Rusiya Atlantik okeanında ABŞ Sahil Mühafizəsi tərəfindən saxlanılmaqdan yayınmağa çalışan neft tankerini müşayiət etmək üçün sualtı qayıq və digər hərbi gəmilər göndərib.

Reyting.az xəbər verir ki, bu barədə “The Wall Street Journal” qəzeti ABŞ rəsmiləri arasında olan mənbələrə istinadla yazıb.

Qeyd edək ki, adıçəkilən gəmi əvvəllər “Bella 1” kimi tanınıb.

Nəşrin məlumatına görə, tanker neft yükləmək üçün Venesuela limanlarına daxil ola bilməyib və hazırda boşdur. Buna baxmayaraq, ABŞ Sahil Mühafizəsi qanunsuz neft, xüsusən də Rusiya mənşəli neft daşıyan və “kölgə donanması” adlandırılan gəmini müəyyənləşdirib saxlamaq üçün genişmiqyaslı kampaniyanın bir hissəsi olaraq təqibə başlayıb.

Dekabr ayında gəminin heyəti ABŞ hərbçilərinin gəmiyə minmək cəhdinin qarşısını alıb. Daha sonra tanker açıq dənizə çıxıb, yan tərəfinə Rusiya bayrağı çəkib, qeydiyyatını və adını “Marinera”-ya dəyişdirərək Rusiya Federasiyası ilə əlaqəsini faktiki olaraq elan edib.

“Rusiya ABŞ-nın qaçaqmal neftini dünyaya daşıyan və iqtisadiyyatına dəstək verən tankerləri saxlamasından narahatdır. Buna cavab olaraq Moskva görünməmiş bir addım ataraq tankerlərdən birinin Rusiyada yoxlama və ya digər rəsmiləşdirmələr olmadan qeydiyyatdan keçməsinə icazə verib”, - deyə nəşr qeyd edib.

Üç ABŞ rəsmisi əvvəllər Rusiyanın ABŞ-dan gəmini təqib etməyi dayandırmağı rəsmi olaraq tələb etdiyini təsdiqləyib. Rusiya Xarici İşlər Nazirliyi dövlət mediası vasitəsilə vəziyyəti “narahatlıqla” izlədiyini bildirib.

Avtomatik İdentifikasiya Sisteminə (AIS) görə, ABŞ Sahil Mühafizəsi Şərqi Atlantikada “Marinera” gəmisinin müşayiətinə davam edir. Tanker hazırda İslandiyanın təxminən 480 kilometr cənubundadır və Şimal dənizinə, Rusiyanın Murmansk limanına doğru gedir.

ELÇİN