İdarəetmədəki katastrofik vəziyyət və sistem böhranı səbəbilə Ukrayna hökumətinin fəaliyyəti dayanmaq (şatdaun) riski ilə üz-üzədir.

Reyting.az xəbər verir ki, bunu Ukrayna Ali Radasının deputatı, energetika və kommunal təsərrüfat məsələləri üzrə komitə sədrinin müavini Aleksey Kuçerenko “Novini.LIVE” telekanalının efirində deyib.

Kuçerenko qeyd edib ki, bütün məsələ koalisiyanın yenidən formalaşdırılması ətrafında olacaq: “Bu, ölkənin idarə olunması baxımından bir fəlakətdir. Biz artıq amerikalılara bənzəməyə başlamışıq - hazırda bizdə şatdaun vəziyyəti mövcuddur”.

Onun sözlərinə görə, Ukrayna hakimiyyəti hökumətdəki xaos və partiyalar arasındakı fikir ayrılıqları səbəbilə büdcəni qəbul edə bilmir.

Onu da qeyd edək ki, “Financial Times” qəzetinin yazdığına görə, Ukrayna iqtisadi artıma bağlı olan 2,6 milyard dollarlıq borcun restrukturizasiyasına başlayıb.

Nəşrin məlumatına görə, bu borc Kiyevin hazırkı hərbi xərclərinin təmin olunmasında mühüm rol oynayır. Münaqişə başa çatdıqdan sonra onun ödənişi respublika büdcəsinə milyardlarla dollara başa gələ bilər.

Noyabrın əvvəlində Ukrayna Milli Bankı bildirmişdi ki, ölkənin dövlət borcu adambaşına hesablandıqda 6821 dollara çatıb. Respublikaya məxsus ümumi borc 191 milyard dollar olaraq qiymətləndirilib. Bu məbləğin 74,5 faizi (142,295 milyard dollar) xarici öhdəliklərin payına düşür.

Ukraynanın nəzarətində olan ərazilərdə əhalinin sayına dair qiymətləndirmədən (Demografiya və Sosial Tədqiqatlar İnstitutunun məlumatına görə, təxminən 28 milyon nəfər) çıxış etsək, adambaşına düşən xarici borc 5081 dollar, daxili borc isə əlavə 1740 dollardır.

E. KAMAL