində milyonlarla müştəriyə bağlantı təmin edir.

Nəşr xatırladıb ki, “Starlink” əvvəlcə kommersiya xidməti olsa da, Rusiyanın tammiqyaslı işğalından sonra onun yüksək sürətli və asanlıqla daşına bilən terminalları Ukrayna müdafiə qüvvələri üçün vacib hala gəlib. Digər şəbəkələr məhv edildikdə və ya zədələndikdə döyüş meydanında yüksək etibarlı rabitəni təmin edir.

“Starlink” o vaxtdan bəri müdafiə və kəşfiyyat müştəriləri üçün Starshield kimi tanınan LEO peyk xidmətini istifadəyə verib. Lakin Mask və ya ABŞ-a etibar etməkdən çəkinən bir çox ölkə öz təhlükəsiz və suveren şəbəkələrini inkişaf etdirmək istəyirlər.

“Novaspace” kosmik şirkətinin məlumatına görə, Almaniyanın bu sektora investisiya qoymaq planları onu ABŞ və Çindən sonra kosmik texnologiyaya ən çox vəsait xərcləyən üçüncü ölkəyə çevirəcək.

Almaniya Silahlı Qüvvələrinin kosmik koordinatoru Armin Fleyşmann öz növbəsində Bundesver şəbəkəsinin “növbəti bir neçə il ərzində, əsasən alman şirkətlərinin iştirakı ilə” qurulacağını bildirib.

V. QULİYEV