Çin istehsalı olan “J-10” (Chengdu J-10) qırıcı təyyarəsi 2025-ci ildə ilk hava qələbəsini qazanıb.

Reyting.az “Defense Express”ə istinadla xəbər verir ki, bu barədə Çinin Müdafiə Elmi, Texnologiyası və Sənayesi Dövlət Administrasiyası məlumat yayıb.

Məlumata görə, hadisə Pakistan Hərbi Hava Qüvvələrinin istismarında olan və təxminən 20 analoji təyyarədən ibarət parkın Hindistan Hərbi Hava Qüvvələrinə məxsus “Rafale” (Fransa istehsalı) qırıcısını vurması ilə təsdiqlənib.

Qeyd olunur ki, 2025-ci ilin may ayında Pakistan Hərbi Hava Qüvvələrinə məxsus “J-10CE” qırıcısı təxminən 200 kilometr məsafədən “PL-15” uzaqmənzilli raketindən istifadə edərək Hindistanın Dassault “Rafale” təyyarəsini vurub.

Çin tərəfi hava döyüşü zamanı bir neçə düşmən təyyarəsinin məhv edildiyini bildirir. Pakistan daha əvvəl beş Hindistan təyyarəsinin vurulduğunu açıqlasa da, müxtəlif müşahidəçilər yalnız iki təyyarənin itirildiyini ehtimal edirlər. Həmçinin qeyd olunur ki, döyüşdə iştirak edən təyyarələr təkcə Dassault “Rafale” deyil, eyni zamanda “Su-30MKI” qırıcıları da ola bilər.

Çin, həmçinin döyüş zamanı heç bir “J-10CE” qırıcısının itki vermədiyini iddia edir.

“Bu iddianı təkzib edən açıq mənbəli birbaşa dəlil yoxdur. Lakin Hindistan böyük uğurlar əldə etdiyini, hətta “S-400” hava hücumundan müdafiə sisteminin təyyarə vurduğunu iddia etməklə bu mövqeni mübahisələndirməyə çalışır. Dəlillərin olmaması və hər hansı itkinin ilkin mərhələdə inkar edilməsi nəzərə alınarsa, bu iddiaların doğruluğu az ehtimal olunur”, - deyə müəlliflər bildiriblər.

Çin tərəfi bu hadisəni 2025-ci il üçün milli müdafiə sənayesinin ən mühüm on hadisəsindən biri hesab edir. Siyahıya, həmçinin “Fujian” təyyarədaşıyan gəmisinin istismara verilməsi, İkinci Dünya müharibəsinin başa çatmasının 80-ci ildönümünə həsr olunmuş hərbi parad, uran istehsalı və emalı sahəsində nailiyyətlər, kosmik sənayedə əldə olunan irəliləyişlər və digər mühüm hadisələr daxildir.

Xatırladaq ki, 2025-ci ilin may ayında Hindistan və Pakistan arasında qısamüddətli hərbi toqquşma baş verib. Qarşılıqlı hücumlarda ümumilikdə 125 qırıcı iştirak etsə də, tərəflərdən heç biri qarşı ölkənin hava məkanını pozmayıb. Eyni zamanda, Hindistan Hərbi Hava Qüvvələri 2016-cı ildə ölkə üçün istehsal olunmuş bir “Rafale” qırıcısını itirib.

V. QULİYEV