Rusiya Ukraynaya qarşı döyüş əməliyyatlarında iştirak etmiş əcnəbilərin başqa ölkələrə ekstradisiya edilməsindən imtina etməyə başlaya bilər.

Reyting.az “İnterfaks”a istinadla xəbər verir ki, Rusiya Dövlət Dumasının Dövlət Quruculuğu və Qanunvericilik Komitəsi Rusiya Silahlı Qüvvələrində xidmət etmiş və ya “xüsusi hərbi əməliyyatlarda” iştirak etmiş əcnəbilərin xarici dövlətlərə ekstradisiyasını nəzərdə tutan qanun layihəsinin birinci oxunuşda qəbulunu tövsiyə edib.

Qanun layihəsi (№1075342-8) Rusiya Silahlı Qüvvələrində və ya ölkənin digər hərbi hissələrində müqavilə əsasında xidmət edən, eləcə də əvvəllər bu cür xidmət keçmiş və Rusiya Silahlı Qüvvələrinin və ya digər hərbi hissələrin tərkibində döyüş əməliyyatlarında iştirak etmiş xarici vətəndaşlara və ya vətəndaşlığı olmayan şəxslərə şamil edilir.

Layihəyə əsasən, bu kateqoriyaya aid şəxslərin cinayət təqibi və ya məhkəmə hökmünün icrası məqsədilə xarici dövlətlərə ekstradisiyası rədd ediləcək.

Təklif olunan dəyişikliklər Rusiya Federasiyası Cinayət-Prosessual Məcəlləsinin 464-cü maddəsinə aiddir.

Qanun layihəsi, eyni zamanda, Rusiya Silahlı Qüvvələrində xidmət etmiş əcnəbilərin Rusiya Federasiyasından inzibati qaydada çıxarılmasının və deportasiya edilməsinin qadağan olunmasını nəzərdə tutan qanunvericilik təşəbbüsləri paketinin tərkib hissəsi kimi Dövlət Dumasına təqdim edilib.

V. QULİYEV