Çində "yan gedən" səssiz raket platforması nümayiş etdirilib. Bu, ölkənin hərbi sənaye tarixində ilk səssiz işləyən, həmçinin yan tərəfə hərəkət edə bilən və modul quruluşa malik ağır elektrikli platformadır.

Reyting.az-ın məlumatına görə, platforma üzərində çalışan və onu ərsəyə gətirən çinli mütəxəssislər bildiriblər ki, bu texnologiyadan superağır yüklərin daşınması üçün istifadə edilsə də, xüsusiyyətləri onun mobil qitələrarası raket buraxılış qurğusunu tam əvəz edə biləcək bir sistem kimi də istifadə oluna biləcəyini göstərir.

Məlumata görə, bu layihə ilk dəfə 2024-cü ilin yanvar ayında təsdiqlənəndən sonra Tsinhua Universitetinin rəhbərliyi ilə bir neçə aparıcı texniki institutun iştirakı ilə hazırlanıb.

Platformadakı hər təkər ayrıca idarə olunur və hərəkət, əyləclər, sükan, həmçinin asqı funksiyaları elektron sistemlə koordinasiyadadır. Bu isə hərbi maşına "dəniz xərçəngi" kimi yan hərəkət etməyə, eyni zamanda yerində dönməyə imkan verir. Yeni maşın elektrik ötürücü sayəsində demək olar ki, tam səssiz işləyir, tüstü buraxmır və minimal dərəcədə istilik izi qoyur.

Mütəxəssislərin dediyinə görə, onun modul quruluşu yükə görə ölçü, eyni zamanda, daşıma qabiliyyətinin dəyişdirilməsinə çox asanlıqla imkan verir.

Tərtibatçılar vurğulayıblar ki, bu cür platformalar həm ağır loqistika, həm də müdafiə məqsədləri üçün perspektivlidir.

Texnologiyanın Çinin yeni nəsil enerji nəqliyyat vasitələri üzrə yol xəritəsinə daxil edildiyi bildirilir.

Oqtay QORÇU