Slovakiya Avropa Komissiyasının Ukraynaya dondurulmuş Rusiya aktivlərindən istifadə edərək təzminat krediti vermək qərarını dəstəkləməyəcək.

Reyting.az xəbər verir ki, bunu Slovakiyanın baş naziri Robert Fiko sosial media hesabında yazıb.

“Slovakiya yalnız əzab və ölümü uzadan planlarda iştirak etməyəcək. Avropa Şurasının qarşıdan gələn iclasında Ukraynanın hərbi xərclərinin maliyyələşdirilməsini əhatə edəcək heç bir qərarı dəstəkləməyəcəyəm”, - Fiko qeyd edib.

Baş nazir bildirib ki, Ukrayna münaqişəsinin hərbi həlli yoxdur, Avropa Birliyinin bu münaqişə ilə bağlı strategiyası səhv və təsirsizdir:

“Müharibəni davam etdirmək Ukraynanın potensial sülh danışıqlarında mövqeyini gücləndirmədən mənasız qətldən başqa bir şey deyil”.

Fiko hesab edir ki, hərbi xərclərə on milyardlarla avro ayırmaq müharibəni uzadır və dondurulmuş Rusiya aktivlərinin istifadəsi ABŞ-nın sülh səylərini birbaşa təhlükəyə ata bilər.

Fiko əlavə edib ki, Slovakiya hökuməti Ukraynaya humanitar işlərin bir çox sahəsində köməklik göstərən, onu elektrik enerjisi və qazla təmin edən etibarlı və dəstəkləyici bir oyunçudur: “Üstəlik, Slovakiya müharibədən qaçan təxminən 200.000 Ukrayna vətəndaşına ev sahibliyi edir”.

Bundan əlavə, baş nazir bildirib ki, Slovakiya Ukraynanın AB-yə daxil olmasını dəstəkləyir.

Onu da qeyd edək ki, Macarıstan və Slovakiya Avropa Birliyinin Rusiya neft və qaz idxalını qadağan etmək planına etirazlarını bildirmək üçün Avropa Ədalət Məhkəməsinə müraciət etmək niyyətindədirlər.

Y. QACAR