ABŞ prezidenti Donald Trampın elçiləri Stiv Uitkoff və Cared Kuşner yaxın vaxtlarda Rusiya prezidenti Vladimir Putinlə görüşmək və Ukraynadakı müharibəyə son qoymaq məqsədilə Moskvaya səfər etməyi planlaşdırırlar.

Reyting.az xəbər verir ki, bu barədə “Bloomberg” nəşri məlumatlı mənbələrə istinadla yazıb.

Mənbələrin bildirdiyinə görə, görüşün bu ay ərzində baş tutması mümkündür. Lakin planlar hələ tam dəqiqləşdirilməyib və İranda baş verən hadisələr səbəbindən səfərin gecikdirilməsi ehtimalı da istisna olunmur.

Bununla belə, Ağ evin sözçüsü belə bir görüşün planlaşdırılmadığını bildirib. Kreml isə mövzu ilə bağlı şərh verməkdən imtina edib.

Nəşrin mənbələrindən biri qeyd edib ki, Putinin Uitkoff və Kuşnerlə ikinci görüşə nə dərəcədə maraq göstərdiyi hələlik bəlli deyil və bu amil tarix müəyyənləşdirilməsində əsas maneə kimi qiymətləndirilir.

Digər mənbələr isə bildiriblər ki, ABŞ rəsmiləri Putin və onun komandasına sülh planının son variantını təqdim etmək istəyirlər. Gözlənilir ki, müzakirələr ABŞ və Avropa ölkələrinin Ukraynaya istənilən sülh sazişinə əməl olunmasını təmin etmək üçün verəcəyi təhlükəsizlik zəmanətləri, eləcə də ölkənin müharibədən sonra yenidən qurulması məsələlərini əhatə edəcək.

Xatırladaq ki, Uitkoff və Kuşner ötən ilin dekabrında Moskvaya səfər edərək Putinlə görüşüblər. Təxminən beş saat davam edən danışıqlar zamanı ciddi irəliləyiş əldə olunmayıb.

Onu da qeyd edək ki, S. Uitkoff ötən il ərzində Rusiyada V. Putinlə altı dəfə görüş keçirib.

E. KAMAL